Gwefan llywodraeth y DU

Beth mae'ch Hysbysiad Dyfarniad yn ei ddangos

Mae sawl adran i'ch Hysbysiad Dyfarniad. Mae'n dangos:

• gwybodaeth am eich Budd-dal Plant - faint gewch chi, ar ran pwy y caiff ei dalu, pryd fydd eich taliadau'n dechrau a sut cânt eu talu
• manylion am sut y cyfrifir eich Budd-dal Plant
• unrhyw wybodaeth bwysig arall am eich dyfarniad, er enghraifft a yw'n cynnwys unrhyw swm ychwanegol ar gyfer Lwfans Gwarcheidwad.
• beth i'w wneud os oes gennych gwestiwn am eich dyfarniad, neu os ydych chi'n anghytuno â rhywbeth

Mae'r hysbysiad dyfarniad yn cynnwys dalen ymateb y gallwch ei defnyddio i ddweud wrth y Swyddfa Budd-dal Plant am unrhyw newid yn eich amgylchiadau.

Mae'r wybodaeth ganlynol hefyd ar eich Hysbysiad Dyfarniad:

• rhif cyfeirnod eich Budd-dal Plant
• eich rhif Yswiriant Gwladol
• manylion cysylltu'r Swyddfa Budd-dal Plant

Os hoffech gysylltu â nhw, gwnewch yn siŵr bod gennych eich cyfeirnod Budd-dal Plant a'ch rhif Yswiriant Gwladol wrth law.

Sut y cyfrifir eich Budd-dal Plant gan y Swyddfa Budd-dal Plant

Mae dwy gyfradd wahanol o Fudd-dal Plant:

• cyfradd uwch ar gyfer eich plentyn hynaf neu'ch unig blentyn
• cyfradd is ar gyfer pob un o'ch plant eraill

Mae'r Swyddfa Budd-dal Plant yn cyfrifo'ch dyfarniad ar sail faint o blant yr ydych chi'n hawlio drostynt. Mae Lwfans Gwarcheidwad ychwanegol ar gael hefyd, os ydych chi'n gofalu am blentyn a gollodd ei rieni.

• Cyfraddau Budd-dal Plant

• Lwfans Gwarcheidwad - cael gwybod rhagor

Am faint allwch chi gael Budd-dal Plant?

Fel arfer, gallwch gael Budd-dal Plant nes bod eich plentyn yn 16 oed.

Weithiau, gallwch ddal i'w gael hyd 31 Awst sy'n dilyn eu pen-blwydd yn 16, ac am lawer hirach os yw'ch plentyn yn dal ati gyda'r addysg neu'r hyfforddiant perthnasol.

• Budd-dal Plant os yw eich plentyn yn 16 oed neu hŷn

• Budd-dal Plant os yw eich plentyn mewn addysg bellach neu hyfforddiant

Allwch chi ôl-ddyddio cais am Fudd-dal Plant?

All y Swyddfa Budd-dal Plant ddim ôl-ddyddio Budd-dal Plant am fwy na thri mis. Felly mae'n bwysig hawlio cyn gynted â phosib ar ôl i'ch plentyn gael ei eni, neu ar ôl i blentyn sydd dan eich cyfrifoldeb ddod i fyw gyda chi.

Er enghraifft, pe byddech chi'n gwneud cais am Fudd-dal Plant ddeufis ar ôl i'ch plentyn gael ei eni, gallai'r Swyddfa Budd-dal Plant ôl-ddyddio'ch dyfarniad hyd ddyddiad eu geni.

Ond os na wnewch chi gais tan y pedwerydd mis ar ôl y geni, dim ond am dri mis y gallant ôl-ddyddio'r dyfarniad, sef mis ar ôl dyddiad eu geni.

Manylion cyfrif banc

Gwnewch yn siŵr fod y Swyddfa Budd-dal Plant yn talu'ch Budd-dal Plant i'r cyfrif banc cywir - yr un a nodwyd gennych chi i'w ddefnyddio.

Os ydych chi'n dymuno newid y cyfrif hwn, bydd angen i chi roi gwybod iddynt cyn gynted â phosib.

• Cael gwybod sut mae newid manylion eich cyfrif banc ar gyfer taliadau Budd-dal Plant

Os bydd eich amgylchiadau'n newid

Rhaid i chi roi gwybod i'r Swyddfa Budd-dal Plant am unrhyw newidiadau a allai effeithio ar eich taliadau.

Gallai’r rhain gynnwys:

• babi newydd
• symud tŷ
• byw gyda rhywun gwahanol
• gadael y DU
• newid yn addysg eich plentyn
• eich plentyn yn symud i fyw gyda rhywun arall
• priodi
• gwahanu oddi wrth eich partner

• Budd-dal Plant - pa newidiadau y bydd angen i chi roi gwybod amdanynt

Cadw'ch Hysbysiad Dyfarniad

Mae'n syniad cadw'ch Hysbysiad Dyfarniad mewn rhywle diogel.

Efallai y bydd ei angen arnoch os byddwch yn gwneud cais am gymorth ariannol a bod angen i chi:

• roi tystiolaeth eich bod yn derbyn Budd-dal Plant
• rhoi rhif cyfeirnod eich Budd-dal Plant

Os nad ydych chi'n hapus â phenderfyniad y Swyddfa Budd-dal Plant

Gallwch ofyn iddynt egluro sut daethant i benderfyniad ynghylch eich Budd-dal Plant.

Bydd angen i chi wneud hyn o fewn mis i'r dyddiad sydd ar eich Hysbysiad Dyfarniad.

• Problemau gyda'ch Budd-dal Plant - ble i ddechrau

Mwy o ddolenni defnyddiol

• Budd-dal Plant - pryd ddylech chi ddisgwyl eich taliad cyntaf