Gwefan llywodraeth y DU

Helpu'ch plant â'u gwaith cartref

Bydd gwella'ch sgiliau darllen, ysgrifennu a mathemateg yn eich helpu mewn sefyllfaoedd o ddydd i ddydd, ond bydd hefyd yn ei gwneud yn haws i chi helpu'ch plant gyda'u gwaith cartref, ac yn gwneud i chi deimlo'n dda amdanoch eich hun.

Mae cynghorwyr nextstep eisoes wedi helpu miloedd o bobl i ddysgu eto – dwy enghraifft yn unig yw'r straeon isod.

• Dod o hyd i'ch swyddfa nextstep agosaf Opens new window

Stori Irena – Creu bywyd gwell

Bum mlynedd yn ôl, doedd gan Irena, sy'n 31 oed, ddim swydd na lle i fyw. Heddiw, mae ganddi swydd llawn amser fel Cynorthwy-ydd Personol mewn cwmni cyfreithiol ac mae'n berchen ar ei chartref ei hun.

'Roeddwn i'n sownd mewn rhigol a doeddwn i byth yn gallu setlo ar unrhyw beth o gwbl. Yna fe ddes ar draws nextstep ar y rhyngrwyd, a gwneud apwyntiad. Rhoddodd fy nghynghorydd lwyth o gyngor ymarferol i mi ar gyllidebu a sut i feddwl o ddifri am beth oeddwn i ei eisiau mewn bywyd. Gyda'i help hi, fe ddysgais sut i ysgrifennu CV, llenwi ffurflenni cais am swyddi a chanolbwyntio ar beth roeddwn i eisiau ei wneud.

Roeddwn i wedi mwynhau defnyddio cyfrifiaduron erioed, felly awgrymodd fy nghynghorydd y dylwn ymuno â chwrs mewn coleg lleol er mwyn gwella fy sgiliau Technoleg Gwybodaeth. Ar ôl hynny, cynigiwyd swydd dros dro i mi mewn cwmni cyfreithwyr prysur. Roeddwn i'n mwynhau'r gwaith ac ar ôl ychydig fisoedd fe gynigion nhw swydd barhaol i mi. Dair mlynedd yn ddiweddarach, roeddwn i wedi cynilo digon o arian i allu rhoi blaendal ar fy fflat.

'Roedd y cynghorydd nextstep yn rhyfeddol o amyneddgar bob amser, ac fe wnaeth hi wahaniaeth aruthrol. Rwy'n aml yn meddwl beth fyddai wedi digwydd pe na bawn i wedi mynd at nextstep.'

Stori Darnell - Achub y blaen

Doedd Darnell, sy'n 26 oed, byth yn aros mewn swyddi gwerthu am fwy nag ychydig fisoedd. Ond bellach mae ganddo swydd barhaol, sgwter newydd ac ychydig o gynilion.

'Fe ddes i ar draws nextstep pan oeddwn i'n mynd am dro yn ystod fy awr ginio. Meddyliais nad oedd gen i unrhyw beth i'w golli o fynd i mewn. Roeddwn i wedi syrffedu ar sefyllian o gwmpas mewn siopau. Roedd y cynghorydd nextstep yn frwd ei chefnogaeth, ac fe awgrymodd y dylwn wneud cais am swydd barhaol.

'Fe ddywedais wrthi nad oeddwn i'n gweld sut y gallai gwella fy mathemateg a'm Saesneg wneud unrhyw wahaniaeth, er mai dyna'r oedd hi wedi ei awgrymu. Ond roeddwn i'n anghywir! Rydw i'n fwy hyderus, a gallaf wneud cais am swyddi gwell na'r rhai oedd gen i yn y gorffennol. Rydw i bellach yn gweithio yn yr Adran Gwerthiant - fyddwn i erioed wedi breuddwydio am weithio yno cyn hyn - ac rwy'n ei fwynhau'n fawr iawn. Mae swydd barhaol wedi rhoi annibyniaeth i mi, ac mae'n gadael i mi gynllunio at y dyfodol.'

Stori Charlie - Magu hyder

Roedd Charlie, sy'n 21, wrth ei fodd gyda chwaraeon erioed, ond fe adawodd yr ysgol pan oedd yn 16 gyda thri chymhwyster TGAU.

'Pan roeddwn i'n yr ysgol, roedd y cynghorydd gyrfaoedd yn dweud y dylwn wneud rhywbeth fel plastro neu osod brics. Roeddwn i eisiau gwneud rhywbeth i'w wneud â chwaraeon, ond doedd gen i ddim syniad a oedd hynny'n bosib, neu hyd yn oed sut i gael mwy o wybodaeth.

'Dywedodd mam un o'm ffrindiau y dylwn fynd at nextstep i gael rhywfaint o gyngor. Helpodd fy nghynghorydd nextstep fi i edrych ar nifer o wahanol opsiynau. Dywedodd hi wrtha i y gallwn gael cymhwyster mewn dysgu chwaraeon pe bawn i'n mynd i'r coleg.

‘Tra'r oeddwn i yn y coleg, fe ddywedon nhw wrtha i fy mod yn dioddef o ddyslecsia. Fe ges i help wrth ddatblygu ffyrdd o ddygymod â dyslecsia - a gwnaeth hynny wahaniaeth mawr hefyd.

'Roedd ymweld â nextstep yn dro ar fyd oherwydd bod y cynghorydd wedi rhoi hyder i mi anelu at y swydd roeddwn i eisiau ei gwneud. Yn y gorffennol, roeddwn i wastad wedi teimlo mai fi ddylai newid i addasu i'r swydd, ond dangosodd y cynghorydd i mi mai fel arall yr oedd hi: gallwn ddod o hyd i swydd addas i'r sgiliau sydd gennyf.'

• Mynd yn ôl i brif dudalen nextstep

Mwy o ddolenni defnyddiol

• Dysgu (adran dros 50)
• Datblygu a dysgu cyn oed ysgol (adran rhieni)
• Hawliau gwaith ac arian (adran rhieni)