Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Dydd Gwener, 5 Medi 2008

dolenni i dudalennau eraill yn yr adran hon

Pori wrth destun

Pori wrth bobl

Pobl anabl

Taliad Niwed Trwy Frechiad

Os ydych chi'n ddifrifol anabl o ganlyniad i frechiad rhag clefydau penodol, mae'n bosib y cewch chi Daliad Niwed Trwy Frechiad, taliad untro di-dreth o £120,000.

Pwy gaiff hawlio?

Mae'n bosib y cewch chi Daliad Niwed Trwy Frechiad os tybiwch eich bod yn ddifrifol anabl a bod eich anabledd wedi'i achosi gan frechiad rhag unrhyw un o'r clefydau hyn:

diphtheria
tetanws
y pas
poliomyelitis
y frech goch
clwy’r pennau
rwbela (y Frech Almaenig)
tiwberciwlosis (TB/y diciâu)
haemophilus influenzae math B (HIB)
meningococcal grŵp C (meningitis C)
heintiau niwmococol
y frech wen (hyd at 1 Awst 1971)

Mae'n bosib eich bod wedi cael brechiad cyfun rhag nifer o'r clefydau a restrir, er enghraifft DTP (diptheria, tetanws a'r pas) neu MMR (y frech goch, clwy'r pennau a rwbela).

Mae'n bosib hefyd y gallwch chi gael y taliad os tybir eich bod yn ddifrifol anabl oherwydd:

naill ai bod eich mam wedi'i brechu rhag un o'r clefydau yn y rhestr pan oedd yn feichiog
neu eich bod wedi bod mewn cysylltiad corfforol clos gyda rhywun sydd wedi'i frechu rhag poliomyelitis drwy gael brechlyn trwy'r geg

Beth yw 'anabledd difrifol'?

Mesurir anabledd ar ffurf canran, a'r diffiniad o 'anabledd difrifol' yw anabledd o 60 y cant o leiaf. Gallai hyn fod yn anabledd meddyliol neu'n anabledd corfforol.

Er enghraifft, fel arfer, ystyrir bod colli'r golwg neu'r clyw'n llwyr yn anabledd o 100 y cant.

Pryd a ble y cafwyd y brechiad - y rheolau

Er mwyn bod yn gymwys ar gyfer y Taliad Niwed Trwy Frechiad, fel arfer rhaid i chi fod wedi cael y brechiad cyn eich pen-blwydd yn 18 oed, oni bai mai brechiad rhag poliomyelitis, rwbela neu Grŵp C Meningococcaidd, oedd hwn, neu iddo gael ei roi yn ystod heintiad o glefyd yn y DU neu Ynys Manaw.

Rhaid i chi fod wedi cael y brechiad yn y DU neu ar Ynys Manaw.

Os rhoddwyd y brechiad y tu allan i'r DU, mae'n bosib y gallech ddal i gael taliad os rhoddwyd ef fel rhan o driniaeth feddygol y Lluoedd Arfog.

Pryd i hawlio

Os byddwch chi'n hawlio ar ran plentyn, rhaid i chi ddisgwyl iddynt fod yn ddwy oed o leiaf cyn hawlio.

Rhaid hawlio erbyn y dyddiad diweddaraf o'r ddau hyn:

pen-blwydd y person anabl yn 21 oed (neu os ydynt wedi marw, y dyddiad y byddent wedi cyrraedd 21 oed)
o fewn chwe blynedd i ddyddiad y brechiad

Faint fyddwch chi'n ei gael?

Mae'r swm yn £120,000 ac yn ddi-dreth.

Sut mae'n cael ei dalu

Rhoddir taliad i chi, neu, os ydych chi dan 18 oed neu'n methu rheoli'ch materion chi'ch hun, telir yr arian i ymddiriedolwyr.

Os ydych chi'n byw gyda'ch teulu, mae'n bosib y penodir eich rhieni'n ymddiriedolwyr.

Yr effaith ar fudd-daliadau eraill

Gall eich Taliad Niwed Trwy Frechiad effeithio ar fudd-daliadau a hawliadau eraill, megis:

Cymhorthdal Incwm
Lwfans Ceisio Gwaith yn Seiliedig ar Incwm
Credyd Treth Gwaith
Credyd Treth Plant
Credyd Pensiwn
Budd-dal Tai
Budd-dal y Dreth Gyngor

Bydd yr effaith gaiff y taliad yn dibynnu ar sawl peth, gan gynnwys a fydd y taliad yn cael ei roi mewn cronfa ymddiriedolaeth a'r taliadau'n cael eu gwneud ohoni.

Dylech roi gwybod i'r swyddfa sy'n delio â'ch hawliad am fudd-dal neu gredyd treth os cewch chi Daliad Niwed Trwy Frechiad. Gallant hwy roi mwy o wybodaeth a chyngor i chi.

Sut i hawlio

Gallwch gysylltu â'r Uned Taliadau Niwed Trwy Frechiad i ofyn am ffurflen hawlio:

Vaccine Damage Payment Unit

Palatine House, Lancaster Road

Preston, PR1 1HB

Rhif ffôn: 01772 899944

Ffôn testun: 01772 562202

Mae'r llinellau ar agor rhwng 9.00 am a 5.00 pm o ddydd Llun i ddydd Iau, a rhwng 9.00 am a 4.30 pm ar ddydd Gwener. Gallwch hefyd ffonio drwy ddefnyddio Typetalk RNID.

Neu, gallwch lwytho ffurflen i'w hargraffu oddi ar y we a'i llenwi.

Os ydych o dan 18, dylai eich rhiant neu eich gwarcheidwad hawlio ar eich rhan.

Beth sy'n digwydd ar ôl i chi anfon y ffurflen hawlio

Unwaith i 'r Uned Taliadau Niwed Trwy Frechiad dderbyn eich hawliad, bydd yn gofyn am dystiolaeth feddygol gan y meddygon neu'r ysbytai sy'n ymwneud â'ch triniaeth.

Bydd hawliad yn llwyddiannus os derbynnir:

bod eich anabledd wedi'i achosi gan frechiad
bod y lefel o anabledd y gellir ei phriodoli'n uniongyrchol i'r brechiad yn 60 y cant o leiaf

Anfonir llythyr atoch i ddweud beth yw canlyniad yr hawliad.

Sut i apelio

Os gwrthodir eich hawliad a'ch bod yn anghytuno â'r penderfyniad, cewch ofyn i'r Uned Taliadau Niwed Trwy Frechiad edrych arno eto, neu cewch apelio i dribiwnlys apêl annibynnol.

Os tybiwch fod y wybodaeth berthnasol heb ei hystyried neu os daw gwybodaeth newydd i'r golwg, cewch ofyn i'r Uned Taliadau Niwed Trwy Frechiad ailystyried eu penderfyniad.