Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Rhieni

Gweithwyr

Gweithwyr llaw - gweithio'n ddiogel

Mae llawer o beryglon y gallech ddod ar eu traws wrth wneud gwaith llaw. Yn yr erthygl hon, edrychir ar y peryglon mwyaf cyffredin, sut mae lleihau'r risg o anaf yn y gwaith a beth yw cyfrifoldebau eich cyflogwyr.

Anhwylderau ar y cyhyrau a'r esgyrn

Anhwylderau ar y cyhyrau a'r esgyrn yw'r math mwyaf cyffredin o afiechyd cysylltiedig â'r gwaith yn y DU, ac mae'r rhain yn cynnwys problemau fel poen yn rhan isa'r cefn, anafiadau i gymalau ac anafiadau straen ailadroddus. Mae'n bosib osgoi'r rhan fwyaf o anhwylderau fel hyn trwy wybod beth sy'n eu hachosi a sut mae gwarchod eich hun.

Beth sy'n achosi anhwylderau ar y cymalau a'r esgyrn?

Dyma rai o'r pethau sy'n eu hachosi

  • codi ailadroddus a chodi pethau trwm
  • plygu a thwistio, neu ailadrodd yr un symudiad yn rhy aml
  • gweithio mewn safle lletchwith neu anghyfforddus
  • defnyddio gormod o rym
  • gweithio'n rhy hir heb egwyl
  • gweithio dan amgylchiadau eithafol (ee rhy boeth neu rhy oer)
  • defnyddio offer diffygiol, rhai sydd wedi treulio neu'r offer anghywir ar gyfer y gwaith.
  • peidio â delio â symptomau'n ddigon buan

Sut mae atal anafiadau fel hyn?

Yn bwysicach na dim, rhaid i chi sicrhau eich bod wedi cael yr hyfforddiant priodol ar gyfer

  • defnyddio offer a chyfarpar yn ddiogel
  • trin llwythi trwm neu letchwith

Dylech hefyd sicrhau eich bod

  • yn cael hoe'n rheolaidd
  • yn amrywio'ch gwaith er mwyn osgoi ailadrodd tasgau

Os ydych chi'n meddwl eich bod yn dioddef o anhwylder ar y cyhyrau neu'r esgyrn, cofiwch

  • hysbysu eich cyflogwyr am y symptomau hyn cyn gynted ag y byddant yn ymddangos
  • cael y driniaeth iawn
  • cael digon o amser i wella'n iawn

Problemau cyffredin eraill

Gall problemau eraill godi yn y gwaith, gan gynnwys

Llithro a baglu

Mae 30 y cant o'r holl anafiadau mwyaf a gofnodir bob blwyddyn yn digwydd oherwydd llithro a baglu.

Disgyn o uchder

Mae disgyn o uchder yn berygl ym mhob sector o ddiwydiant.

Dirgryniad

Gall dirgryniad beri effeithiau hirdymor ar iechyd os na fydd rhywun yn delio â'r peth yn iawn.

Sun

Gall sun yn y gwaith beri difrod parhaol i'ch clyw.

Pethau i fod yn ymwybodol ohonynt wrth godi a chludo

Gall codi a chludo achosi poen yn y cefn. Cyn codi neu gludo llwyth, dylech ystyried yn gyntaf a oes angen symud y llwyth o gwbl - mae'n bosib y gallwch chi wneud eich tasg gyda'r llwyth yn y fan a'r lle.

Os oes rhaid i chi ei symud, meddyliwch a allwch chi ddefnyddio peiriant i'ch helpu. Os nad oes modd gwneud hyn, mae sawl ffordd o leihau'r risgiau, gan gynnwys.

  • gwneud y llwyth yn llai neu'n haws ei godi
  • newid y ffordd y trefnir y gwaith fel nad oes rhaid cario'r llwyth mor bell, a lleihau faint o dwistio neu godi sy'n angenrheidiol
  • gofyn i'ch cyflogwyr newid eich llecyn gweithio (ee gwell golau, llawr mwy gwastad, neu wella'r tymheredd)
  • gwneud yn siur bod gennych yr hyfforddiant iawn i godi llwyth yn ddiogel

Cyfrifoldebau eich cyflogwyr

Mae'r Rheoliadau Gwaith Trin a Chodi â Llaw yn dweud bod rhaid i'ch cyflogwyr

  • asesu unrhyw waith trin a chodi â llaw peryglus nad oes modd ei osgoi
  • osgoi gwaith trin a chodi â llaw peryglus os oes modd
  • lleihau'r risg o anafiadau drwy drefnu ffordd arall o wneud y dasg

Beth i'w wneud ynghylch poen cefn

Os mai eich gwaith sy'n achosi'ch poen cefn, neu os yw'ch gwaith yn ei gwaethygu, mynnwch sgwrs â'ch cyflogwyr gyntaf. Os oes gennych gynrychiolydd yn y gwaith (ee swyddog undeb llafur) neu gynrychiolydd diogelwch, mae'n bosib y gallan nhw fod o help. Os nad yw hyn yn helpu, mae cyngor cyfrinachol ar gael gan Linell Wybodaeth yr Awdurdod Gweithredol Iechyd a Diogelwch ar 0845 345 0055 (ar agor 8.00 am - 6.00 pm, o ddydd Llun i ddydd Gwener).

Help ychwanegol os ydych chi'n anabl

Os ydych chi'n anabl, mae'n bosib y bydd angen mwy o help arnoch i wneud gwaith llaw. Gall eich cyflogwyr gael sgwrs gyda 'Chynghorydd Mynediad at Waith' drwy'ch Canolfan Gwaith leol a fydd o bosib yn gallu helpu i dalu am unrhyw newid sydd ei angen (ee darparu offer codi).

Beth i'w wneud nesaf

I leihau'r risgiau pan fyddwch yn gwneud gwaith llaw

  • holwch a yw eich cyflogwyr wedi cynnal asesiad risg
  • dilynwch yr argymhellion am weithio'n ddiogel i weithwyr llaw a gofynnwch i'ch cyflogwyr drefnu hyfforddiant os oes angen
  • soniwch wrth eich cyflogwyr am unrhyw broblemau

Ble i gael cymorth

Gall y Gwasanaeth Cyngor ar Bopeth (CAB) hefyd gynnig cyngor diduedd am ddim. Gallwch ddod o hyd i'ch swyddfa CAB leol yn y llyfr ffôn neu ar-lein.

Mwy o ddolenni defnyddiol

Yn yr adran hon...

Additional links

Allweddumynediad llywodraeth y DU