Gwefan llywodraeth y DU

Chwilio am swydd

Gallwch chwilio drwy 400,000 a mwy o swyddi gwag y Ganolfan Byd Gwaith ar-lein. Drwy'r gwasanaeth chwilio am swyddi a sgiliau gallwch chwilio am swyddi, hyfforddiant, gwybodaeth am yrfa, gwaith gwirfoddol a darparwyr gofal plant ledled y DU.

• Dod o hyd i swydd yn awr

Ceir llawer o sefyllfaoedd lle gallwch fod yn chwilio am waith, ac mae gan bawb wahanol anghenion, sgiliau a chyfrifoldebau. Ceir llawer o wahanol fathau o swyddi, ac mae amrywiaeth o gymorth ar gael.

Unig rieni

Newidiadau pwysig i fudd-daliadau i unig rieni

Ar 24 Tachwedd 2008 cyflwynwyd newidiadau i Gymhorthdal Incwm ar gyfer rhai unig rieni.

Golyga'r newidiadau hyn y gallai eich hawl i Gymhorthdal Incwm ddod i ben pan mae'ch plentyn ieuengaf yn cyrraedd 12 oed os dim ond am eich bod yn rhiant unigol yr ydych yn ei hawlio.

Yn hytrach na hynny, gyda chymorth y Ganolfan Byd Gwaith, bydd yn rhaid i chi wneud hawliad am fudd-dal arall ac os yw'r gallu gennych fe'ch anogir i chwilio am waith cyflogedig.

Mae hwn yn un o amryw o newidiadau i'r system fudd-daliadau i helpu pobl i gael y sgiliau ar gyfer gwaith ac i ddechrau gweithio mewn swydd â thâl.

Digwyddiadau Opsiynau a Dewisiadau

Mae cynghorwyr personol y Ganolfan Byd Gwaith yn cynnal digwyddiadau Opsiynau a Dewisiadau. Mae hon yn ffordd wych o gwrdd â chyflogwyr lleol a chael gwybod beth allant ei gynnig, pa sgiliau y mae eu hangen arnynt a sut mae ffitio eich oriau o amgylch eich teulu. Mae digwyddiadau Opsiynau a Dewisiadau yn rhoi'r wybodaeth y mae ei hangen arnoch i wneud y dewisiadau cywir ar gyfer eich dyfodol chi a'ch plant. Mae'n syniad da galw heibio, hyd yn oed os nad ydych yn barod i ddechrau gweithio ar unwaith - er mwyn i chi allu cynllunio eich dyfodol. Cysylltwch â'r Ganolfan Byd Gwaith i gael gwybod mwy.

• Newidiadau i Gymhorthdal Incwm ar gyfer unig rieni (adran arian, treth a budd-daliadau)

• Cysylltu â'ch Canolfan Byd Gwaith leol Opens new window

Pobl anabl, pobl â phroblemau gyda'r galon a gofalwyr

Os oes gennych anabledd neu gyflwr iechyd, os ydych wedi cael anaf difrifol neu'n gofalu am rywun, mae cymorth ar gael i chi. Mae cymorth a chyngor ar gael os nad ydych yn gallu gweithio, os ydych yn chwilio am waith neu'n meddwl ei bod yn bosib y byddwch yn chwilio am waith yn y dyfodol.

• Pobl anabl a chyflogaeth (adran pobl anabl)

• Gofalu am rywun a gweithio (adran gofalu am rywun)

Yn gadael yr ysgol neu’r coleg

Gall symud o'r ysgol, o'r coleg neu'r brifysgol i fyd gwaith fod yn gam mawr. Hyd yn oed os oes gennych syniad da am ben draw'r daith, nid yw'r ffordd orau o gyrraedd yno bob amser yn glir. Ond mae llawer o gyfleoedd a help ar gael, gan gynnwys cael y profiad angenrheidiol a'r cymorth ariannol ar gyfer hyfforddi.

• Gwaith a gyrfaoedd (adran pobl ifanc)

Dros 50

Os ydych chi'n ddi-waith, gall gymryd amser i ddod o hyd i swydd arall, waeth faint yw eich oed. Fodd bynnag, mae rhaglenni, adnoddau a gwybodaeth arbenigol ar gael i bobl dros 50 i'ch helpu i ddod o hyd i waith neu ddysgu sgiliau newydd.

• Chwilio am waith (adran dros 50)

Yn ddi-waith

Beth bynnag y bo'ch amgylchiadau, os ydych chi'n chwilio am swydd neu'n meddwl tybed sut y gallech chi wella'ch siawns o gael y gwaith rydych chi'n awyddus i'w gael, mae cyngor a chymorth ar gael.

• Canfod eich ffordd yn ôl i'r gwaith gyda Directgov a'r Ganolfan Byd Gwaith

Gwaith sy'n addas i'ch anghenion chi

Os na allwch neu os nad ydych am weithio amser llawn, ceir dewisiadau eraill. Dyma rai esiamplau:

• gwaith dros dro - gallech weithio mewn swydd am gyfnod penodol, fel arfer fel rhan o brosiect penodol neu i lenwi rôl aelod parhaol o staff
• gwaith rhan-amser - ffordd dda o ffitio eich gwaith o amgylch cyfrifoldebau eraill a chael arian a phrofiad
• gweithio hyblyg - weithiau bydd cyflogwyr yn cytuno ar drefniadau gweithio hyblyg - gallai hyn olygu dewis yr amser y byddwch yn dechrau ac yn gorffen gweithio, neu weithio mwy o oriau ar rai diwrnodau fel y gallwch gymryd mwy o amser i ffwrdd
• gweitho yn ystod y tymor - gallai cael amser i ffwrdd yn ystod gwyliau'r ysgol fod yn ddelfrydol os oes gennych blant a'u bod yn yr ysgol
• gweithio yn ystod y gwyliau - dewis ymarferol os ydych yn dal i astudio
• rhannu swydd - weithiau gall dau unigolyn rannu un swydd amser llawn - chwiliwch am swyddi a gaiff eu hysbysebu fel swyddi i'w rhannu, neu os ydych am rannu swydd gyda rhywun rydych yn ei adnabod, gallech bob amser gynnig y syniad i'ch cyflogwr
• hunan-gyflogaeth - mae gweithio i chi eich hun yn cynnig hyblygrwydd a'r math o her sy'n apelio at rai pobl, ond bydd yn rhaid i chi gael mwy o gyfrifoldeb - er enghraifft, drwy dalu eich treth incwm eich hun
• gwaith gwirfoddol - mae gweithio heb gyflog yn un ffordd o gael profiad gwaith a chael dysgu mwy am faes sydd o ddiddordeb i chi

Opsiynau eraill

Os ydych yn ddi-waith, gall hyfforddiant neu addysg bellach fod yn gam gwerthfawr at gyflawni nod hirdymor. Nid ar gyfer pobl sy'n gadael yr ysgol yn unig y mae hyfforddiant. Ceir bob amser gyfle i ddatblygu gyrfa, dysgu crefft, neu weithio tuag at gymhwyster proffesiynol drwy hyfforddiant.

• Hyfforddiant a dysgu ar gyfer gwaith (addysg a dysgu)

Gall cynghorydd personol y Ganolfan Byd Gwaith roi cyngor i chi sy'n seiliedig ar eich amgylchiadau personol, a gall eich helpu i sicrhau eich bod yn cael y gefnogaeth y mae gennych hawl i'w chael. Efallai y bydd eich cynghorydd yn gofyn i chi gymryd rhan mewn cyfweliad er mwyn penderfynu ar y ffordd orau o ddefnyddio eich sgiliau a'ch profiad. Gallwch holi hefyd a ydych chi'n gymwys i gael cymorth ariannol tra'r ydych yn chwilio am waith.

• Cysylltu â'ch Canolfan Byd Gwaith leol Opens new window

Mwy o gysylltiadau defnyddiol

• Budd-daliadau a help wrth chwilio am waith (adran arian, treth a budd-daliadau)

• Lwfans Ceisio Gwaith (adran arian, treth a budd-daliadau)