Gwefan llywodraeth y DU

Cymorth ychwanegol gyda'ch costau byw: ydych chi'n gymwys?

Yn gyffredinol, gallwch fod yn gymwys i gael cymorth ychwanegol gyda'ch costau byw - yn ogystal â chymorth gyda'ch ffioedd dysgu:

• os ydych wedi byw yn y ‘DU neu ei Hynysoedd’ (y DU ynghyd ag Ynysoedd y Sianel ac Ynys Manaw) am dair blynedd neu ragor; neu
• os ydych yn gymwys ar gyfer cymorth ariannol yn y DU yn sgil statws gweithiwr mudol o AEE neu'r Swistir, neu am eich bod yn blentyn i rywun sydd â statws gweithiwr o wlad Twrci

Gweler yr adran berthnasol isod i gael gwybod mwy - fodd bynnag, cofiwch fod rhai eithriadau i'r rheolau hyn. Os nad ydych yn sicr a ydych yn gymwys ai peidio, trafodwch y mater â'ch awdurdod lleol.

• Cysylltu â'ch awdurdod lleol (ceisiadau am gyllid myfyrwyr) Opens new window

Mae'r dudalen hon yn rhoi manylion cyffredinol i fyfyrwyr sy'n astudio yng Nghymru, Lloegr neu Ogledd Iwerddon. Dilynwch y ddolen isod os ydych chi'n astudio yn yr Alban.

• Asiantaeth Grantiau Myfyrwyr yr Alban (SAAS): gwybodaeth i ddinasyddion yr UE nad ydynt yn dod o'r DU Opens new window

Ydych chi wedi byw yn y DU am fwy na thair blynedd?

Yn gyffredinol, gallwch wneud cais am gymorth gyda chostau byw, yn ogystal â chyllid ar gyfer ffioedd dysgu, os yw'r canlynol yn berthnasol i chi:

• rydych chi'ch hun yn ddinesydd UE (nid yw cael rhiant sy'n ddinesydd UE yn ddigon i chi fod yn gymwys)
• rydych chi wedi byw yn y DU a'i Hynysoedd am y tair blynedd cyn i'ch cwrs ddechrau
• rydych chi'n byw yng Nghymru, Lloegr neu Ogledd Iwerddon pan mae'ch cwrs yn dechrau (sef y 1af o Fedi ar gyfer cwrs sy'n dechrau yr hydref hwn)

Os ydych chi wedi bod yn astudio yn y DU

Os ydych yn bwriadu astudio yng Nghymru, Lloegr neu Ogledd Iwerddon, efallai y byddwch yn gymwys i gael cymorth gyda chostau byw hyd yn oed os mai'ch prif fwriad dros fod yn y DU am y tair blynedd diwethaf oedd cael addysg amser llawn.

Fodd bynnag, i fod yn gymwys, mae'n ofynnol eich bod wedi 'preswylio fel arfer' yn Ardal Economaidd Ewrop a'r Swistir yn union cyn y cyfnod cymhwyso tair blynedd yn y DU a'i Hynysoedd cyn i'ch cwrs ddechrau (mae 'preswylio fel arfer' yn golygu lle rydych yn byw fel arfer).

Gweithwyr o AEE neu o'r Swistir a phlant gweithwyr o wlad Twrci

Efallai y byddwch hefyd yn gymwys i gael cymorth ariannol gyda chostau byw yn ogystal â ffioedd dysgu:

• os oes gennych statws gweithiwr mudol AEE neu'r Swistir - neu os ydych yn aelod o deulu rywun sydd â'r statws hwnnw
• os ydych yn blentyn i rywun sydd â statws gweithiwr o wlad Twrci

Dilynwch y ddolen ar waelod y dudalen i fynd yn ôl i ‘Ydych chi'n fyfyriwr o'r UE ac yn gymwys i gael cyllid?’ er mwyn cael gwell syniad a yw hyn yn berthnasol i chi ai peidio

Beth nesaf?

Os ydych chi'n gymwys i gael cymorth gyda'ch costau byw

Os ydych chi'n bodloni un set o'r meini prawf uchod ac yn gymwys i gael cymorth gyda'ch costau byw yn ogystal â'ch ffioedd, bydd gennych hawl i'r un lefel o gyllid â myfyrwyr sydd fel arfer yn byw yng Nghymru, Lloegr neu Ogledd Iwerddon.

Am fwy o wybodaeth am y pecynnau cymorth ariannol, gweler 'Cyllid myfyrwyr: faint allech chi ei gael' (ar gyfer astudio yn Lloegr), neu'r gwefannau isod os ydych chi'n astudio yng Nghymru neu yng Ngogledd Iwerddon.

• Cyllid myfyrwyr: faint allech chi ei gael
• Student Finance Northern Ireland Opens new window
• Cyllid Myfyrwyr Cymru Opens new window

Os nad ydych chi'n gymwys i gael cymorth gyda'ch costau byw

Os nad ydych yn bodloni un set o'r meini prawf uchod, gallwch gael cymorth ariannol ar gyfer eich ffioedd dysgu o hyd. Ewch yn ôl i'r dudalen 'Ydych chi'n fyfyriwr o'r Undeb Ewropeaidd ac yn gymwys i gael cyllid?' i gael gwybod mwy.

• Ydych chi'n fyfyriwr o'r Undeb Ewropeaidd ac yn gymwys i gael cyllid?