Gwefan llywodraeth y DU

Beth yw'r cynllun Cymorth y Llys ar gyfer achosion Ildio Meddiant?

Gallwch gael cyngor cyfreithiol a chynrychiolaeth mewn llys am ddim dan y cynllun Cymorth y Llys ar gyfer achosion Ildio Meddiant os ydych yn wynebu cael eich adfeddiannu neu eich troi allan. Gall y cynllun fod yn ffynhonnell o gymorth munud olaf os nad ydych wedi trefnu cyngor cyfreithiol cyn y gwrandawiad llys. Gallwch gael cymorth os ydych yn denant neu'n talu morgais (gan gynnwys ail forgeisi) ar gyfer gwrandawiadau meddiannu a cheisiadau gwarantau.

Mae'r cynllun yn darparu cynghorwyr arbennigol a all roi cyngor cyfreithiol am ddim i chi ar ddiwrnod eich gwrandawiad. Bydd y cynghorydd yn eich cynrychioli yn y gwrandawiad ac yn dilyn unrhyw gamau dilynol. Byddant yn eich helpu i egluro pam nad ydych wedi gwneud eich taliadau. Gallant eich helpu hefyd i ddod i gytundeb gyda'ch benthyciwr morgais neu landlord ar gyfer talu eich dyledion.

Gallwch gael cymorth dan y cynllun Cymorth y Llys ar gyfer achosion Ildio Meddiant beth bynnag fo'ch sefyllfa ariannol - ar yr amod bod gennych wrandawiad ar yr un diwrnod.

Pam ddylech chi fod yn y gwrandawiad

Mae angen i chi fod yn bresennol yn eich gwrandawiad - mae'n gyfle i chi ddweud wrth y llys pam eich bod ar ei hôl hi gyda'ch taliadau morgais neu rent. Os na fyddwch yn dod i'r llys, gall y llys benderfynu eich troi chi allan o'ch cartref. Unwaith i'r llys wneud y penderfyniad hwn, mae'n anodd iawn rhwystro hynny rhag digwydd.

Os oes gennych chi reswm da, efallai y caiff yr achos ei ohirio. Byddai hyn yn rhoi amser i chi ddal i fyny â'ch ad-daliadau.

Ceir mwy o wybodaeth am drefn y llys gydag achosion ildio meddiant ar wefan Gwasanaeth Llysoedd Ei Mawrhydi (GLlEM).

• GLlEM - Materion tai Opens new window

Cynllun Cymorth y Llys ar gyfer achosion Ildio Meddiant - sut i gael cymorth

Darperir y cynllun Cymorth y Llys ar gyfer achosion Ildio Meddiant mewn 187 o lysoedd sirol yng Nghymru a Lloegr. I gael gwybod mwy am y cynlluniau yn eich ardal leol chi, cysylltwch â'ch cyngor lleol neu'r llys lle gwrandewir eich achos. Fe welwch fanylion cyswllt y llys ar y gwaith papur y dylech fod wedi'i gael ar gyfer eich achos. Gallwch hefyd gysylltu â'r Cyngor Cyfreithiol Cymunedol, a all roi cyngor cyfreithiol arbenigol a chyfrinachol i chi.

Os nad oes cynllun meddiannu ar gael yn eich ardal chi, mae'n bosib y gall gwasanaethau cynghori eraill eich helpu. Holwch y llys lle gwrandewir eich achos.

• Dod o hyd i'ch cyngor lleol
• Cysylltu â Galw Gwasanaeth Cyfreithiol Cymunedol Opens new window
• Gwasanaeth Llysoedd Ei Mawrhydi - Canfod llysoedd Opens new window

Mwy o ddolenni defnyddiol

• Mynd i'r llys - fideo Directgov Opens new window