Gwefan llywodraeth y DU

Dilynwch y cod diogelwch ar gyfer tân gwyllt

Os ydych chi'n meddwl defnyddio tân gwyllt fel rhan o'ch dathliadau, dylech ddilyn yr awgrymiadau hyn er mwyn bod yn ddiogel:

• dim ond tân gwyllt â nod BS 7114 arnynt y dylech eu prynu (dyma'r Safon Brydeinig y dylai tân gwyllt o bob math ei bodloni)
• peidiwch ag yfed alcohol os ydych chi'n gyfrifol am danio tân gwyllt
• storiwch dân gwyllt mewn blwch metel caeedig a'u tynnu allan un ar y tro
• cadwch fwced o ddŵr gerllaw
• dilynwch y cyfarwyddiadau ar bob tân gwyllt – defnyddiwch olau fflachlamp i ddarllen y cyfarwyddiadau, peidiwch byth â defnyddio fflam agored
• taniwch y tân gwyllt hyd braich i ffwrdd, gan ddefnyddio'r tapr a ddarperir
• gwnewch yn siŵr bod pawb yn sefyll yn ddigon pell yn ôl
• peidiwch byth â dychwelyd at dân gwyllt sydd wedi'i gynnau - hyd yn oed os nad yw wedi tanio, mae'n dal yn bosib iddo ffrwydro
• peidiwch byth â rhoi tân gwyllt yn eich poced na'u taflu
• dylid goruchwylio plant o amgylch tân gwyllt bob amser, ac ni ddylid byth roi ffyn gwreichion i blentyn dan bump oed
• taniwch ffyn gwreichion un ar y tro a gwisgwch fenig
• cadwch anifeiliaid anwes dan do
• peidiwch â thanio tân gwyllt yn hwyr yn y nos
• byddwch yn ofalus o amgylch tanau agored fel coelcerthi a barbeciws - gall pob dilledyn fynd ar dân, hyd yn oed os yw'r label arnynt yn dweud na fyddant yn mynd ar dân yn hawdd

• Llwytho taflenni diogelwch tân gwyllt Opens new window
• Cymorth gyda ffeiliau PDF
• Cyngor am ddiogelwch tan ar gyfer rhieni a gofalwyr plant

Tân gwyllt a'r gyfraith

Os byddwch yn camddefnyddio tân gwyllt, gallech gael dirwy o £80 yn y fan a'r lle. Os bydd y llysoedd yn dyfarnu eich bod yn euog gallech gael dirwy o hyd at £5,000.
Os ydych yn iau na 18 oed, chewch chi ddim:

• prynu'r mathau o dân gwyllt y gellir eu gwerthu i oedolion yn unig, neu eu defnyddio mewn llefydd cyhoeddus - mae hyn yn cynnwys ffyn gwreichion

Chewch chi ddim:

• tanio tân gwyllt ar y stryd neu mewn llefydd cyhoeddus eraill
  
• tanio tân gwyllt rhwng 11.00 pm a 7.00 am, ac eithrio ar y dyddiau a restrir isod
• achosi i anifeiliaid dof neu anifeiliaid caeth ddioddef heb fod angen (os dyfernir eich bod yn euog, y gosb yw naill ai carchar am hyd at 51 wythnos, neu ddirwy o hyd at £20,000, neu'r ddau)

Cewch danio tân gwyllt hyd at hanner nos ar Noson Tân Gwyllt a hyd at 1.00 am ar Ddydd Calan, ar y Flwyddyn Newydd Tsieineaidd neu yn ystod Diwali.
Os byddwch yn defnyddio tân gwyllt mae angen i chi gofio am eich cymdogion a gwneud yn siŵr nad ydych yn achosi niwsans.

• Niwsans sŵn ac anghydfodau ymysg cymdogion
• Deddfwriaeth am dân gwyllt Opens new window

Diogelwch rhag tân yn ystod dathliadau a gwyliau

Yn ogystal â'r gofal y dylech ei gymryd o ddydd i ddydd yn eich cartref (darllenwch am hyn drwy ddilyn y ddolen isod - ‘Diogelwch rhag tân yn y cartref’) dylech fod yn fwy gofalus os ydych yn cynnal parti, neu os oes gennych ffrindiau neu deulu'n aros yn eich cartref:

• os bydd gwesteion yn aros dros nos, gwnewch yn siŵr eu bod yn gwybod sut mae dianc yn ddiogel
• rhowch wybod i westeion am unrhyw nodweddion nad ydynt yn gyfarwydd â nhw - er enghraifft, sut mae datgloi'r drws ffrynt
• dywedwch wrth eich gwesteion ym mhle mae allweddi'r drws yn cael eu cadw dros nos
• cymerwch ofal arbennig o bobl oedrannus, plant a phobl anabl
• os oes ysmygwyr yn eich plith, darparwch ddigon o flychau llwch er mwyn sicrhau na fydd llwch neu fonion yn cael eu gollwng mewn llefydd fel biniau sbwriel

Goleuadau addurniadol, canhwyllau ac addurniadau

Ni fydd goleuadau bach a goleuadau a roddir ar goed Nadolig yn cael eu defnyddio'n aml iawn, felly dylech wneud yn siŵr eu bod yn gweithio'n iawn cyn eu defnyddio:

• gwnewch yn siŵr bod maint y ffiws sydd yn y plwg yn gywir (edrychwch ar y bocs i weld beth yw'r ffiws uchaf ddylech chi ei ddefnyddio)
• rhowch fylbiau newydd yn lle'r rhai sydd wedi chwythu
• peidiwch â gadael goleuadau ymlaen pan fyddwch yn mynd i'r gwely neu'n gadael y tŷ
• peidiwch â gadael i'r bylbiau gyffwrdd ag unrhyw beth a all losgi'n rhwydd, megis papur neu ddeunyddiau (byddwch yn arbennig o ofalus gydag addurniadau eraill y goeden Nadolig)

Mae addurniadau Nadoligaidd, yn enwedig rhai wedi'u gwneud o bapur sidan neu gardbord, yn llosgi'n hawdd felly cadwch addurniadau a chardiau cyfarch oddi wrth wresogyddion, goleuadau, llefydd tân a chanhwyllau.

Bydd canhwyllau a goleuadau nos yn cael eu defnyddio'n aml mewn dathliadau ar gyfer y Nadolig, Diwali a gwyliau eraill. Ni ddylid byth eu rhoi ar goeden Nadolig, planhigion, blodau na dail, nac yn agos atynt. Dylech hefyd fod yn ofalus â rhubanau ac addurniadau eraill, gan wneud yn siŵr nad ydynt yn agos at fflamau canhwyllau. I gael mwy o awgrymiadau cyffredinol am ddefnyddio canhwyllau'n ddiogel, dilynwch y ddolen isod.

• Diogelwch gyda chanhwyllau

Mwy o ddolenni defnyddiol

• Damweiniau ac argyfyngau (adran iechyd a lles)
• Cyngor am ddiogelwch rhag tân ar gyfer rhieni a gofalwyr plant (adran rhieni)
• Sut i ddelio â mân losgiadau Opens new window
• Trin llosgiadau, sgaldiadau a phigiadau Opens new window