Gwefan llywodraeth y DU

Beth yw hysbysiad dyfarniad?

Mae tair rhan i'r hysbysiad dyfarniad:

• mae adran 1 yn sôn amdanoch chi
• mae rhan 2 yn egluro sut mae Cyllid a Thollau EM wedi cyfrifo eich credydau treth
• mae rhan 3 yn nodi faint y bydd Cyllid a Thollau EM yn ei dalu i chi

Mae'n rhoi gwybod i chi:

• y math neu'r mathau o gredydau treth y byddwch yn eu cael
• faint o arian gewch chi
• pa wybodaeth a roesoch i Gyllid a Thollau EM, a sut maent wedi defnyddio hyn i gyfrifo faint o arian i'w roi i chi
• pa newidiadau y bydd angen i chi roi gwybod i Gyllid a Thollau EM amdanynt, a phryd y bydd angen i chi ddweud wrthynt
• sut a phryd y byddant yn talu eich credydau treth

Byddwch yn cael rhestr wirio gyda'ch hysbysiad dyfarniad a fydd yn dweud wrthych pa wybodaeth y mae'n rhaid i chi ei gwirio a sut i roi gwybod i ni am unrhyw newidiadau.

Dylech gadw'r hysbysiad dyfarniad mewn lle diogel.

• Llwytho copi o restr wirio'r hysbysiad dyfarniad credydau treth (PDF, 40k) Opens new window
• Cymorth gyda ffeiliau PDF

Pryd y cewch hysbysiad dyfarniad?

Eich hysbysiad dyfarniad cyntaf

Bydd Cyllid a Thollau EM yn anfon hysbysiad dyfarniad atoch ar ôl i chi wneud cais am gredydau treth. Mae'r taliadau credydau treth yr ydych yn eu cael drwy gydol y flwyddyn yn rhai dros dro. Golyga hyn y cânt eu talu i chi drwy gydol y flwyddyn ar sail eich amgylchiadau presennol a'ch incwm o'r llynedd. Rhwng mis Ebrill a mis Mehefin bob blwyddyn bydd Cyllid a Thollau EM yn gofyn i chi adnewyddu eich cais, sy'n eu helpu i weld a yw'r taliadau y maent yn eu rhoi i chi'n gywir.

Hysbysiad dyfarniad diwygiedig

Bydd angen i chi roi gwybod i Gyllid a Thollau EM am unrhyw newidiadau yn eich amgylchiadau yn ystod y flwyddyn fel na fyddwch yn cael gormod o arian neu ddim digon mewn credydau treth. Er enghraifft, bydd angen i chi roi gwybod i Gyllid a Thollau EM os bydd eich perthynas â'ch partner yn dod i ben, neu os byddwch yn dechrau gweithio llai o oriau. Pan fyddwch yn gwneud hyn, neu pan fydd newidiadau eraill, bydd Cyllid a Thollau EM yn anfon hysbysiad dyfarniad credydau treth diwygiedig atoch. Byddant yn ceisio gwneud hyn o fewn 30 diwrnod ers i chi roi gwybod iddynt am y newid. Oni fyddwch yn cael un o fewn 30 diwrnod, dywedwch wrth Gyllid a Thollau EM cyn gynted â phosibl.

Hysbysiad dyfarniad terfynol

Ar ôl diwedd y flwyddyn bydd angen i chi adnewyddu eich cais am gredydau treth. Mae hyn yn helpu Cyllid a Thollau EM i weld a yw'r taliadau y maent wedi'u rhoi i chi yn gywir ar sail eich amgylchiadau gwirioneddol. Weithiau bydd Cyllid a Thollau EM wedi talu gormod i chi neu ddim digon. Os bydd hyn yn digwydd byddant naill ai'n addasu eich taliadau, neu os ydych wedi cael gormod o arian ond nad ydych yn cael credydau treth bellach, byddant yn gofyn i chi wneud taliad uniongyrchol - un taliad ar gyfer y swm llawn.

Pan fyddwch wedi adnewyddu eich cais am gredydau treth, bydd Cyllid a Thollau EM yn anfon hysbysiad dyfarniad atoch gyda'r penderfyniad terfynol ar gyfer y flwyddyn a ddaeth i ben ar 5 Ebrill. Er bod y penderfyniad yn derfynol, mae'n rhaid i chi ddarllen yr hysbysiad dyfarniad yn ofalus o hyd a rhoi gwybod i Gyllid a Thollau EM os oes unrhyw beth ar goll, yn anghywir neu'n anghyflawn.

Anfonir hysbysiad dyfarniad ar wahân atoch hefyd, yn rhoi gwybod i chi y bydd eich taliadau yn mynd rhagddynt.

Mewn rhai achosion ni fydd yn rhaid i chi ymateb i'ch pecyn adnewyddu oherwydd:

• nid oes unrhyw beth wedi newid yn eich sefyllfa bersonol
• mae eich incwm yn dal o fewn y terfynau a ddangosir yn hysbysiad eich Adolygiad Blynyddol
• nid oes camgymeriadau neu fanylion ar goll yn hysbysiad eich Adolygiad Blynyddol

Yn yr achosion hyn, caiff eich credydau treth eu hadnewyddu'n awtomatig, a dangosir eich penderfyniad terfynol ar hysbysiad yr Adolygiad Blynyddol a oedd yn eich pecyn adnewyddu. Ni fyddwch yn cael rhagor o hysbysiadau dyfarniad oni fydd eich amgylchiadau'n newid.

• Ad-dalu credydau treth sydd wedi'u gordalu
• Pam fod rhaid i chi adnewyddu eich cais am gredydau treth Opens new window

Beth ddylech ei wneud pan fyddwch yn cael hysbysiad dyfarniad

Cyfrifoldeb Cyllid a Thollau EM yw rhoi'r wybodaeth gywir ar eich hysbysiad dyfarniad ar sail y wybodaeth a roesoch iddynt. Mae'n bwysig eich bod yn darllen yr hysbysiad dyfarniad pan fyddwch yn cael un. Defnyddiwch y rhestr wirio a ddaeth gydag ef i ddweud wrth Gyllid a Thollau EM os oes unrhyw beth yn anghywir, ar goll neu'n anghyflawn, neu os nad ydych yn deall rhywbeth. Gallwch wneud hyn drwy ffonio'r Llinell Gymorth Credyd Treth. Dylech wneud hyn o fewn mis ers cael hysbysiad dyfarniad.

Rhoi gwybod i ni am unrhyw newidiadau

Os byddwch yn aros cyn rhoi gwybod i Gyllid a Thollau EM os oes rhywbeth o'i le, gall olygu nad ydych yn cael yr holl arian y mae gennych yr hawl i'w gael, neu gallech fod yn cronni gordaliad y bydd yn rhaid i chi ei dalu'n ôl.

Cysylltwch â'r Llinell Gymorth Credyd Treth os oes angen help arnoch gyda'ch hysbysiad dyfarniad, er enghraifft:

• nid ydych yn deall y wybodaeth a ddangosir
• nid ydych yn siŵr os yw Cyllid a Thollau EM wedi gwneud camgymeriad
• nid ydych wedi cael un o fewn mis ers i chi ddweud wrth Gyllid a Thollau EM am y newid yn eich amgylchiadau
• Os byddwch yn rhoi gwybod i Gyllid a Thollau EM bod camgymeriad ar eich hysbysiad dyfarniad, byddant yn ei gywiro ac yn anfon un newydd atoch. Os bydd hyn yn digwydd, efallai na fydd yn rhaid i chi dalu unrhyw ordaliad yn ôl.

Gwirio eich taliadau credyd treth

Mae hefyd yn bwysig sicrhau faint o arian sy'n mynd i mewn i'ch cyfrif banc. Bydd Rhan o'ch hysbysiad dyfarniad - Dyddiadau taliadau a symiau - yn dangos eich taliad cyntaf, yn ogystal â'r swm fydd yn cael ei dalu bob wythnos neu bob pedair wythnos. Os na fydd eich taliad yn cyd-fynd â'r swm ar eich hysbysiad dyfarniad, ffoniwch y Llinell Gymorth Credyd Treth cyn gynted â phosibl.

Cysylltu â Chyllid a Thollau EM

Gallwch gysylltu â'r Llinell Gymorth Credydau Treth ar 0845 300 3900 neu ffôn testun 0845 300 3909 (ar agor rhwng 8.00 am a 8.00 pm, saith diwrnod yr wythnos ac eithrio ar Ddydd Nadolig, Gŵyl San Steffan, a Dydd Calan

Mwy o ddolenni defnyddiol

• Credydau treth - hawliau a chyfrifoldebau Opens new window