Gwefan llywodraeth y DU

Y Fargen Newydd 25 oed a throsodd

Bydd y Fargen Newydd 25 oed a throsodd yn eich helpu i ddod o hyd i swydd a’i chadw neu weithio i chi eich hun. Bydd yn eich helpu i wella’r sgiliau sydd gennych ac i ddysgu sgiliau newydd. Tra byddwch ar y Fargen Newydd 25 oed a throsodd byddwch yn cael help a chefnogaeth gan eich ymgynghorydd personol. Bydd yn eich helpu i edrych ar yr hyn y gallwch ei wneud, ac i adeiladu ar y sgiliau sydd gennych.

Os ydych yn hawlio Lwfans Ceisio Gwaith, a’ch bod yn 25 oed neu drosodd ac o dan oedran Pensiwn y Wladwriaeth, mae’n rhaid i chi gymryd rhan yn y Fargen Newydd 25 oed a throsodd er mwyn parhau i gael rhywfaint o’ch budd-daliadau.

Ymgynghorydd personol Y Fargen Newydd 25 oed a throsodd

Pan rydych yn ymuno a’r Fargen Newydd byddwch yn cael ymgynghorydd personol y Ganolfan Byd Gwaith a fydd yn eich helpu drwy bob cam. Byddant yn edrych ar sut rydych yn ymdopi ac yn eich helpu i gynllunio beth i’w wneud nesaf. Gallai hyn fod wyneb i wyneb neu dros y ffôn.

Dylech siarad â’ch ymgynghorydd personol os nad ydych yn siŵr o unrhyw beth neu os oes gennych gwestiwn.

Camau'r Fargen Newydd Pobl 25 oed a throsodd

Y cam cyntaf o’r Fargen Newydd Pobl 25 oed a throsodd

Gelwir cam cyntaf y Fargen Newydd 25 oed a throsodd y ‘porth’. Bydd yn para am hyd at 16 wythnos. Bydd eich ymgynghorydd personol yn eich helpu i chwilio am waith. Byddant yn eich helpu i:

• gweithio allan y camau y gallwch eu cymryd tuag at ddod o hyd i swydd, a nodi’r rhain yn eich cynllun gweithredu personol
• weithio allan pa swyddi y gallwch wneud cais amdanynt
• llenwi ffurflenni cais ac ysgrifennu CV
• cael cyngor am yrfaoedd
• dod o hyd i gymorth arall os bydd angen arnoch
• talu am rai o’ch costau, megis costau bws neu gostau trên – dylech siarad â’ch ymgynghorydd personol am fwy o wybodaeth am gostau

Yr ail gam o’r Fargen Newydd ar gyfer Pobl 25 oed a throsodd

Os na fyddwch yn dod o hyd i swydd yn ystod cam cyntaf y Fargen Newydd 25 oed a throsodd, byddwch yn ymuno â’r ail gam. Gelwir hwn yn ‘cyfnod gweithgaredd dwys’. Bydd yn para am o leiaf 13 wythnos.

Bydd eich ymgynghorydd personol yn gweithio gyda chi i benderfynu beth y byddwch yn ei wneud yn ystod y cam hwn. Gallech roi cynnig ar weithio mewn swydd, neu gallech wneud rhyw fath o hyfforddiant. Gallech hefyd gael help i weithio i chi eich hun. Bydd eich ymgynghorydd personol yn eich helpu i chwilio am swydd fel y gallwch ddechrau gweithio cyn gynted â phosibl.

Os ydych rhwng 25 a 59 oed, mae’n rhaid i chi gwblhau’r ail gam. Os ydych yn 60 oed neu drosodd, gallwch hefyd ddewis i gymryd rhan.

Gwneud y gorau o’ch cyfnod gweithgaredd dwys

Bydd yr hyn rydych yn ei ddewis i’w wneud ar gyfer eich cyfnod gweithgaredd dwys yn eich helpu i gael mwy o sgiliau ac felly bydd yn cynyddu eich siawns o ddod o hyd i waith. Bydd eich ymgynghorydd personol yn eich helpu i ddewis beth i’w wneud. Os na allwch ddewis, bydd eich ymgynghorydd personol yn dewis ar eich rhan ac yn eich hysbysu o’u penderfyniad mewn llythyr.

Tua diwedd y cyfnod gweithgaredd dwys, byddwch yn cael cyfarfod gyda’ch ymgynghorydd personol i benderfynu pa gymorth ychwanegol y gallwch ei gael i ddod o hyd i waith. Gallai hyn fod mwy o gymorth llawn amser neu gyfnod gweithgaredd dwys pellach.

Lwfans y Fargen Newydd

Pan fyddwch ar eich cyfnod gweithgaredd dwys, gallech gael Lwfans y Fargen Newydd. Mae hwn yr un swm â’ch Lwfans Ceisio Gwaith. Byddwch hefyd yn cael taliad wythnosol ychwanegol.

Ni fydd Lwfans y Fargen Newydd yn effeithio ar fudd-daliadau eraill (megis Budd-dal Tai, Budd-dal Treth Cyngor a help tuag at gostau GIG) yr oeddech yn eu cael cyn dechrau eich cyfnod gweithgaredd dwys.

Y cam olaf o’r Fargen Newydd ar gyfer Pobl 25 oed a throsodd

Os nad ydych yn cael swydd pan fyddwch wedi cwblhau eich cyfnod gweithgaredd dwys, bydd angen i chi wneud cais newydd am Lwfans Ceisio Gwaith. Yn ystod y cam hwn, byddwch yn ymuno â rhaglen a elwir yn ‘dilyniant’ a all bara rhwng 6 a 13 wythnos. Yn ystod y cyfnod hwn bydd eich ymgynghorydd personol yn eich helpu i geisio dod o hyd i swydd. Efallai y bydd rhaid i chi wneud cyrsiau byr er mwyn rhoi rhagor o sgiliau i chi.

Gwneud i waith dalu

Un o amcanion Y Fargen Newydd 25 oed a throsodd yw gwneud yn siw r eich bod yn well eich byd mewn gwaith nag y byddech yn cael budd-daliadau. Bydd eich ymgynghorydd personol yn eich helpu i ganfod pa gyflog sydd ei angen arnoch mewn swydd er mwyn i chi beidio â cholli allan.

Sut y bydd gwaith yn effeithio ar fy mudd-dal

Os cewch waith drwy’r Fargen Newydd ar gyfer Pobl 25 oed a throsodd, gallwch gael rhywfaint o fudd-daliadau o hyd. Gall eich ymgynghorydd personol ddweud wrthych ba fudd-daliadau y gallech eu cael.

Mentor Y Fargen Newydd 25 oed a throsodd

Fel rhan o’r Fargen Newydd ar gyfer Pobl 25 oed a throsodd, gallech gael mentor i roi help a chyngor ychwanegol i chi. Byddant yn eich helpu i ddod o hyd i swydd a’i chadw drwy wrando ar yr hyn sydd ei angen arnoch a’ch helpu i benderfynu beth ddylech ei wneud. Rhywun lleol fydd eich mentor. Gofynnwch i’ch ymgynghorydd personol os hoffech gael mentor.

Rhagor o wybodaeth am Y Fargen Newydd 25 oed a throsodd

I gael rhagor o wybodaeth am Y Fargen Newydd 25 oed a throsodd cysylltwch â’ch swyddfa Canolfan Byd Gwaith leol.

• Dod o hyd i'ch swyddfa Canolfan Byd Gwaith leol Opens new window