Gwefan llywodraeth y DU

Cymorth i chi

Y Groes Goch Brydeinig - Gwasanaeth Cefnogi adeg Tân ac Argyfwng

Darperir y gwasanaeth cefnogi tân ac argyfwng gan wirfoddolwyr y Groes Goch Brydeinig gan ddefnyddio cerbyd arbennig sydd wedi'i addasu. Byddant yn cyrraedd safle unrhyw ddigwyddiad o fewn 90 munud ers cael eu galw ac yn darparu cymorth ymarferol a chefnogaeth emosiynol i'r rhai y mae tân wedi effeithio arnynt.

Mae cefnogaeth y gwasanaeth cefnogi adeg tân ac argyfwng yn cynnwys:

• lloches dros dro ar unwaith yng ngherbyd y gwasanaeth cefnogi adeg tân ac argyfwng
• cymorth i ddod o hyd i lety dros dro
• cymorth cyntaf a chefnogaeth emosiynol
• cyngor ar y cymorth sydd ar gael gan sefydliadau eraill
• cymorth i ofalu am blant ac anifeiliaid
• cynnig cael defnyddio cawod a thoiledau
• dillad, nwyddau ymolchi a lluniaeth ysgafn
• cynnig defnyddio ffôn a chamera i helpu gyda hawliadau yswiriant

Gall y swyddog tân sy'n gyfrifol am y man lle bu'r tân ofyn am y cerbyd gan nodi faint o bobl sydd angen cymorth a pha fath o gymorth y mae ei angen arnynt

Yr hyn y mae'n rhaid i chi ei wneud

Ar ôl diffodd y tân, bydd y swyddogion tân yn archwilio'r adeilad yn drylwyr ac yn dweud wrthych chi am unrhyw ddiffygion strwythurol neu ddiffygion eraill amlwg. Os bydd y gwasanaethau brys yn credu nad yw'r adeilad yn ddiogel:

• byddan nhw'n rhoi gwybod i'r swyddog rheoli adeiladau lleol
• efallai y codir ffens i atal y cyhoedd rhag mynd iddo a bydd yn rhaid i chithau drefnu bod yr adeilad yn cael ei atgyweirio
• efallai y byddan nhw'n gosod fframwaith cynnal neu'n dymchwel yr eiddo er mwyn osgoi perygl i'r cyhoedd

Os na allwch fyw yn eich cartref ar ôl tân, gallech wneud y canlynol:

• ceisio trefnu llety dros dro gyda pherthnasau neu ffrindiau
• cysylltu â swyddfa dai eich cyngor lleol (neu ofyn i'r frigâd dân neu'r heddlu wneud hyn ar eich rhan, os bydd y tu allan i oriau swyddfa)
• cysylltu â’ch swyddfa nawdd cymdeithasol leol i gael cymorth ariannol tymor byr

Pan fydd y gwasanaethau brys yn gadael, chi sy'n gyfrifol am ddiogelwch eich eiddo. Bydd eich yswirwyr yn disgwyl i chi sicrhau bod eich cartref yn ddiogel. Symudwch bopeth gwerthfawr o'r eiddo os yw'n ddiogel i chi wneud hynny a chaewch bob drws a ffenestr. Os oes angen cau'r ffenestri a'r drysau â choed, cysylltwch â'ch cyngor lleol os ydych chi'n denant tŷ cyngor. Neu, y tu allan i oriau swyddfa, gall y frigâd dân neu'r heddlu gysylltu â nhw ar eich rhan.

Dylai perchnogion neu denantiaid preifat gysylltu â chwmni gwydr 24 awr. Fe'u rhestrir dan 'glaziers' yn y Yellow Pages. Dywedwch wrth yr heddlu os ydych chi'n gadael yr eiddo cyn iddo fod yn ddiogel, gan esbonio unrhyw drefniadau rydych chi wedi'u gwneud gyda chontractwyr.

Mae'n siŵr y codir tâl arnoch chi am y rhan fwyaf o'r gwasanaethau uchod ond efallai y gallwch chi hawlio rhywfaint o arian yn ôl drwy yswiriant eich cartref.

• Dewis crefftwyr a darparwyr gwasanaethau
• Cael gwybod am atgyweirio tai cyngor mewn argyfwng y tu allan i oriau arferol Opens new window

Beth i'w wneud nesaf

Yn dilyn tân, mae'n beth doeth gwneud y canlynol:

• cysylltu â'ch cwmni yswiriant cyn gynted â phosib
• cysylltu â chyflenwyr nwy, trydan a dŵr
• peidiwch â chael eich temtio i roi unrhyw gyflenwad nwy, trydan neu ddŵr ymlaen os ydyn nhw wedi cael eu diffodd
• trefnu bod rhywun cymwys yn gwirio ac yn trwsio cyflenwadau a gosodiadau cyfleusterau cyhoeddus
  

Mae manylion cyswllt cyflenwyr a gosodwyr nwy, trydan a dŵr ar gael yn y Yellow Pages.

Os ydych chi'n byw ar incwm isel ac nad oes gennych yswiriant cartref

Efallai na fydd gan bobl sy'n byw ar incwm isel yswiriant digonol. Mae llawer hefyd yn peidio â thalu eu polisi yswiriant os ydyn nhw'n wynebu problemau ariannol. Os bydd angen cymorth ariannol arnoch chi ar gyfer costau megis yswiriant, efallai y byddwch yn gymwys i gael Grant Cymunedol. Mae Grant Cymunedol yn helpu pobl i fyw'n annibynnol yn y gymuned ac yn helpu i ysgafnhau pwysau eithriadol ar deuluoedd.

Os oes gennych blant neu bobl ddiymgeledd eraill yn eich teulu, cewch gymorth gan y gwasanaethau cymdeithasol. Cysylltwch ag adran gwasanaethau cymdeithasol eich cyngor lleol. Efallai hefyd y bydd eich cyngor yn darparu manylion cyswllt brocer sydd, yn eu barn nhw, yn darparu gwasanaeth rhad i'r rhai sydd ar incwm isel.

• Grantiau Gofal yn y Gymuned (adran arian, treth a budd-daliadau)
• Y cyfan am gynghorau lleol yn nhrefn yr wyddor

Beth i'w wneud os byddwch chi'n ddigartref ar ôl tân

Mae gwasanaethau ar gael i chi os byddwch chi'n ddigartref ar ôl tân.

• Digartrefedd

Mwy o ddolenni defnyddiol

• Atal tân
• Benthyciadau Argyfwng (adran arian, treth a budd-daliadau)