Gwefan llywodraeth y DU

Sut y cyfrifir eich balans

Caiff balans eich benthyciad myfyriwr ei gyfrifo'n wahanol gan ddibynnu ar ba fath o ad-dalwr ydych chi:

Gweithio fel cyflogai

Os ydych chi'n gweithio fel cyflogai ac yn talu treth ac Yswiriant Gwladol drwy'r Cynllun Talu Wrth Ennill (PAYE), bydd eich cyflogwr yn cyfrifo ac yn didynnu'r ad-daliadau benthyciad myfyriwr sy'n ddyledus ar bob cyfnod cyflog, yn seiliedig ar eich enillion am y cyfnod hwnnw.

Dim ond ar ddiwedd bob blwyddyn ariannol y caiff y Cwmni Benthyciadau Myfyrwyr wybod am eich holl ad-daliadau, ac felly mae'n bwysig cadw'ch cofnodion eich hun.

• Ad-dalu eich benthyciadau myfyrwyr trwy Dalu Wrth Ennill

Ad-dalu trwy'r drefn Hunanasesu

Os byddwch yn ad-dalu trwy'r drefn Hunanasesu, caiff y taliadau eu gwneud i Gyllid a Thollau EM.

Dim ond ar ddiwedd bob blwyddyn ariannol y caiff y Cwmni Benthyciadau Myfyrwyr wybod am eich holl ad-daliadau.

• Ad-dalu eich benthyciadau myfyrwyr trwy'r drefn Hunanasesu

Byw dramor

Os ydych yn byw dramor, byddwch yn gwneud ad-daliadau'n uniongyrchol i'r Cwmni Benthyciadau Myfyrwyr.

Unwaith iddynt dderbyn yr ad-daliadau, cânt eu credydu i'ch cyfrif, a gosodir llog ar eich cyfrif ar ddiwedd pob mis.

• Ad-dalu benthyciadau myfyrwyr pan fyddwch yn symud dramor

Pan fyddwch yn derbyn cyfriflen

Cyn i chi ddechrau ad-dalu'ch benthyciad myfyriwr, byddwch yn derbyn cyfriflen flynyddol ar gyfer y flwyddyn a ddaeth i ben ar 31 Awst. Pan fydd angen dechrau ad-dalu'ch benthyciad, anfonir cyfriflen atoch ar gyfer y cyfnod a ddaeth i ben ar 5 Ebrill.

Cyflwynir y datganiad nesaf rhwng 12 a 24 mis ar ôl y dyddiad hwnnw, yn dibynnu ar eich dull o ad-dalu a'r dyddiad y bydd Cyllid a Thollau EM yn rhoi gwybod i'r Cwmni Benthyciadau Myfyrwyr am y swm a gasglwyd.

Gwirio'ch balans

Ni chaiff unrhyw wybodaeth ynghylch ad-daliadau, balansau na chasgliadau eu pasio rhwng y Cwmni Benthyciadau Myfyrwyr a Chyllid a Thollau EM, ar wahân i pan fydd Cyllid a Thollau EM yn dweud wrth y Cwmni Benthyciadau Myfyrwyr ar ddiwedd y flwyddyn dreth faint yr ydych wedi'i dalu.

Golyga hyn y bydd adegau pan fyddwch yn dymuno cysylltu â'r Cwmni Benthyciadau Myfyrwyr neu Gyllid a Thollau EM i drafod eich balans ond na fydd y wybodaeth ar gael i chi.

Fodd bynnag, gallwch amcangyfrif eich balans rhwng cyfriflenni drwy edrych ar eich cyfriflen fwyaf diweddar a thynnu unrhyw ddidyniadau a welir ar eich slipiau cyflog a P60.

Gallwch hefyd gysylltu â'r Cwmni Benthyciadau Myfyrwyr naill ai trwy lythyr neu trwy ffonio, a gallant wneud y cyfrifiadau hyn ar eich rhan – neu gallwch wirio’ch balans ar-lein.

• Cysylltu â'r Cwmni Benthyciadau Myfyrwyr
• Sut i gysylltu â Chyllid a Thollau EM (adran arian, treth a budd-daliadau)
• Cyflwyno'ch hun i'ch cyfrif ar-lein a gwirio’ch balans Benthyciad Myfyrwyr Opens new window

Mwy o ddolenni defnyddiol

• Ffurflenni Talu Wrth Ennill: P45, P46, P60, P11D (adran arian, treth a budd-daliadau)