Gwefan llywodraeth y DU

Gyda beth y gall y Gronfa Mynediad at Ddysgu eich helpu?

Gall y Gronfa Mynediad at Ddysgu ddarparu cymorth ychwanegol os ydych mewn caledi ariannol a bod angen cymorth ariannol ychwanegol arnoch.

Bydd eich prifysgol neu'ch coleg yn edrych ar eich sefyllfa bersonol chi, ond gallech, er enghraifft, gael cymorth:

• ar gyfer costau sy'n gysylltiedig â'ch cwrs neu gostau byw nad yw grantiau eraill yn talu amdanynt yn barod - gallai'r rhain gynnwys, er enghraifft, costau byw o ddydd i ddydd, costau gofal plant neu gymorth dros wyliau'r haf os nad oes gennych neb arall i droi atynt
• ar gyfer taliadau mewn argyfwng i dalu am gostau ariannol annisgwyl neu eithriadau - er mwyn atgyweirio offer yn y cartref er enghraifft
• os ydych chi'n ystyried rhoi'r gorau i'ch cwrs oherwydd trafferthion ariannol a bod angen cymorth ariannol arnoch i ddal ati i astudio

Pwy gaiff wneud cais?

Cymorth i fyfyrwyr ar gyrsiau amser llawn, rhan-amser ac ôl-radd

Mae'r Gronfa Mynediad at Ddysgu ar gael:

• i fyfyrwyr addysg uwch amser llawn
• i fyfyrwyr amser llawn ôl-radd

Gall myfyrwyr rhan-amser ar gyrsiau gradd neu ôl-radd hefyd fod yn gymwys, cyn belled â bod eu cwrs:

• yn para blwyddyn o leiaf, ac
• nad yw'n cymryd mwy na dwywaith yn hirach i'w gwblhau na chwrs amser llawn cyfatebol

Os oes gennych anabledd neu anhawster dysgu penodol sy'n golygu y bydd yn cymryd mwy na dwywaith yn hirach i gwblhau eich cwrs nag y byddai'n ei gymryd i gwblhau cwrs amser llawn cyfatebol, efallai y bydd dal yn bosib i chi wneud cais am gymorth o'r gronfa.

Sut mae prifysgolion a cholegau yn talu drwy'r gronfa

Mae gan brifysgolion a cholegau lais cryf mewn penderfyniadau sy'n ymwneud â'r modd y telir arian o'r gronfa'n lleol. Byddant yn edrych ar eich sefyllfa bersonol chi, gan weld fel arfer a oes diffyg rhwng eich incwm a'ch costau. Ond y grwpiau canlynol sy'n cael blaenoriaeth ar gyfer cymorth:

• myfyrwyr a chanddynt blant - yn enwedig rhieni unigol
• myfyrwyr aeddfed - yn enwedig y rheini sydd ag ymrwymiadau ariannol
• myfyrwyr o deuluoedd sydd ar incwm isel
• pobl ifanc sy’n gadael gofal
• myfyrwyr sy'n ddigartref neu sy'n byw mewn 'Foyers' (mae'r rhain yn darparu llety, arweiniad a chefnogaeth i bobl ifanc ddigartref)
• myfyrwyr yn eu blwyddyn olaf
• myfyrwyr anabl

Y Gronfa Mynediad at Ddysgu a mathau eraill o gyllid myfyrwyr

Mae'r arian a delir o'r Gronfa Mynediad at Ddysgu yn ychwanegol i'r pecyn cyllid myfyrwyr sylfaenol. Ni fwriedir iddo gymryd lle'r pecyn hwnnw.

Disgwylir eich bod wedi gwneud cais am unrhyw Fenthyciadau Myfyrwyr, grantiau a bwrsarïau y mae gennych hawl iddynt cyn gwneud cais am gymorth o'r Gronfa Mynediad at Ddysgu.

Sut y gwneir taliadau o'r gronfa?

Fel arfer, telir yr arian fel grant nad oes angen i chi ei ad-dalu. Weithiau fe'i telir fel benthyciad. Bydd eich coleg neu'ch prifysgol yn penderfynu a gewch eich talu gydag un swm o arian neu drwy randaliadau.

Sut i wneud cais

Byddwch fel arfer yn gwneud cais drwy adran gwasanaethau myfyrwyr eich prifysgol neu'ch coleg. Byddant yn dweud wrthych pa wybodaeth yn union y bydd angen i chi ei rhoi, ond byddwch yn barod i ddarparu:

• copi o'r llythyr gan Student Finance Direct yn dangos faint gewch chi drwy'r pecyn cyllid myfyrwyr safonol
• dogfennau'n dangos eich sefyllfa ariannol, fel cyfriflenni banc a manylion rhent

Fel arfer byddwch yn gwneud cais wedi i chi ddechrau eich cwrs – erbyn hynny, byddwch yn gwybod faint o gyllid a gewch drwy'r pecyn cyllid myfyrwyr safonol. Ond os ydych chi'n gwybod y bydd arnoch angen cymorth ychwanegol, mae'n syniad da mynd at eich prifysgol neu'ch coleg cyn i'ch cwrs ddechrau.

Yr effaith ar fathau eraill o gymorth ariannol

Fel arfer, ni fydd unrhyw arian a gewch drwy'r Gronfa Mynediad at Ddysgu yn cyfrif fel incwm wrth gyfrifo'ch hawl i fudd-daliadau neu gredydau treth, onid ar gyfer costau byw o ddydd i ddydd y mae.

Ddim yn astudio yn Lloegr?

Dim ond os ydych chi'n astudio yn Lloegr y mae'r Gronfa Mynediad at Ddysgu ar gael. Ond efallai bod cymorth tebyg ar gael gan brifysgolion a cholegau yng Nghymru, yr Alban a Gogledd Iwerddon.

Pa fath arall o gymorth allwch chi ei gael?

I gael gwybod pa fath arall o gymorth allech chi ei gael, dilynwch y ddolen berthnasol isod.

• Cyllid ar gyfer myfyrwyr amser llawn - dechrau arni
• Cyllid ar ôl eich blwyddyn gyntaf
• Cyllid myfyrwyr: myfyrwyr rhan-amser
• Cyllid ar gyfer Hyfforddiant Cychwynnol Athrawon
• Myfyrwyr Gwaith Cymdeithasol a myfyrwyr y GIG
• Ariannu eich cwrs ôl-radd