Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Iechyd a lles

Iechyd a lles

Iechyd rhywiol

Mae'n bwysig eich bod yn gofalu am eich iechyd rhywiol, ac os oes gennych chi blant, mae tystiolaeth wedi profi bod siarad â nhw am ryw a chynnal perthynas yn syniad da. Mae pobl ifanc sy'n siarad yn agored am ryw â'u rhieni yn dueddol o beidio â bod yn fyrbwyll cyn cael rhyw ac maent yn fwy tebygol o ddefnyddio dulliau atal cenhedlu pan fônt yn penderfynu gwneud hynny.

Gofalu am eich iechyd rhyw

Rhaid i ddynion a merched, ill dau, ofalu am eu hiechyd rhywiol gan gymryd munud i feddwl am faterion yn ymwneud ag atal cenhedlu a heintiadau a drosglwyddir trwy ryw (STIs).

Er enghraifft, gallech fod yn cario rhai clefydau, fel clamydia, yn ddiarwybod heb gael unrhyw symptomau. Gall yr haint effeithio ar ffrwythlondeb, felly mae'n bwysig eich bod yn manteisio ar y gwasanaethau iechyd rhywiol sydd ar gael am ddim dan y GIG.

I gael gwybod mwy, ewch i wefan NHS Choices i weld erthyglau, fideos a gwybodaeth am iechyd rhywiol. Gallwch gwblhau cwis bychan i weld a yw eich bywyd rhywiol yn peri risg i'ch iechyd, a gallwch ddod o hyd i wasanaethau a chlinigau yn eich ardal (yn Lloegr) gan gynnwys dulliau atal cenhedlu, dulliau atal cenhedlu brys a phrofion am heintiau.

Mae gwefan NHS Direct yn ateb cwestiynau cyffredin ynghylch iechyd rhywiol, am faterion sy'n amrywio o atal cenhedlu a phrofion ceg y groth, i STIs a therapi rhyw.

Gallwch hefyd siarad â'ch meddyg neu nyrs yn eich meddygfa neu glinig cynllunio teulu. Mae meddygfeydd yn cynnal sesiynau cynlluniau teulu neu glinigau ar gyfer pobl ifanc yn aml - diben y sesiynau hyn yw creu awyrgylch lle gall pobl siarad yn blaen ac yn agored am faterion yn ymwneud â rhyw a pherthynas.

Siarad am ryw gyda'ch plant

Dyma'r ffordd orau o ddechrau siarad am ryw:

  • dechrau pan fo'ch plentyn yn ifanc, eu hannog i ofyn cwestiynau, a'u hateb yn syml
  • gwnewch siarad am ryw yn rhan o fywyd bob dydd, nid sgwrs unwaith-ac-am-byth yn unig a daliwch ati i sgwrsio am y pwnc wrth iddynt fynd yn hŷn
  • ceisiwch gyflwyno'r pwnc cyn i'ch plentyn gyrraedd glasoed - gall aros tan hynny wneud y peth yn lletchwith
  • gofynnwch i'ch plentyn am eu barn am wahanol sefyllfaoedd i ganfod faint y maent yn ei wybod yn barod - gallwch wedyn roi atebion a chyngor sy'n ddealladwy iddynt
  • defnyddiwch gyfryngau bob dydd i ddechrau sgwrs (rhaglenni sebon, hysbysebion, rhaglenni teledu, cylchgronau) - wedyn gallwch siarad am bobl eraill, sy'n haws o bosib ar y cychwyn
  • defnyddiwch lyfrau, taflenni a gwefannau (gan gynnwys y rhai a restrir isod) os oes angen gwybodaeth arnoch neu syniadau am sut i ddechrau sgwrsio
  • sylweddolwch y bydd angen preifatrwydd ar eich plentyn wrth dyfu ac efallai na fydd eisiau siarad gyda chi bob amser
  • siaradwch am bwysigrwydd ystyried teimladau pobl eraill mewn perthynas, ac nid dim ond y fioleg
  • ceisiwch gadw meddwl agored a dal i siarad, hyd yn oed os bydd eu hagweddau a'u gwerthoedd yn eich dychryn
  • siaradwch â rhieni eraill ynghylch sut maen nhw'n ateb cwestiynau anodd ac yn trafod materion anodd

Gwybodaeth a chefnogaeth i rieni

Ffoniwch Parentline Plus am ddim ar 0808 800 2222 i siarad yn gyfrinachol. Mae gwasanaeth ffôn testun di-dâl ar gael hefyd ar 0800 783 6783 ar gyfer pobl gyda nam ar eu clyw neu ar eu lleferydd.

Gall fpa (y Gymdeithas Cynllunio Teulu, yn flaenorol) ddarparu gwybodaeth a chyngor. Rhif ffôn y llinell gymorth yw 0845 122 8690.

Gwybodaeth a chefnogaeth i bobl ifanc

I gael cyngor am ryw, perthnasau ac atal cenhedlu, gall pobl ifanc o dan 18 oed ffonio Sexwise ar 0800 28 29 30. Mae ffôn testun ar gael ar gyfer pobl gyda nam ar eu clyw ar 0800 328 1651. Mae'r galwadau'n gyfrinachol ac am ddim o linellau ffôn cartref.

Gall pobl ifanc ddod o hyd i fwy o wybodaeth drwy ddefnyddio'r dolenni isod.

Yn yr adran hon...

Additional links

Allweddumynediad llywodraeth y DU