Gwefan llywodraeth y DU

Beth yw Lwfans Tai Lleol

Mae'r Lwfans Tai Lleol yn ffordd newydd o gyfrifo Budd-dal Tai sy’n seiliedig ar yr ardal y mae'r cwsmer yn byw ynddi, nifer y deiliaid yn yr adeilad, a maint y tŷ. Mae'r Lwfans Tai Lleol yn ffordd llawer tecach o gyfrifo Budd-dal Tai, gan ei fod yn sicrhau bod tenantiaid sydd mewn amgylchiadau tebyg yn yr un ardal yn cael yr un faint o gymorth ariannol ar gyfer eu costau tai.

Sut y mae'r newidiadau hyn yn effeithio ar y rhai sy'n cael Budd-dal Tai

Os ydych eisoes yn cael Budd-dal Tai ni fydd hyn yn effeithio arnoch oni fyddwch yn newid cyfeiriad ac yn symud i dŷ ar rent gan landlord preifat. Os bydd hyn yn digwydd byddwch yn cael Lwfans Tai Lleol yn ei le.

Sut y caiff Lwfans Tai Lleol ei gyfrifo

Caiff cyfraddau'r Lwfans Tai Lleol eu cyfrifo ar gyfer ardaloedd unigol bob mis, sef Ardaloedd Rhentu Marchnad Eang. Bydd y swm sy'n ddyledus yn seiliedig ar y ffigur rhentu 'canol y ffordd' ar gyfer yr ardal y mae'r eiddo ynddi a bydd yn ystyried maint yr eiddo.

Mae seilio'r Lwfans Tai Lleol ar ystod canol y ffordd ar gyfer meintiau adeiladau penodol yn golygu bod union hanner tai rhent y maint hwnnw yn yr ardal yn fforddiadwy gyda swm y Lwfans Tai Lleol y byddwch yn ei gael.

Faint o arian gewch chi

Os bydd rhent y tŷ rydych wedi ei drafod gyda'ch landlord yn is na chyfradd y Lwfans Tai Lleol byddwch yn gallu cadw unrhyw fudd-dal sy'n weddill hyd at uchafswm o £15 yr wythnos. Ni chaiff yr arian sy'n weddill ei ystyried fel arfer wrth benderfynu ar fudd-daliadau eraill. Os bydd y rhent yn uwch na'r gyfradd Lwfans Tai Lleol bydd yn rhaid i chi dalu'r gwahaniaeth neu chwilio am dŷ arall o fewn cyfraddau'r Lwfans Tai Lleol.

Mae'r hawl i gael Lwfans Tai Lleol yn amodol ar brawf modd a bydd angen i chi ddarparu cytundeb tenantiaeth dilys fel prawf.

Sut mae hawlio

Gallwch hawlio Lwfans Tai Lleol cyn gynted ag y bydd gennych gytundeb rhent gyda'ch landlord. Cysylltwch â'ch cyngor lleol cyn gynted â phosib i drafod eich hawliad. Os na wnewch chi hyn, efallai y byddwch chi'n colli eich budd-dal.

Sut y caiff y Lwfans Tai Lleol ei dalu i chi

Caiff y taliad ei wneud fel arfer yn syth i'ch cyfrif banc neu gymdeithas adeiladu (os oes gennych un) neu drwy siec. Ni chaiff y taliad ei wneud i'ch landlord fel arfer.

Os nad oes gennych gyfrif banc neu gymdeithas adeiladu eisoes, efallai y byddai'n syniad i chi gael un. Trwy wneud hynny gallwch drefnu i dalu'r rhent i'ch landlord yn awtomatig, drwy ddebyd uniongyrchol.

Gallwch gael cyngor ar agor a rhedeg cyfrif banc gan unrhyw fanc neu gymdeithas adeiladu. Gallwch hefyd gael cyngor gan sefydliad fel Cyngor ar Bopeth. Mae cyngor ar gyfrifon banc ar gael hefyd.

• Cyfrifon banc a chynnyrch bancio

Eich dewis chi yw talu rhent i'ch landlord. Os na fyddwch yn talu rhent, gellir mynd â chi i'r llys a chewch eich troi allan o'ch cartref.

Os ydych yn poeni am reoli eich arian, gofynnwch i'ch cyngor lleol os gallant eich helpu. Mewn rhai achosion efallai y gallant dalu eich budd-dal i'ch landlord.

Lle caiff y cyfraddau eu cyhoeddi

Caiff cyfraddau'r Lwfans Tai Lleol eu cyhoeddi ar ddiwedd pob mis ar gyfer y mis canlynol. Er enghraifft, bydd cyfraddau mis Ebrill ar gael ddiwedd mis Mawrth. Gallwch edrych ar y rhain yn lleol ar wefan eich cyngor lleol neu drwy fynd i wefan Y Gwasanaeth Rhent.

• Y Gwasanaeth Rhent Opens new window
• Y cyfan am gynghorau lleol yn nhrefn yr wyddor

Newid mewn amgylchiadau

Os ydych yn cael Budd-dal Tai a'ch bod yn symud i gyfeiriad newydd neu os oes rhyw newid arall yn eich amgylchiadau, dylech roi gwybod i'ch cyngor lleol ar unwaith. Efallai y bydd yn rhaid i chi wneud cais newydd am Fudd-dal Tai.

Hawlio Cymhorthdal Incwm, Lwfans Ceisio Gwaith neu Lwfans Cyflogaeth a Chymorth

Os ydych yn cael Cymhorthdal Incwm, Lwfans Ceisio Gwaith neu Lwfans Cyflogaeth a Chymorth byddwch yn cael ffurflenni i wneud cais am Lwfans Tai Lleol gyda'ch pecyn hawlio. Cwblhewch y ffurflen a'i dychwelyd gyda'ch ffurflen gais am Gymhorthdal Incwm, Lwfans Ceisio Gwaith neu Lwfans Cyflogaeth a Chymorth. Os ydych yn dymuno cael Budd-dal Tai neu Fudd-dal Treth Cyngor yn ychwanegol i’r budd-daliadau uchod, bydd y Ganolfan Byd Gwaith neu’r Gwasanaeth Anabledd a Gofalwyr yn danfon y ffurflenni perthnasol i’ch cyngor lleol. Os nad ydych chi'n hawlio'r Cymhorthdal Incwm, y Lwfans Ceisio Gwaith neu’r Lwfans Cyflogaeth a Chymorth, gofynnwch i'ch cyngor lleol am ffurflenni i hawlio'r Lwfans Tai Lleol.

I gael ffurflen gais Lwfans Tai Lleol, cysylltwch â'ch cyngor lleol

• Y cyfan am gynghorau lleol yn nhrefn yr wyddor

Mwy o ddolenni defnyddiol

• Gwybodaeth budd-daliadau - ar incwm isel
• Gwybodaeth am Gymorth i Dalu Llog Morgais - cymorth gyda benthyciad cartref
• Olddyledion rhent
• Cynlluniau prynu cartref (adran y cartref a’r gymuned)
• Canllaw syml i drethi