Gwefan llywodraeth y DU

Pwy all gael y cyfrifon newydd?

Gallwch agor cyfrif Porth Cynilo os ydych yn cael un o'r canlynol:

• Cymhorthdal Incwm
• Lwfans Ceisio Gwaith
• Budd-dal Analluogrwydd
• Lwfans Cyflogaeth a Chymorth
• Lwfans Anabledd Difrifol
• Credydau treth – os yw’ch incwm yn llai na £16,040
• Lwfans Gofalwr (rhaid eich bod yn cael y lwfans, nid dim ond bod â hawl sylfaenol iddo)

Sut y bydd y cyfrifon yn gweithio

Pan lansir y cynllun yn 2010, os bydd ein cofnodion yn dangos eich bod yn gymwys i gael cyfrif, bydd Cyllid a Thollau EM yn anfon atoch lythyr gwahoddiad, llyfryn gwybodaeth a rhestr o ddarparwyr y Porth Cynilo. Gallwch fynd â’ch llythyr at unrhyw ddarparwr Porth Cynilo cymeradwy ac agor eich cyfrif.

Yna, bydd modd i chi gynilo cymaint ag y dymunwch hyd at £25 y mis yn eich cyfrif am ddwy flynedd. Ar ddiwedd y ddwy flynedd, bydd y llywodraeth yn rhoi 50 ceiniog i chi am bob £1 yr ydych wedi’i chynilo.

Peidiwch â phoeni os yw £25 yn swnio’n ormod – cewch 50 ceiniog ychwanegol am bob £1 y byddwch yn ei chynilo. Bydd hefyd yn bosib i chi dynnu arian o’ch cynilion os bydd angen, ac ni fydd hyn yn effeithio ar yr arian y byddwch wedi'i ennill gan y llywodraeth hyd at y pwynt hwnnw. Cofiwch, dim ond un cyfrif Porth Cynilo y cewch ei agor gydol eich oes, felly gwnewch yn siŵr eich bod yn ei agor ar yr adeg orau i chi.

Beth nesaf?

Bydd mwy o wybodaeth am gyfrifon Porth Cynilo ar gael yn nes at y lansiad yn 2010, gan gynnwys pwy all gael cyfrif, sut mae agor un a sut mae’n gweithio.

Does dim angen i chi wneud dim byd yn y cyfamser. Ond efallai y byddai’n werth holi i weld a ydych chi’n gymwys i gael unrhyw un o’r budd-daliadau neu’r credydau treth a grybwyllir uchod.

• Canfod pa fudd-daliadau y gallech fod â hawl iddynt gan ddefnyddio'r cynghorydd budd-daliadau

Os oeddech yn rhan o’r Cynllun Peilot

Cafodd y cynllun Porth Cynilo ei dreialu mewn chwe ardal yn y wlad. Roedd y cyfrifon ar agor o fis Mawrth 2005 tan fis Mawrth 2007, lle'r oedd cyfrifon unigol yn para am 18 mis.

Os oeddech chi’n rhan o’r cynllun peilot, bydd yn dal yn bosib i chi agor cyfrif yn 2010, os ydych yn bodloni’r meini prawf a ddangosir uchod. Os oedd gennych chi gyfrif Porth Cynilo fel rhan o’r cynllun peilot a bod gennych unrhyw gwestiwn am eich taliad cyfatebol neu am unrhyw agwedd arall ar eich cyfrif, ewch i'ch cangen Halifax leol neu ffoniwch linell gymorth Halifax ar 08457 263646.

Mwy o ddolenni defnyddiol

• Dysgu mwy am gynilion a buddsoddiadau

• Dysgu sut mae cynllunio eich materion ariannol personol