Gwefan llywodraeth y DU
Nodwch fod gan y wefan hon system allweddumynediad llywodraeth y DU
Trefn llywio pennaf
dolenni i dudalennau eraill yn yr adran hon
Y cartref a’r gymuned
Sut i osgoi twyll ar-lein
Mae prynu a gwerthu ar-lein yr un mor ddiogel ag archebu nwyddau dros y ffôn, ond dylech fod yn ymwybodol y bydd rhai pobl yn ceisio'ch darbwyllo i roi eich arian a'ch manylion personol iddynt.
Siopa a bancio'n ddiogel ar-lein - cadw'ch manylion ariannol yn ddiogel
Cyn i chi brynu
Cyn i chi brynu unrhyw beth ar-lein gwnewch nodyn o gyfeiriad y cwmni rydych yn prynu ganddynt. Dylai hwn gynnwys manylion rhif ffôn a/neu ffacs - peidiwch byth â dibynnu ar gyfeiriad e-bost yn unig.
Defnyddiwch safleoedd diogel bob tro
Mae gan y safleoedd hyn 'https' o flaen cyfeiriad y wefan sy'n nodi bod y cwmni wedi cael ei wirio'n annibynnol i sicrhau ei fod yn ddilys. Bydd eicon clo melyn yn ymddangos yn ffenestr y porwr i ddangos bod y broses talu'n ddiogel.
Mwy o gynghorion
- wrth drosglwyddo arian, defnyddiwch gwmnïau dibynadwy
- peidiwch byth â throsglwyddo na derbyn arian ar ran rhywun arall
- edrychwch ar bolisi preifatrwydd a pholisi dychwelyd nwyddau'r safleoedd
- argraffwch gopi o'ch archeb ac unrhyw gydnabyddiaeth a gewch
- gwiriwch eich datganiad banc yn ofalus yn erbyn unrhyw beth a brynwch ar-lein
- cadwch eich cyfrineiriau'n ddiogel
Canfod a delio gyda thwyll ar y rhyngrwyd
Efallai y byddwch wedi dioddef twyll ar y rhyngrwyd:
- os ydych wedi talu am eitem ar-lein a hwnnw heb gyrraedd
- os ydych wedi gwerthu rhywbeth ar-lein a heb gael eich talu
- os nad yw'r eitem a dderbyniwch yn cyfateb i'r disgrifiad gwreiddiol a gawsoch
Os credwch eich bod wedi cael eich twyllo:
- cysylltwch â'r cwmni y buoch yn delio ag ef i weld a allwch chi ddatrys y broblem
- os oes gennych broblem gydag eitem a brynwyd neu a werthwyd ar safle ocsiwn, megis eBay, holwch y rheini i weld a allan nhw wneud rhywbeth
- os ydych wedi talu am nwyddau gan ddefnyddio cerdyn credyd a'r nwyddau heb gyrraedd, gallwch ofyn i gwmni'r cerdyn credyd archwilio i'r mater
- os defnyddiwyd gwasanaeth talu ar-lein gennych, holwch i weld a ydych wedi'ch diogelu gan gynllun diogelu rhag twyll ar wefan y gwasanaeth
Mae gennych yr un hawliau wrth brynu ar-lein ac wrth brynu dros y ffôn neu drwy'r post. Gallwch gael gwybod mwy ar wefan Consumer Direct a'r llinell gymorth hon: 0845 04 05 06, neu cysylltwch â'ch Canolfan Cyngor Ar Bopeth leol.
Cynlluniau i gadw llygad arnynt
Mae'r rhyngrwyd yn rhoi ffordd hawdd o gysylltu â miloedd o bobl ar y tro i droseddwyr. Mae'r enghreifftiau'n cynnwys negeseuon e-bost yn rhoi cyfle i chi gymryd rhan mewn cynlluniau gwneud arian, neu negeseuon sy'n honni eich bod wedi ennill gwobr.
Gallwch osgoi dioddef twyll ar y rhyngrwyd:
- drwy gofio - os oes rhywbeth yn swnio'n rhy dda i fod yn wir, mae'n debyg ei fod
- drwy gymryd eich amser i wneud penderfyniadau sy'n ymwneud â rhoi arian i ffwrdd
- drwy gael cyngor ariannol annibynnol cyn gwneud buddsoddiadau
- drwy wneud busnes dim ond gyda chwmnïau yr ydych yn gwybod amdanynt neu a argymhellir gan rywun yr ydych yn ymddiried ynddo - peidiwch â barnu cwmni ar ba mor 'broffesiynol' yw diwyg eu gwefan
- os oes gennych unrhyw amheuon, gallwch ganfod a yw cwmni'n ddilys drwy edrych amdanynt ar wefannau Ty'r Cwmnïau neu'r Awdurdod Gwasanaethau Ariannol - os ydynt yn ddilys byddant wedi'u cofrestru
Dwyn manylion personol
Os bydd manylion personol megis eich cyfeiriad, rhif eich pasport a'ch Rhif Yswiriant Gwladol yn cael eu dwyn, gellir eu defnyddio i sefydlu cyfrifon ar-lein, gwneud cais am gardiau credyd a hyd yn oed i wneud cais am fudd-daliadau yn eich enw yn ddiarwybod i chi.
Efallai y bydd troseddwyr yn ceisio cael gafael ar fanylion eich cerdyn credyd drwy anfon negeseuon e-bost sydd yn ôl pob golwg yn dod oddi wrth sefydliad ag enw da ar-lein megis banc neu gwmni cerdyn credyd. Maent yn eich annog i roi manylion eich cerdyn credyd neu gyfrinair ar wefan ffug
myguide: canllaw cam wrth gam syml i ddiogelwch ar y rhyngrwyd
A oes gennych ffrind neu aelod o'r teulu a hoffai fynd ar-lein, ond eu bod yn poeni am firysau, spam neu dwyll ar-lein? Gallant ddysgu sut i ddiogelu eu hunain gyda chanllaw syml 30 munud i ddiogelwch ar y rhyngrwyd myguide.
Ewch i 'Helpu rhywun i ddechrau arni ar-lein' i gael rhagor o wybodaeth am myguide.
Mwy o ddolenni defnyddiol
Additional links
Allweddumynediad llywodraeth y DU
