Gwefan llywodraeth y DU

Addysg uwch a rhagolygon eich gyrfa

Mae addysg uwch yn meithrin rhinweddau sy’n cael eu gwerthfawrogi gan gyflogwyr, megis sgiliau cyfathrebu a datrys problemau. Gall dilyn cwrs addysg uwch roi mantais i chi ym myd cyflogaeth – byd sy’n newid yn gyflym.

Yn gyffredinol, mae pobl sydd â chymhwyster addysg uwch yn tueddu i ennill mwy yn ystod eu hoes weithio na phobl sydd heb gymwysterau.

Mae cymhwyster addysg uwch yn angenrheidiol ar gyfer rhai gyrfaoedd – megis meddygaeth, deintyddiaeth, peirianneg siartredig a phensaernïaeth. Ar gyfer ambell broffesiwn – fel y gyfraith neu therapi lleferydd – bydd angen cymhwyster ôl-radd arnoch cyn y cewch ymarfer yn y maes.

• Manteision addysg uwch

Archwilio’ch dewisiadau

Os penderfynwch fynd ymlaen i addysg uwch mae angen i chi wneud yn siŵr eich bod yn dilyn y cwrs sy'n cyd-fynd orau â'r hyn yr ydych yn dymuno'i wneud â'ch bywyd.

Os ydych chi’n ystyried gwneud cais i brifysgol neu goleg, efallai fod nawr yn amser da i edrych eto ar eich dewisiadau gyrfa. Mae cyngor ar gael os oes angen cymorth arnoch i benderfynu.

• Cynllunio gyrfa (adran ceiswyr gwaith)
• Dod o hyd i yrfa sy'n addas i chi (adran pobl anabl)

Dewis cwrs sy’n cyd-fynd â’ch cynlluniau gyrfa

Gall mynd i addysg uwch helpu i agor drysau newydd o ran dewisiadau gyrfa, a gall dewis pa gwrs a gyrfa sy’n addas i chi fod yn broses gyffrous. Mae’n gyfle i chi edrych ar ba fath o berson ydych chi, pa fath o fywyd yr hoffech ei gael a sut y gallwch gyrraedd eich nodau yn y byd go iawn.

Ewch i 'Dod o hyd i gwrs prifysgol neu goleg’ i gael cyngor am ddewis cwrs, gan gynnwys gwybodaeth am y prawf Stamford – prawf ar-lein sy’n eich helpu i baru’ch diddordebau â chyrsiau addysg uwch.

• Dod o hyd i gwrs prifysgol neu goleg

Newid trywydd eich gyrfa drwy addysg uwch

Nid ar gyfer ‘unigolion disglair’ traddodiadol a chanddynt lawer o gymwysterau academaidd yn unig y mae addysg uwch.

Beth bynnag yr ydych wedi bod yn ei wneud yn ystod eich oes waith, gallai cwrs addysg uwch roi’r sgiliau a’r gydnabyddiaeth y mae eu hangen arnoch i ddechrau gyrfa newydd a fydd yn rhoi cryn foddhad i chi.

Ac efallai y gallwch ddilyn cwrs addysg uwch hyd yn oed os nad oes gennych lawer o gymwysterau ffurfiol. Gall Prifysgolion a cholegau ystyried eich profiad gwaith os byddwch yn gwneud cais i ddilyn cwrs Mynediad, cwrs sylfaen neu flwyddyn sylfaen.

• Dychwelyd i ddysgu
• Llwybrau i'r brifysgol ac addysg uwch
• Newid eich gyrfa (adran ceiswyr gwaith)

Cael gwybod mwy am yrfaoedd i raddedigion

Os ydych chi wedi penderfynu ar gwrs addysg uwch penodol, neu'n meddwl am ddilyn un:

• edrychwch ar y farchnad swyddi i raddedigion yn y maes hwnnw
• ceisiwch gael gwybod am gyflogau swyddi penodol

• Bywyd a gwaith ar ôl graddio