Gwefan llywodraeth y DU

Pryd y gallech chi fod wedi talu gormod o dreth drwy eich gwaith?

Efallai y byddwch wedi talu gormod o dreth:

• os ydych wedi dechrau swydd newydd ac wedi cael cod treth brys am gyfnod
• os oedd eich cyflogwr yn defnyddio'r cod treth anghywir
• os oeddech yn gyflogedig am ran o'r flwyddyn yn unig
• os ydych yn fyfyriwr a dim ond wedi gweithio yn ystod y gwyliau a heb lenwi ffurflen P38S Myfyrwyr Cyflogedig
• os oedd gennych fwy nag un swydd ar yr un pryd
• os yw unrhyw incwm arall sydd gennych, a'n bod yn ei drethu drwy'ch cod treth ee incwm o gynilion/buddsoddiad, wedi lleihau ers i chi roi gwybod i Gyllid a Thollau EM yn ei gylch ddiwethaf - sy'n golygu bod swm yr incwm a gynhwysir yn eich cod treth yn rhy uchel
• os oeddech wedi rhoi'r gorau i weithio a heb gael unrhyw enillion na budd-daliadau trethadwy am weddill y flwyddyn
• os newidiodd eich amgylchiadau - er enghraifft fe newidioch o fod yn gweithio'n llawn amser i ran-amser neu daethoch yn hunangyflogedig

Codau treth a Thalu Wrth Ennill (PAYE)

Cyhoeddir eich cod treth gan eich Swyddfa Dreth a chaiff ei seilio ar wybodaeth sydd ganddynt am eich incwm a'ch hawl i lwfansau. Fe welwch y cod ar eich Hysbysiad Cod PAYE (a anfonir at rai pobl ar ddechrau'r flwyddyn), ar eich P45 neu ar eich slip cyflog. Mae'n dweud wrth eich cyflogwr faint o dreth i'w ddidynnu o'ch cyflog cyn i chi gael eich talu. Gelwir y ffordd hon o dalu treth yn Dalu Wrth Ennill.

Os oes gennych amryw swyddi neu waith a'ch bod yn cael pensiwn, efallai bod gennych fwy nag un cod treth. Mae'n bwysig gwybod beth mae'ch cod treth yn ei olygu fel y gallwch wneud yn siŵr eich bod yn talu'r swm cywir o dreth.

• Codau treth - gwybodaeth sylfaenol

• Os oes gennych fwy nag un cod treth

• Deall eich Hysbysiad Cod PAYE

Sut mae adhawlio gordaliadau Talu Wrth Ennill - eleni

Bydd y modd y byddwch yn adhawlio treth eleni yn dibynnu ar eich amgylchiadau.

Os ydych yn gweithio

Dywedwch wrth Swyddfa Dreth eich cyflogwr pam eich bod yn meddwl eich bod wedi talu gormod o dreth. Efallai y bydd popeth sydd arnynt ei angen i wirio'ch hawliad ganddynt yn barod. Os na, cewch wybod pa ddogfennau i'w hanfon. Efallai y cewch god treth newydd, a bydd unrhyw ad-daliad yn cael ei dalu gyda'ch cyflog.

Os ydych chi wedi dod yn ddi-waith neu wedi ymddeol

Os buoch chi'n gweithio ond eich bod wedi dod yn ddi-waith neu wedi ymddeol yn ddiweddar, gallech hawlio'ch ad-daliad treth.

• Sut mae hawlio ad-daliad treth pan fyddwch yn rhoi'r gorau i weithio

Sut mae adhawlio gordaliadau Talu Wrth Ennill - blynyddoedd blaenorol

Ysgrifennwch at eich Swyddfa Dreth gan gynnwys dogfennau perthnasol am eich enillion yn ystod y flwyddyn dreth yr ydych yn hawlio ar ei chyfer, megis:

• P60, P45
• gwybodaeth am hanes eich cyflogaeth a budd-daliadau

Byddant yn ymchwilio i'ch ymholiad, yn cyfrifo faint sy'n ddyledus i chi ac yn anfon ad-daliad atoch yn y post.

Os ydych wedi ordalu treth mae’n rhaid i chi ei hawlio yn ôl cyn

31 Ionawr bum mlynedd ar ôl diwedd y flwyddyn dreth (5 Ebrill) pan wnaethpwyd y gor-daliad. Er enghraifft, rhaid i hawliad ar gyfer y flwyddyn dreth 2003-04 a ddaeth i ben ar 5 Ebrill 2004 gael ei wneud erbyn 31 Ionawr 2010.

• Manylion cyswllt ar gyfer pob Swyddfa Dreth Opens new window

Sut mae adhawlio treth Hunanasesu a ordalwyd

Os ydych chi'n credu eich bod wedi talu gormod o dreth wrth Hunanasesu, cliciwch ar y ddolen isod er mwyn cael gwybod sut i'w adhawlio.

Os oes ad-daliad treth yn ddyledus i chi bydd Cyllid a Thollau EM yn ei ad-dalu un ai drwy ei roi yn eich cyfrif Hunanasesu er mwyn ei ddefnyddio yn erbyn biliau treth yn y dyfodol, neu drwy drosglwyddiad banc neu drwy siec.

• Cael gwybod mwy am adhawlio treth drwy Hunanasesu

Mwy o ddolenni defnyddiol

• Gweithio a thalu treth

• Adhawlio treth os ydych chi wedi gordalu drwy'ch pensiwn Opens new window