Gwefan llywodraeth y DU
Nodwch fod gan y wefan hon system allweddumynediad llywodraeth y DU
Trefn llywio pennaf
dolenni i dudalennau eraill yn yr adran hon
Iechyd a lles
Rheoliadau ysmygu yn Lloegr
Ar 1 Gorffennaf 2007, daeth bron bob man cyhoeddus a man gwaith caeedig yn Lloegr yn ddi-fwg. Mae ysmygu yn y llefydd hyn yn erbyn y gyfraith.
Llefydd na chewch ysmygu ynddynt
Dan y rheoliadau newydd, mae'n anghyfreithlon ysmygu yn y llefydd hyn:
- tafarndai, bariau a chlybiau nos
- caffis a thai bwyta
- clybiau aelodau
- canolfannau siopa dan do
- swyddfeydd a ffatrïoedd
- cludiant cyhoeddus
- cerbydau gwaith a ddefnyddir gan fwy nag un person
Ni chaniateir ystafelloedd ysmygu mewn adeiladau erbyn hyn, felly mae'n rhaid i unrhyw un sydd am ysmygu fynd y tu allan.
Llefydd y cewch ysmygu ynddynt
Cewch ysmygu yn eich cartref eich hun (tŷ annedd preifat), ac eithrio mewn unrhyw ran a ddefnyddir fel man gwaith yn unig gan fwy nag un person. Am fwy o wybodaeth, gweler 'Cwestiynau am leoliadau di-fwg' uchod.
Cewch ysmygu yn eich car eich hun, cyn belled mai at ddibenion preifat y'i defnyddir yn bennaf.
Cewch ysmygu yn yr awyr agored, mewn mannau nad ydynt yn 'sylweddol gaeedig'. Fodd bynnag, mae gan rai llefydd bolisi di-fwg, fel ar blatfformau trên neu mewn stadiymau chwaraeon.
Eithriadau
Ceir rhai eithriadau penodol rhag y ddeddf ddi-fwg, ond mae amodau caeth yn gysylltiedig â hwy. Maent yn caniatáu i ystafelloedd gael eu neilltuo ar gyfer ysmygu mewn mathau arbennig o lefydd, gan gynnwys:
- ystafelloedd gwely mewn gwestai a thai aros (nid mewn ystafelloedd cysgu fodd bynnag)
- cartrefi gofal a hosbisau
- carchardai
- unedau iechyd meddwl preswyl - dim ond tan 1 Gorffennaf 2008
I gael mwy o wybodaeth am lefydd sydd wedi'u heithrio, ac am ysmygu os ydych yn cael gofal yn eich cartref eich hun neu os ydych yn gweithio mewn cartrefi pobl eraill, ewch i wefan Smokefree England.
Cosbau a dirwyon
Mae torri'r ddeddf ddi-fwg yn drosedd. Dyma'r hysbysiadau cosb benodedig a'r ddirwy fwyaf ar gyfer pob trosedd:
- ysmygu mewn adeiladau di-fwg neu gerbydau gwaith: hysbysiad cosb benodedig o £50 (wedi'i ostwng i £30 os y'i telir mewn 15 diwrnod) i'r person sy'n ysmygu, neu ddirwy o £200 ar y mwyaf os yw'r person yn cael ei erlyn ac yn cael ei ddyfarnu'n euog gan y llys
- methu ag arddangos arwyddion dim ysmygu: hysbysiad cosb benodedig o £200 (wedi'i ostwng i £150 os y'i telir mewn 15 diwrnod) i bwy bynnag sy'n rheoli'r adeilad neu'r cerbyd di-fwg, neu'r person sy'n eu defnyddio - neu ddirwy o £1,000 ar y mwyaf os y'i erlynir ac y'i dyfernir yn euog gan y llys
Mae cynghorau lleol yn gyfrifol am roi cyngor am y ddeddf ddi-fwg a gweithredu arni yn Lloegr.
Os gwelwch rywun yn ysmygu mewn ardal ddi-fwg
Gallwch ffonio 0800 587 1667 i roi gwybod am dorcyfraith posib. Bydd y wybodaeth yn cael ei throsglwyddo i gynghorau lleol er mwyn iddynt ddilyn ei thrywydd, os bydd hynny'n briodol.
Mwy o ddolenni defnyddiol
Additional links
Allweddumynediad llywodraeth y DU
