Gwefan llywodraeth y DU

Newidiadau y mae'n rhaid i chi roi gwybod i ni o fewn mis

Mae'n rhaid i chi roi gwybod i Gyllid a Thollau EM am y newidiadau canlynol o fewn mis oherwydd gallant olygu y bydd eich taliadau credyd treth yn mynd yn is. Os na wnewch chi hyn efallai y bydd yn rhaid i chi dalu dirwy o hyd at £300. Bydd y gostyngiad yn eich taliadau'n cael eu hôl-ddyddio i'r dyddiad y digwyddodd y newid:

Mae'n rhaid i chi ddweud wrthynt os gwnaethoch hawlio credydau treth am y tro cyntaf:

• fel unigolyn – ond eich bod bellach wedi priodi neu mewn partneriaeth sifil, neu eich bod yn byw gyda rhywun
• fel rhan o gwpl - ond eich bod wedi gwahanu'n barhaol neu fod eich partner wedi marw

Bydd angen i chi ddweud wrthynt hefyd os byddwch chi neu'ch partner:

• yn gadael y DU am byth
• yn mynd dramor am gyfnod byr sy'n para mwy nag wyth wythnos - neu am fwy na 12 wythnos os ydych chi neu aelod o'r teulu yn cael eich trin am salwch, neu os oes rhywun yn eich teulu wedi marw
• yn colli eich hawl i breswylio yn y DU

• Credydau treth pan fydd eich partner yn gadael neu pan fydd partner newydd yn symud i mewn Opens new window
• A allwch hawlio credydau treth os ydych yn byw y tu allan i'r DU? Opens new window
• Mynd dramor dros dro a hawlio credydau treth Opens new window
• Pobl sydd newydd gyrraedd y DU a chredydau treth Opens new window

Os byddwch yn gweithio llai o oriau

Mae'n rhaid i chi roi gwybod i Gyllid a Thollau EM os byddwch yn rhoi'r gorau i weithio. Hyd yn oed os ydych yn hunangyflogedig neu os ydych yn gweithio i rywun arall.

Dywedwch wrthynt hefyd os ydych:

• yn gweithio o leiaf 16 awr yr wythnos a bod eich oriau'n gostwng i lai nag 16 awr
• yn gweithio o leiaf 30 awr yr wythnos a bod eich oriau'n gostwng i lai na 30 - os ydych yn gwpl a bod gennych blant, mae oriau gweithio'r ddau ohonoch gyda'i gilydd yn cyfrif tuag at y 30 awr
• ar streic - a'i bod wedi para mwy na 10 diwrnod gwaith yn olynol

• Newidiadau i'ch oriau gwaith arferol a chredydau treth Opens new window

Newidiadau i'r plant yr ydych yn gyfrifol amdanynt

Mae'n rhaid i chi roi gwybod i Gyllid a Thollau EM os bydd un o'ch plant yn gadael cartref i fynd i fyw at rywun arall. Mae hyn yn cynnwys plentyn:

• sy'n cael ei roi mewn gofal - neu ei roi i deulu maeth
• sydd wedi'i ddedfrydu i bedwar mis neu fwy o garchar neu yn y ddalfa

Hefyd bydd yn rhaid i chi ddweud wrth Gyllid a Thollau EM os bydd plentyn neu berson ifanc:

• yn gadael addysg llawn amser neu hyfforddiant cymaradwy hyd at 31 Awst ar ôl ei ben-blwydd yn 16 oed
• yn dechrau ar hyfforddiant a ddarperir fel rhan o'i swydd
• yn cael swydd gyflogedig a'u bod yn cael cyflog am weithio 24 awr yr wythnos neu fwy fel arfer
• yn dechrau hawlio Cymhorthdal Incwm, Budd-dal Analluogrwydd, Lwfans Ceisio Gwaith yn seiliedig ar Incwm neu gredydau treth ei hun

• Pa blant y gallwch hawlio credydau treth ar eu cyfer? Opens new window

Mae eich costau gofal plant yn gostwng

Os ydych wedi hawlio costau gofal plant mae'n rhaid i chi ddweud wrth Gyllid a Thollau EM os byddwch yn rhoi'r gorau i dalu am ofal plant.

Mae'n rhaid i chi roi gwybod i Gyllid a Thollau EM hefyd os:

• yw eich costau gofal plant yn gostwng o £10 yr wythnos neu fwy a bod y newid yn para am o leiaf pedair wythnos yn olynol
• nad yw'r sawl sy'n darparu eich gofal plant wedi'i gofrestru neu'i gymeradwyo bellach

• Newidiadau i drefniadau gofal plant a chredydau treth Opens new window

Newidiadau eraill y dylech roi gwybod i Gyllid a Thollau EM amdanynt

Mae hefyd yn syniad da rhoi gwybod i Gyllid a Thollau EM am unrhyw newidiadau a allai olygu y bydd eich taliadau credyd treth yn codi. Er nad oes angen i chi wneud hynny o fewn mis - byddai'n syniad da ei wneud ar unwaith oherwydd dim ond am hyd at dri mis y gellir ôl-ddyddio taliadau.

Newidiadau i nifer y plant yr ydych yn gyfrifol amdanynt

Dylech ddweud wrth Gyllid a Thollau EM os bydd nifer y plant yr ydych yn gyfrifol amdanynt yn newid. Er enghraifft, os:

• oes gennych fabi
• bydd plentyn neu berson ifanc yn ymuno â'ch teulu neu'n gadael, efallai oherwydd eich bod yn maethu neu'n mabwysiadu

• Babi newydd - pa gredydau treth y mae gennych hawl i'w cael? Opens new window

Newidiadau yn amgylchiadau'r plentyn neu berson ifanc yr ydych yn gyfrifol amdano

Dywedwch wrth Gyllid a Thollau EM os yw'r plentyn neu'r person ifanc yr ydych yn gyfrifol amdano:

• yn aros mewn addysg llawn amser - neu'n dechrau cwrs hyfforddiant cymeradwy – ar ôl iddo gyrraedd 16 oed, oni fyddwch yn dweud hynny wrthym, bydd ei gredydau treth yn dod i ben ar 31 Awst ar ôl ei ben-blwydd yn 16 oed
• yn gadael addysg llawn amser ond yn cofrestru gyda gwasanaeth gyrfaoedd - fel Connexions

• Mae eich plentyn yn cyrraedd 16 oed - a allwch barhau i hawlio credydau treth? Opens new window

Dylech ddweud wrth Gyllid a Thollau EM os:

• ydych yn dechrau talu am ddarparwr cofrestredig neu gymeradwy i ofalu am eich plentyn, gallwch gael rhywfaint o help gyda'r costau hyn drwy'r Credyd Treth Gwaith
• ydych eisoes yn cael help gyda'ch costau gofal plant drwy'r Credyd Treth Gwaith - a bod eich costau'n codi, rhowch wybod i Gyllid a Thollau EM os ydynt yn codi o £10 neu fwy yr wythnos - am o leiaf pedair wythnos

• Cymorth gyda chostau gofal plant - ydych chi'n gymwys

Newid yn eich cyflogaeth

Dywedwch wrth Gyllid a Thollau EM os byddwch yn newid eich swydd. Os ydych yn cael Credyd Treth Gwaith byddwch yn dal i'w gael ar yr amod nad yw'r bwlch rhwng gorffen un swydd a dechrau'r swydd newydd yn fwy na chwe diwrnod a'ch bod yn gymwys i gael credydau treth yn eich swydd newydd.

• Bylchau dros dro rhwng swyddi wrth hawlio credydau treth Opens new window

Newidiadau i'ch incwm

Mae'n bwysig dweud wrth Gyllid a Thollau EM ar unwaith os bydd eich incwm yn codi neu'n lleihau. Mae faint o gredydau treth y byddwch yn ei gael yn dibynnu ar faint o incwm sydd gennych yn dod i mewn.

Os disgwylir i'ch incwm ar gyfer y flwyddyn dreth bresennol fod yn is na'r llynedd, efallai y bydd gennych hawl cael credydau treth ychwanegol.

Os disgwylir i'ch incwm ar gyfer y flwyddyn dreth bresennol fod £25,000 yn uwch na'ch incwm ar gyfer y llynedd, efallai y cewch lai o gredydau treth.

Os nad ydych yn disgwyl i'ch incwm ar gyfer y flwyddyn bresennol fod yn fwy na £25,000 yn uwch na'ch incwm y llynedd, ni fydd yn gwneud gwahaniaeth i faint o gredydau treth y byddwch yn eu cael ar gyfer y flwyddyn bresennol. Fodd bynnag, mae'n dal yn syniad da rhoi gwybod i Gyllid a Thollau EM am y newid oherwydd bydd y cynnydd yn eich incwm yn cael ei ystyried:

• yn y flwyddyn ddilynol
• ar gyfer y taliadau a roddwyd i chi ar ôl mis Ebrill, ond cyn i chi adnewyddu eich cais

Os na fyddwch yn dweud wrth Gyllid a Thollau EM nes byddwch wedi adnewyddu eich credydau treth ar ôl diwedd y flwyddyn, efallai y byddant yn gofyn i chi dalu'r arian y maent wedi'i ordalu i chi yn ôl

• Newidiadau i incwm a chredydau treth Opens new window

Os bydd aelod o'ch teulu'n cael ei roi yn y carchar

Dylech ddweud wrth Gyllid a Thollau EM ar unwaith os byddwch chi neu'ch partner yn cael eich dedfrydu i garchar.

• Credydau treth os byddwch chi neu aelod o'r teulu yn mynd i'r carchar Opens new window

Newid cyfeiriad a manylion banc

Cysylltwch â Chyllid a Thollau EM hefyd os byddwch:

• yn symud tŷ - rhowch eich cyfeiriad newydd i Gyllid a Thollau EM
• yn newid eich rhif ffôn
• yn cael cyfrif banc neu gyfrif cymdeithas adeiladu gwahanol

Beth sy’n digwydd os na fyddwch chi'n rhoi gwybod am newid?

Mae'n bwysig iawn dweud wrth Gyllid a Thollau EM am unrhyw newidiadau ar unwaith. Os na wnewch chi hyn, efallai:

• y cewch ormod o arian a bydd yn rhaid i chi ei dalu'n ôl
• na fyddwch yn cael yr arian sy'n ddyledus i chi

Os bydd Cyllid a Thollau EM wedi talu gormod i chi, byddant naill ai:

• yn lleihau eich taliadau os ydych yn dal i gael credydau treth, neu
• yn gofyn i chi dalu'r swm llawn os nad ydych yn eu cael

Mae'n bosibl hefyd y bydd yn rhaid i chi dalu dirwy o hyd at £300.

• Nid ydych wedi rhoi gwybod am newid - beth sy'n digwydd i'ch credydau treth? Opens new window

Cysylltu â Chyllid a Thollau EM

Gallwch ddweud wrth Gyllid a Thollau EM am unrhyw newid mewn amgylchiadau drwy gysylltu â'r Llinell Gymorth Credydau Treth ar 0845 300 3900 neu ffôn testun 0845 300 3909 (ar agor rhwng 8.00 am a 8.00 pm, saith diwrnod yr wythnos ac eithrio ar Ddydd Nadolig, Gŵyl San Steffan, a Dydd Calan).

Os ydych dramor gallwch hefyd gysylltu â Chyllid a Thollau EM ar +44 02890 538 192

Mwy o ddolenni defnyddiol

• Sut mae newidiadau yn eich amgylchiadau gartref neu yn y gwaith yn effeithio ar eich credydau treth Opens new window
• Sut i osgoi cael gormod o gredydau treth Opens new window
• Cosbau credydau treth Opens new window