Gwefan llywodraeth y DU

Os ydych chi mewn gwlad arall dros dro

Os ydych chi’n disgwyl bod i ffwrdd o’r DU am lai na 52 wythnos, gelwir hyn yn ‘absenoldeb dros dro’.

Os ydych chi dramor dros dro gallwch ddal i gael Budd-dal Plant:

• am yr wyth wythnos gyntaf – ni waeth pam yr ydych i ffwrdd
• am y 12 wythnos cyntaf – os ydych chi dramor oherwydd eich bod chi neu aelod o’ch teulu, er enghraifft eich plentyn, brawd, chwaer, nain neu daid un ai'n cael triniaeth am salwch neu anabledd corfforol neu feddyliol, neu os ydynt yn marw

• Budd-dal Plant ar gyfer plant sydd mewn ysbyty neu ofal preswyl

Mae rhai eithriadau i hyn:

• rydych yn gweithio mewn un wlad ond yn byw mewn gwlad wahanol
• rydych chi’n un o Weision y Goron wedi’i leoli dramor
• rydych chi wedi’ch anfon i weithio mewn gwlad arall yn Ardal Economaidd Ewrop (AEE)

Mae gwledydd Ardal Economaidd Ewrop fel a ganlyn: yr Almaen, Awstria, Bwlgaria, Cyprus, Denmarc, y Deyrnas Unedig, yr Eidal, Estonia, y Ffindir, Ffrainc, Groeg, Gwlad Belg, Gwlad yr Iâ, Gwlad Pwyl, Hwngari, yr Iseldiroedd, Iwerddon, Latfia, Liechtenstein, Lithwania, Lwcsembwrg, Malta, Norwy, Portiwgal, Romania, Sbaen, Slofacia, Slofenia, Sweden a'r Weriniaeth Tsiec.

Ymdrinnir â’r eithriadau yn yr adrannau isod.

Byw a gweithio mewn gwahanol wledydd

Fel arfer, dim ond os ydych chi’n byw yn y DU y gallwch gael Budd-dal Plant y DU, ond efallai y gallech ei gael hefyd os ydych chi’n byw yn un o wledydd AEE neu yn y Swistir.

Mewn rhai achosion, fodd bynnag, efallai y gallech hawlio lwfans plant gan y wlad lle’r ydych yn gweithio. Er enghraifft, efallai’ch bod yn byw yng Ngogledd Iwerddon ac yn gweithio yng Ngweriniaeth Iwerddon.

Os ydych chi’n byw yn y DU ond yn gweithio yn un o wledydd eraill AEE

Os ydych chi'n byw yn y DU ond eich bod yn gweithio mewn gwlad arall yn AEE neu yn y Swistir, efallai y gallech wneud cyfraniadau i gynllun nawdd cymdeithasol y wlad arall.

Os yw’r rhain yn hafal i Gyfraniadau Yswiriant Gwladol y DU, gallwch hawlio lwfans plant gan y wlad honno.

Os yw’r swm a gewch yn llai na chyfradd y DU o Fudd-dal Plant, gall y Swyddfa Budd-dal Plant dalu’r gwahaniaeth.

Os ydych chi’n byw yn un o wledydd eraill AEE ond yn gweithio yn y DU

Efallai y gallech ddal i gael Budd-dal Plant os ydych yn byw yn un o wledydd eraill AEE ac yn gweithio yn y DU. Does dim ots a ydych chi'n gyflogedig ynteu'n hunangyflogedig.

Os ydych chi’n cael lwfans plant gan y wlad lle’r ydych yn byw a bod y swm yn llai na chyfradd y DU o Fudd-dal Plant, gall y Swyddfa Budd-dal Plant dalu'r gwahaniaeth.

• Cael gwybod beth yw cyfraddau cyfredol y Budd-dal Plant

Os byddwch yn symud dramor yn barhaol

Os byddwch yn mynd dramor yn barhaol, neu’ch bod yn disgwyl bod i ffwrdd am fwy na 52 wythnos, ni fyddwch yn gymwys i gael Budd-dal Plant oni bai eich bod yn bodloni'r ddau amod isod:

• rydych yn symud i un o wledydd AEE neu i'r Swistir
• rydych yn talu Cyfraniadau Yswiriant Gwladol y DU neu’n cael budd-dal sy’n gysylltiedig ag Yswiriant Gwladol y DU

Mae gwledydd Ardal Economaidd Ewrop fel a ganlyn: yr Almaen, Awstria, Bwlgaria, Cyprus, Denmarc, y Deyrnas Unedig, yr Eidal, Estonia, y Ffindir, Ffrainc, Groeg, Gwlad Belg, Gwlad yr Iâ, Gwlad Pwyl, Hwngari, yr Iseldiroedd, Iwerddon, Latfia, Liechtenstein, Lithwania, Lwcsembwrg, Malta, Norwy, Portiwgal, Romania, Sbaen, Slofacia, Slofenia, Sweden a'r Weriniaeth Tsiec.

Bydd eich hawl i Fudd-dal Plant yn dod i ben ar y dydd Sul cyntaf ar ôl i chi adael y DU, neu ar y diwrnod ei hun os mai dydd Sul yw hwnnw.

Os yw’ch plentyn yn aros yn y DU a bod rhywun arall yn gofalu amdano, efallai y bydd y person hwnnw’n dymuno hawlio Budd-dal Plant.

Rhaid i chi roi gwybod i'r Swyddfa Budd-dal Plant os ydych chi'n bwriadu symud i fyw'n barhaol dramor neu os ydych yn debygol o fod i ffwrdd am fwy na blwyddyn.

• Rhoi gwybod ar-lein i’r Swyddfa Budd-dal Plant os ydych yn bwriadu symud i fyw’n barhaol dramor Opens new window

Os ydych chi’n byw yn un o wledydd eraill AEE ac yn cael budd-dal sy’n gysylltiedig ag Yswiriant Gwladol gan y DU

Fel arfer, gallwch gael Budd-dal Plant os yw’r ddau amod canlynol yn berthnasol:

• rydych yn byw yn un o wledydd AEE neu yn y Swistir ac yn cael budd-dal sy'n gysylltiedig ag Yswiriant Gwladol gan y DU, ee Pensiwn sylfaenol y Wladwriaeth
• rydych yn gyfrifol am blentyn

Os ydych chi’n cael lwfans plant gan y wlad lle’r ydych yn byw a bod y swm yn llai na chyfradd y DU o Fudd-dal Plant, gall y Swyddfa Budd-dal Plant dalu'r gwahaniaeth.

• Cael gwybod beth yw cyfraddau cyfredol y Budd-dal Plant

Os ydych yn un o weision sifil y DU neu'n aelod o Luoedd Arfog EM yn gwasanaethu dramor

Mae rheolau arbennig yn berthnasol i Weision y Goron – gweision sifil neu aelodau o’r lluoedd arfog sydd wedi’u lleoli ac yn gweithio dramor ar ran y llywodraeth.

Gallwch gael Budd-dal Plant tra byddwch yn gweithio dramor cyn belled â’ch bod yn bodloni un o’r amodau canlynol yn union cyn cael eich lleoli dramor:

• roeddech yn byw yn y DU ac yno’r oedd eich prif gartref
• roeddech yn y DU am resymau’n ymwneud â’ch lleoli – nid dim ond yn ymweld cyn dechrau eich gwaith dramor

Does dim ots a yw’ch plentyn yn mynd dramor gyda chi ynteu'n aros yn y DU.

Mwy o ddolenni defnyddiol

• Budd-dal Plant - pa newidiadau y bydd angen i chi roi gwybod amdanynt

• Budd-dal Plant os ydych yn dod o dramor neu’n mynd dramor (PDF 130K) Opens new window

• Cymorth gyda ffeiliau PDF

• Treth Incwm wrth adael y DU