Gwefan llywodraeth y DU

Bwrsarïau ac ysgoloriaethau: beth ydyn nhw?

Mae bwrsarïau ac ysgoloriaethau'n ffynonellau ychwanegol sy'n cynnig cymorth ariannol. Cânt eu rhoi gan golegau a phrifysgolion. Fe'u telir ar ben unrhyw Fenthyciadau Myfyrwyr neu grantiau y gallech eu cael.

Nid oes angen talu bwrsarïau ac ysgoloriaethau yn ôl.

Bwrsarïau

Y prifysgolion a'r colegau sy'n penderfynu faint sydd ar gael, ond mae'n rhaid i'r rheini sydd yn Lloegr gynnig isafswm i fyfyrwyr:

• sy'n cael y Grant Cymorth Arbennig neu'r Grant Cynhaliaeth yn llawn
• sy'n talu ffioedd dysgu dros swm penodol (£3,145 y flwyddyn yn 2008/2009 neu £3,070 yn 2007/2008)

Bydd yr isafswm yn dibynnu ar y ffioedd dysgu a godir gan y brifysgol neu'r coleg – ond ar gyfer 2007/2008, bydd yn £305 o leiaf.

Mae llawer o brifysgolion a cholegau'n cynnig cryn dipyn yn fwy na’r isafswm: yn 2007/08 roedd y bwrsari debygol i fyfyriwr yn derbyn y Grant Cynhawliaeth Llawn ar gwrs yn costi’r swm llawn £3, 070 yn £1,000.

• Defnyddio map bwrsarïau Directgov i weld beth sydd ar gael yn y man yr ydych chi'n astudio ynddo (yn agor ffenestr newydd)

Bwrsarïau: wedi dechrau yn 2006?

Mae bwrsarïau'n rhan o becyn cyllid ‘newydd’ ar gyfer myfyrwyr. Yn gyffredinol, maent ar gael i fyfyrwyr a ddechreuodd astudio ym mis Medi 2006 neu ar ôl hynny.

Ond mae rheolau cyllid 2005/2006 yn dal i fod yn berthnasol i rai myfyrwyr a ddechreuodd astudio ym mis Medi 2006 - dilynwch y ddolen isod os nad ydych yn sicr pa reolau sy'n berthnasol i chi.

Ysgoloriaethau

Mae llawer o golegau a phrifysgolion yn cynnig ysgoloriaethau hefyd. Gall yr ysgoloriaethau sydd ar gael fod yn seiliedig ar nifer o ffactorau - megis eich graddau lefel A, y pynciau y bu i chi eu hastudio, neu ble'r ydych yn byw.

Gallwch weld beth sydd ar gael ar wefan eich prifysgol neu'ch coleg, neu gan eu swyddfa cymorth myfyrwyr.

Bwrsarïau ac ysgoloriaethau: sut maen nhw'n cael eu talu

Fel arfer, byddwch yn cael taliad uniongyrchol gan eich coleg neu'ch prifysgol. Ond mae rhai'n rhoi cymorth ymarferol, fel:

• gostyngiadau ar gostau llety
• gostyngiadau ar lyfrau
• trafnidiaeth am ddim (er enghraifft, drwy ddarparu beic)

Sut i wneud cais am fwrsari neu ysgoloriaeth

Yma, cewch wybod sut i wneud cais gan eich prifysgol neu'ch coleg. Bydd rhai'n gweinyddu eu cynlluniau eu hunain, tra bydd Student Finance Direct yn delio â cheisiadau a thaliadau i eraill.

Bydd y prif gais am gyllid myfyrwyr yn gofyn i chi roi eich caniatâd i Student Finance Direct rannu manylion eich cais gyda'ch prifysgol neu'ch coleg os bydd angen. Os yw'ch prifysgol neu'ch coleg yn delio â'u cynlluniau eu hunain, bydd rhoi eich caniatâd iddynt yn eu galluogi i ddefnyddio'r wybodaeth hon i asesu faint mae gennych hawl iddo.

Os nad ydych yn rhoi eich caniatâd, bydd angen i chi roi'r wybodaeth hon yn uniongyrchol i'ch prifysgol neu'ch coleg.

• Sut i wneud cais am fwrsarïau, grantiau a Benthyciadau Myfyrwyr
• Gwneud cais am gyllid myfyrwyr - ar ôl eich blwyddyn gyntaf

Beth i’w wneud os bydd eich amgylchiadau’n newid

Os bydd eich amgylchiadau'n newid - er enghraifft, os bydd incwm eich cartref yn cynyddu neu'n gostwng - dylech gysylltu â swyddfa cymorth myfyrwyr eich prifysgol neu'ch coleg.

Cymorth ychwanegol: grantiau a dyfarniadau gan ymddiriedolaethau elusennol

Ceir nifer o ymddiriedolaethau ac elusennau sy'n rhoi cymorth ariannol i fyfyrwyr addysg uwch. Gallech gael dyfarniad gan un o'r sefydliadau hyn ar ben y pecyn cyllid myfyrwyr a ddarparir gan y llywodraeth.

Cael cyngor gan y Gwasanaeth Ymgynghorol Grantiau Addysgol (EGAS)

Gallwch gael cymorth i ddod o hyd i'r math yma o gymorth gan y Gwasanaeth Ymgynghorol Grantiau Addysgol (EGAS). Mae EGAS yn rhoi canllawiau arbenigol i fyfyrwyr ar gael arian ar gyfer addysg a hyfforddiant - yn arbennig i'r rheini sy'n dod o gefndir difreintiedig.

• EGAS: gweld a ydych yn gymwys i gael grant ar gyfer addysg (yn agor ffenestr newydd)

Cael gwybod mwy

Gallwch ddod o hyd i wybodaeth hefyd yn y rhan fwyaf o lyfrgelloedd cyhoeddus. Dyma rai cyhoeddiadau defnyddiol:

• Educational Grants Directory
• Charities Digest
• Grants Register
• Directory of Grant Making Trusts

Bydd cynghorydd myfyrwyr yn eich coleg neu'ch prifysgol yn gallu dweud mwy wrthych hefyd.

Grantiau Symudedd gan raglen Socrates-Erasmus

Fel rhan o raglen astudio Ewropeaidd Socrates-Erasmus, mae grantiau symudedd ar gael i fyfyrwyr cymwys sy'n dymuno dilyn rhan o'u cwrs addysg uwch yn un o'r 31 gwlad sy'n rhan o'r cynllun.

• Treulio rhan o'ch cwrs gradd dramor

Pa fath arall o gymorth allech chi ei gael?

I gael gwybodaeth am fathau eraill o gymorth ariannol y gallech eu cael - gan gynnwys grantiau a Benthyciadau - gweler 'Myfyrwyr amser llawn - dechrau arni'.

• Cyllid ar gyfer myfyrwyr amser llawn - dechrau arni