Gwefan llywodraeth y DU

Sefydliadau'r sector cyhoeddus a 'Chynlluniau Cydraddoldeb Anabledd'

Mae sefydliadau'r sector cyhoeddus yn cynnwys:

• ysbytai
• ysgolion a cholegau
• ymddiriedolaethau'r Gwasanaeth Iechyd Gwladol (GIG)
• heddluoedd
• llywodraeth ganolog a lleol

Mae'r Ddyletswydd Cydraddoldeb i Bobl Anabl (DCA) yn ymdrin ag amrediad cyfan gweithgareddau'r sector cyhoeddus – gan gynnwys llunio polisïau a gwasanaethau a ddarperir ar gyfer y cyhoedd.

Rhaid i bobl sy'n gweithio yn y sector cyhoeddus ystyried effaith eu gwaith ar bobl anabl, a chymryd camau i fynd i'r afael ag anghydraddoldeb ar sail anabledd. Dylai hyn olygu bod gan bobl anabl gyfleoedd gwell o ran cyflogaeth ac na fyddant yn wynebu camwahaniaethu, er enghraifft, wrth ddefnyddio gwasanaeth. Dylai hefyd helpu i hyrwyddo agweddau cadarnhaol tuag at bobl anabl mewn bywyd bob dydd.

Ers 4 Rhagfyr 2006, mae awdurdodau cyhoeddus arwyddocaol wedi gorfod cyhoeddi 'Cynllun Cydraddoldeb Anabledd'. Y dyddiad ar gyfer ysgolion cynradd yn Lloegr oedd Rhagfyr 2007, ac ar gyfer pob ysgol yng Nghymru, y dyddiad oedd Ebrill 2007. Rhaid i'r cynllun gynnwys y canlynol:

• datganiad am sut mae pobl anabl wedi'u cynnwys yn y broses o ddatblygu'r cynllun
• cynllun gweithredu sy'n cynnwys ffyrdd ymarferol o wneud gwelliannau
• y trefniadau sydd wedi'u sefydlu ar gyfer casglu gwybodaeth am sut mae'r sefydliad sector cyhoeddus wedi gwneud o ran cyrraedd ei dargedau ar gyfer cydraddoldeb anabledd

Flwyddyn ar ôl cyhoeddi'r cynllun, mae angen llunio adroddiad blynyddol. Dylai hwn gynnwys crynodeb o'r camau a gymerwyd gan y sefydliad i gyflawni'r ddyletswydd, canlyniadau'r ymarfer casglu gwybodaeth, a sut y defnyddiwyd y wybodaeth.

Cael gwybod mwy am y Ddyletswydd Cydraddoldeb Anabledd

Y Comisiwn Cydraddoldeb a Hawliau Dynol sy'n gyfrifol am orfodi'r Ddyletswydd Cydraddoldeb i Bobl Anabl, a gallant gymryd camau cyfreithiol yn erbyn sefydliadau'r sector cyhoeddus os nad ydynt wedi gwneud yr hyn sy'n ofynnol.

Gallwch ganfod gwybodaeth am ddull gorfodi'r Comisiwn Cydraddoldeb a Hawliau Dynol, a'r effaith y mae'r ddyletswydd eisoes yn ei chael, ar eu gwefan. Ceir hefyd wefan arbennig sy'n cynnwys dogfennau cyfarwyddyd mewn amrywiol ffurfiau.

Y Comisiwn Hawliau Anabledd oedd yn gyfrifol am orfodi'r Ddyletswydd Cydraddoldeb i Bobl Anabl nes iddo gau ar 28 Medi 2007.

• Disability Equality Duty website (yn agor ffenestr newydd)
• Gwefan y Comisiwn Cydraddoldeb a Hawliau Dynol (yn agor ffenestr newydd)