Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Arian, treth a budd-daliadau

Arian, treth a budd-daliadau

Diogelwch Cyfrifoldebau Cartref

Cynllun, nid budd-dal, yw Diogelwch Cyfrifoldebau Cartref. Ei fwriad yw eich helpu i amddiffyn eich hawl i Bensiwn y Wladwriaeth os nad ydych chi'n talu Cyfraniadau Yswiriant Gwladol oherwydd eich bod yn ddi-waith, neu fod eich enillion yn fach oherwydd eich bod yn gofalu am blentyn neu berson sydd naill ai'n wael neu'n anabl.

Pwy sy'n gymwys

Cymhwyso'n awtomatig ar gyfer y Cynllun Diogelwch Cyfrifoldebau Cartref

Dylech fod yn gymwys fel mater o drefn ar gyfer y cynllun Diogelwch Cyfrifoldebau Cartref os ydych chi'n derbyn naill ai:

  • Budd-dal Plant yn eich enw chi i blentyn dan 16 oed a'ch bod wedi rhoi eich rhif Yswiriant Gwladol i'ch Swyddfa Budd-dal Plant.
  • Cymhorthdal Incwm ac nad oes rhaid i chi gofrestru ar gyfer gwaith am eich bod yn gofalu am rywun sy'n sâl neu'n anabl

Gwneud cais am Ddiogelwch Cyfrifoldebau Cartref

Dylech wneud cais am Ddiogelwch Cyfrifoldebau Cartref os ydych chi naill ai:

  • yn treulio o leiaf 35 awr yr wythnos yn rheolaidd yn gofalu am rywun sy'n derbyn Lwfans Gweini, Lwfans Byw i'r Anabl ar raddfa ganolradd neu uchaf gofal personol, neu Lwfans Gweini Cyson

neu

  • yn ofalwr maeth cofrestredig drwy gydol blwyddyn dreth gron ac nad ydych yn derbyn Budd-dal Plant nac ychwaith mewn swydd â chyflog, nac yn ennill digon mewn blwyddyn dreth iddo gyfri tuag at Bensiwn sylfaenol y Wladwriaeth

Pwy sydd ddim yn gymwys?

Lwfans Gofalwr

Os ydych chi'n derbyn Lwfans Gofalwr byddwch chi'n cael credydau Yswiriant Gwladol fel mater o drefn ac fel arfer ni fydd angen i chi wneud cais am Ddiogelwch Cyfrifoldebau Cartref.

Pwy sydd ddim yn gymwys?

Menywod priod neu weddwon

Os ydych yn wraig briod neu'n weddw, allwch chi ddim cael Cymorth Diogelwch Cyfrifoldebau Cartref am unrhyw flwyddyn dreth gyflawn os ydych wedi dewis naill ai:

  • talu cyfraniadau Yswiriant Gwladol Dosbarth 1 ar y raddfa is fel gweithiwr (y 'stamp bach' fel y'i gelwir)
  • peidio â thalu cyfraniadau Yswiriant Gwladol Dosbarth 2 a chithau'n hunan-gyflogedig


Sut mae'n gweithio

Wrth gyfrifo Pensiwn sylfaenol y Wladwriaeth, tynnir nifer y blynyddoedd hynny pan fyddwch yn derbyn taliadau Diogelwch Cyfrifoldebau Cartref o'r nifer o flynyddoedd cymwys sydd eu hangen er mwyn cyfrifo'ch pensiwn.

Ond ar gyfer Pensiwn sylfaenol llawn y Wladwriaeth, ni all y cynllun Diogelwch Cyfrifoldebau Cartref ostwng nifer y blynyddoedd cymwys o dan 20.

Byddwch hefyd yn adeiladu Pensiwn ychwanegol y Wladwriaeth os byddwch yn gymwys ar gyfer Diogelwch Cyfrifoldebau Cartref oherwydd byddwch naill ai:

  • yn cael Budd-dal Plant i blentyn dan chwech oed
  • yn gofalu am rywun sâl neu anabl (gan gynnwys plentyn dros chwech oed)

Sut i hawlio

I hawlio Diogelwch Cyfrifoldebau Cartref, mae angen i gysylltu â’ch swyddfa Canolfan Byd Gwaith i gael ffurflen: ‘Sut i amddiffyn eich Pensiwn y Wladwriaeth os ydych yn gofalu am rywun yn y cartref’, a ffurflen hawlio CF411.

Llwytho ffurflen i brintio a chwblhau

Neu allwch lwytho’r ffurflen hawlio CF411 o wefan Cyllid a Thollau EM.

Gofalwyr maeth

Os ydych chi'n ofalwr maeth, pan fyddwch chi'n llenwi ffurflen CF411, rhaid i chi roi llythyr gan eich awdurdod lleol neu'r asiantaeth rydych chi'n gweithio iddi'n cadarnhau eich bod wedi bod yn ofalwr maeth cymeradwy drwy gydol y flwyddyn dreth gron.

Pryd i hawlio

Os ydych chi'n hawlio dan y cynllun Diogelwch Cyfrifoldebau Cartref am y blynyddoedd pan fuoch chi'n gofalu am rywun â salwch neu anabledd hirdymor rhwng mis Ebrill 1978 a mis Ebrill 2002, gallwch hawlio unrhyw bryd nes i chi gyrraedd oedran Pensiwn y Wladwriaeth.

Am y blynyddoedd treth 2002/2003 ymlaen, mae’n rhaid i chi hawlio dan y Cynllun Diogelwch Cyfrifoldebau Cartref o fewn tair blynedd i ddiwedd unrhyw flwyddyn dreth a dreuliwyd gennych yn gofalu am rywun â salwch neu anabledd hirdymor. Er enghraifft, os oeddech yn gofalu am rywun â salwch neu anabledd hirdymor trwy gydol y flwyddyn dreth 2004/2005, mae’n rhaid i chi hawlio Diogelwch Cyfrifoldebau Cartref cyn 5 Ebrill 2008.

Beth i'w wneud os bydd eich amgylchiadau'n newid

Rhaid i chi ddweud wrth y Gwasanaeth Pensiwn:

  • os byddwch chi neu rywun rydych yn hawlio budd-dal ar ei gyfer yn cael eich derbyn i'r ysbyty
  • os byddwch yn mynd i fyw dramor
  • os byddwch chi neu'r sawl rydych chi'n gofalu amdanynt yn mynd i ofal preswyl neu i gartref nyrsio

Beth arall y mae angen i chi ei wybod

Mae'r cynllun Diogelwch Cyfrifoldebau Cartref hefyd yn help i warchod budd-daliadau profedigaeth i'ch gŵr neu wraig neu bartner sifil.

Mwy o ddolenni defnyddiol

Yn yr adran hon...

Allweddumynediad llywodraeth y DU