Gwefan llywodraeth y DU

Cyfyngiadau ar asiantaethau

Os ydych yn weithiwr asiantaeth sy'n defnyddio asiantaeth, ni chaiff eich asiantaeth wneud y canlynol:

• newid eich amodau cyflogaeth gyda nhw heb eich caniatâd
• peidio â thalu eich cyflog gan eich bod wedi methu darparu amserlen wedi'i llofnodi (fodd bynnag, gall yr asiantaeth cyflogaeth sicrhau eich bod wedi gweithio mewn gwirionedd)
• eich cosbi am ddod ag aseiniad i ben (nid yw hyn yn berthnasol os nad ydych wedi'ch cyflogi dan gontract cyflogaeth)
• eich rhwystro rhag derbyn swydd barhaol gyda chwmni lle buoch chi'n gwneud gwaith dros dro iddo (er mewn rhai amgylchiadau, gall yr asiantaeth ofyn am ffi gan y cwmni cyflogi)
• eich rhwystro rhag cofrestru gydag asiantaethau eraill (mae hyn hefyd yn berthnasol i geiswyr gwaith)
• datgelu gwybodaeth amdanoch i unrhyw drydydd parti (ac eithrio at ddibenion cyfreithiol neu i unrhyw gorff proffesiynol yr ydych yn aelod ohono) neu i gyflogwr presennol heb eich caniatâd (mae hyn hefyd yn berthnasol i geiswyr gwaith)
• mynd i gytundeb gyda chwmni cyflogi ar eich rhan neu eich cofrestru ar gyfer contract ar ran cwmni cyflogi (mae hyn hefyd yn berthnasol i geiswyr gwaith)
• gwneud y broses o ddod o hyd i swydd i chi'n amodol ar p'un ai a ydych yn defnyddio gwasanaethau eraill y mae gan yr asiantaeth hawl i godi ffi am ddod o hyd i waith i chi ai peidio (darllenwch fwy am hyn isod)
• eich anfon at gwmni cyflogi i wneud gwaith a wneir fel arfer gan eu gweithwyr eu hunain sy'n cymryd rhan mewn streic neu weithred ddiwydiannol arall

Ffioedd a thaliadau ar gyfer gwasanaethau a gynigir gan yr asiantaeth cyflogaeth

Ni chaiff eich asiantaeth cyflogaeth godi ffi arnoch am ddod o hyd i waith i chi, neu geisio dod o hyd i waith ond gall godi ffi arnoch am wasanaethau ychwanegol nad ydynt yn ymwneud â chwilio am waith megis ysgrifennu CV. Fodd bynnag, ni chânt eich gorfodi i ddefnyddio gwasanaethau am ffi, er enghraifft ysgrifennu CV, a gwneud hynny'n amod ar gyfer dod o hyd i waith i chi.

Os yw eich asiantaeth cyflogaeth yn darparu gwasanaethau y codir amdanynt, mae'n rhaid i chi gael manylion ysgrifenedig llawn am y gwasanaethau, gan gynnwys eich hawl i ganslo neu dynnu'n ôl o'r gwasanaethau a hyd y cyfnod rhybudd y mae'n rhaid i chi ei roi. Gallwch ganslo unrhyw daliadau a dalwyd amdanynt heb gael dirwy, gan gynnwys unrhyw wasanaethau ar gyfer llety, cludiant neu hyfforddiant. Fodd bynnag, mae'n rhaid i chi roi rhybudd ysgrifenedig o 10 diwrnod gwaith o leiaf i'r asiantaeth ganslo lle i fyw a rhybudd o bum niwrnod gwaith o leiaf ar gyfer unrhyw wasanaeth arall.

Os yw eich asiantaeth cyflogaeth yn dynodi cyfnod rhybudd hwy, yna mae'n torri'r gyfraith a dylech gwyno am yr asiantaeth. Mae hyn yr un mor berthnasol i weithwyr asiantaeth a cheiswyr gwaith sy'n defnyddio asiantaeth cyflogaeth i ddod o hyd i swydd newydd.

Gweithio dramor

Os cewch gynnig gwaith dramor yna mae'n rhaid i'ch asiantaeth sicrhau bod gan y cwmni cyflogi safle busnes yn y DU. Os nad oes ganddo, yna mae'n rhaid i'ch asiantaeth holi'r cwmni cyflogi am ddatganiad ysgrifenedig yn nodi na fydd y gwaith arfaethedig yn amharu ar eich diddordebau.

Os ydych yn chwilio am waith dramor gydag asiantaeth a'u bod wedi darparu teithio am ddim i chi gyda'r swydd, yna mae'n rhaid i'r asiantaeth hefyd dalu am eich taith yn ôl:

• pan ddaw eich swydd i ben
• os na wnaiff y swydd ddechrau
• os oes ganddynt drefniant ysgrifenedig gyda'ch cwmni cyflogi i dalu
• os yw eich cwmni cyflogi yn gwrthod talu am ffi'r daith yn ôl pan na ddylai wneud hynny

Os ydych yn derbyn swydd dramor dylech ddarllen y datganiad ysgrifenedig a ddarperir gan eich asiantaeth yn ofalus er mwyn sicrhau eich bod yn gwbl glir ynghylch telerau ac amodau'r swydd cyn i chi adael

Gweithwyr o dan 18 oed

Os ydych chi dan 18 oed mae rheolau ychwanegol i'ch amddiffyn. Mae'n rhaid i asiantaeth sicrhau eich bod wedi cael canllawiau galwedigaethol gan y gwasanaeth gyrfaoedd lleol os disgwylir i chi weithio yn ystod oriau ysgol. Os yw'r asiantaeth yn trefnu swydd oddi cartref ar eich cyfer (ee dramor) yna mae'n rhaid iddi gael caniatâd ysgrifenedig gan eich rhiant neu'ch gwarcheidwad.