Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Pobl anabl

Pobl anabl

Profi, dewis a phrynu cyfarpar

Fe all y cyfarpar iawn wneud byd o wahaniaeth i'ch gallu i fyw'n annibynnol yn eich cartref eich hun. Mae'n syniad da cael cyngor arbenigol a phrofi cyfarpar bob tro cyn i chi ei brynu.

Help i ddewis a phrofi cyfarpar

Os nad ydych yn sicr pa gyfarpar y bydd arnoch ei angen, gall yr erthygl 'Cyfarpar i'w ddefnyddio o AMGYLCH y tŷ' fod yn gyflwyniad defnyddiol i'r mathau o gyfarpar sydd ar gael.

Therapyddion galwedigaethol

Gall therapyddion galwedigaethol roi cyngor penodol i chi am eitemau unigol o gyfarpar anabledd. Gallant hefyd fod yn ddefnyddiol os ydych wedi dod yn anabl yn ddiweddar ac yn ansicr ynghylch pa gyfarpar y gall fod ei angen arnoch.

Gallwch ddod o hyd i therapydd galwedigaethol drwy gyfrwng adran gwasanaethau cymdeithasol eich cyngor lleol. Gallan nhw ymweld â chi yn eich cartref a'ch helpu i benderfynu pa gyfarpar sy'n gweddu orau i'ch ffordd o fyw.

Profi cyfarpar cyn ei brynu

Dylech brofi pob darn o gyfarpar cyn ei brynu. Os ydych chi'n ystyried prynu eitem ddrud, gofynnwch am gael defnyddio'r cyfarpar am gyfnod prawf yn eich cartref eich hun.

Help gan y Sefydliad Byw'n Anabl

Mae'r Sefydliad Byw'n Anabl yn helpu pobl hŷn a phobl anabl i ddod o hyd i gyfarpar i'w galluogi i fyw'n annibynnol yn eu cartrefi eu hunain. Mae eu gwasanaethau'n cynnwys:

  • gwasanaeth llinell gymorth, sy'n ateb ymholiadau am gyfarpar
  • canolfan arddangos cyfarpar, lle gallwch chi ei brofi a chael cyngor gan therapyddion galwedigaethol a ffisiotherapyddion
  • amrywiaeth o daflenni gwybodaeth ar-lein i'ch cynorthwyo i ddewis cyfarpar, gan gynnwys lifftiau grisiau, teclynnau codi, sgwteri ac offer ar gyfer y cartref.

Mae'r Sefydliad hefyd wedi lansio gwasanaeth ar-lein er mwyn helpu i ddewis cynhyrchion i'r ystafell ymolchi, yr ystafell wely a teleofal. Mae'r wefan 'Living made easy' yn darparu gwybodaeth ddiduedd sydd yn rhad ac am ddim am yr holl gynnyrch sydd ar gael yn y DU.

Help gan y Canolfannau Byw'n Anabl

Mae'r Canolfannau Byw'n Anabl yn cynnig cyfle i bobl anabl brofi amrywiaeth eang o wahanol fathau o gyfarpar. Maent hefyd yn cynnig cyngor annibynnol am ddim ynghylch pa gynnyrch sydd ar gael, y gost ac o ble y gellir cael gafael arnynt.

Gall Assist UK, sy'n arwain rhwydwaith o Ganolfannau Byw'n Anabl ar draws y DU, roi'r wybodaeth ddiweddaraf i chi am eich canolfan agosaf. Mae gan wefan Assist UK wasanaeth chwilio ar-lein, neu gallwch eu ffonio neu ddefnyddio ffôn testun i gysylltu â nhw.

Ffôn: 0870 770 2866

Ffôn testun: 0870 770 5813

Cymorth i brynu cyfarpar

Defnyddio taliadau uniongyrchol i dalu am gyfarpar

Os ydych chi'n cael taliadau uniongyrchol gan eich cyngor lleol i drefnu a thalu am eich gofal a'ch gwasanaethau eich hun, fe gewch ddefnyddio'r arian mewn unrhyw ffordd y mynnwch chi ar yr amod ei fod yn diwallu'ch anghenion fel y'u nodwyd yn yr asesiad.

Cewch ddefnyddio taliadau uniongyrchol i brynu neu i logi cyfarpar anabledd neu i gael ei atgyweirio a'i gynnal a'i gadw.

Os mai eich bwriad yw defnyddio taliadau uniongyrchol i dalu am gyfarpar, holwch ai chi ynteu adran gwasanaethau cymdeithasol eich cyngor lleol fydd biau'r cyfarpar hwnnw a phwy fydd yn gyfrifol am ei gynnal a'i gadw.

Holwch eich gwasanaethau cymdeithasol bob tro cyn prynu eitem fawr, gan ei bod yn rhaid i gynghorau lleol sicrhau eich bod yn defnyddio'ch taliadau uniongyrchol i ddiwallu'ch anghenion fel y'u nodwyd yn yr asesiad a hynny am gost y mae'r cyngor yn ei hystyried yn rhesymol.

Os ydych chi'n awyddus i brynu darn o gyfarpar sy'n ddrutach na'r un y mae'ch cyngor lleol wedi cytuno i dalu amdano, mae'n bosib y gallwch chi dalu amdano drwy gyfuniad o daliadau uniongyrchol a'ch arian eich hun. Mynnwch sgwrs â'ch cyngor lleol cyn gwneud hyn, gan fod gwahanol gynghorau o bosib yn dilyn gwahanol bolisïau.

Grantiau Cyfleusterau i'r Anabl

Ystyrir rhai mathau o gyfarpar mawr yn addasiadau, a chyfrifoldeb adran dai eich cyngor lleol yw hyn.

Mae’n bosib y bydd gennych yr hawl i Grant Cyfleusterau i Bobl Anabl i dalu am y rhain.

Gostyngiad TAW ar nwyddau a gwasanaethau i bobl anabl

Does dim rhaid i bobl anabl dalu TAW wrth brynu cyfarpar sydd wedi'i gynllunio ar gyfer pobl anabl neu pan fyddan nhw'n cael addasu offer i'w ddefnyddio.

Mae amodau caeth ynghylch pa fath o gyfarpar sy'n gymwys i gael gostyngiad TAW a phwy gaiff brynu cyfarpar heb dalu TAW. Dylech bob tro ofyn i'r cyflenwr a yw'r cyfarpar yn gymwys i gael gostyngiad TAW cyn ei brynu.

Llogi cyfarpar yn hytrach na'i brynu

Yn aml iawn, gallwch logi cyfarpar anabledd yn hytrach na'i brynu, neu hefyd fel ffordd o benderfynu a yw'n addas ar eich cyfer cyn i chi ei brynu. Bydd rhai mudiadau anabledd yn cadw stoc o gyfarpar ac yn ei logi i aelodau am gyfnodau byr.

Yn yr adran hon...

Allweddumynediad llywodraeth y DU