Gwefan llywodraeth y DU

Llenwi'r ffurflen fer

Os yw'ch materion treth yn gymharol syml efallai y byddwch yn gymwys ar gyfer y ffurflen dreth fer yn hytrach na'r un lawn, sy'n hirach. Os ydych chi, bydd Cyllid a Thollau Ei Mawrhydi yn ei anfon atoch.

Dim ond pedair tudalen o hyd yw'r ffurflen dreth fer a bydd y nodiadau a ddaw gyda hi yn eich helpu i'w llenwi. Ni ellir ei chyflwyno ar-lein. Os byddai'n well gennych gyflwyno eich ffurflen dreth ar-lein bydd yn rhaid i chi lenwi'r ffurflen lawn yn hytrach na'r un fer.

Mae'r cofnodion y bydd eu hangen arnoch i lenwi'r ffurflen fer yn debyg i'r rheini y bydd eu hangen arnoch ar gyfer tudalennau craidd y ffurflen dreth lawn. I gael gwybod mwy ewch i 'Cam tri - llenwi'r tudalennau craidd'.

• Mwy am y ffurflen dreth fer Opens new window

Ffeilio'ch ffurflen dreth ar-lein

Gallwch lenwi'r ffurflen dreth lawn ar bapur neu gallwch ei chwblhau ar-lein. Os byddwch yn cyflwyno'r ffurflen ar-lein bydd y meddalwedd yn cyfrifo unrhyw dreth sy'n daladwy yn awtomatig ac yn cydnabod ein bod wedi cael eich ffurflen ar unwaith. Bydd gennych hefyd fwy o amser i ffeilio'r ffurflen na phetaech yn defnyddio ffurflen bapur - bydd gennych tan 31 Ionawr ar ôl diwedd y flwyddyn dreth yn hytrach na 31 Hydref. Bydd angen i chi gofrestru ar gyfer Gwasanaethau Ar-lein ar wefan Cyllid a Thollau EM os ydych chi'n dymuno cyflwyno'ch ffurflen ar-lein.

• Deall a defnyddio Hunanasesu Ar-lein

Y prif gamau ar gyfer llenwi'r ffurflen dreth lawn

Mae fersiwn bapur y brif ffurflen dreth yn cynnwys dwy ffurflen graidd (SA100 ac SA101) yn ogystal â thudalennau atodol (er enghraifft, ar gyfer incwm o gyflogaeth neu incwm o eiddo) wedi'u teilwra ar gyfer eich anghenion chi. Os byddwch yn cael y ffurflen dreth lawn bydd angen i chi wneud y canlynol:

• gwneud yn siŵr eich bod wedi cael y tudalennau cywir - gyda ffurflen bapur
• casglu'r holl waith papur a'r cofnodion angenrheidiol
• llenwi'r tudalennau craidd a'r tudalennau gwybodaeth ychwanegol sy'n berthnasol i chi
• llenwi unrhyw dudalennau atodol sy’n berthnasol i chi
• anfon y ffurflen wedi'i chwblhau i'ch Swyddfa Dreth erbyn y dyddiad cau

• Dychwelyd eich ffurflen dreth - dyddiadau cau a chosbau - darllen y dyddiadau cyfredol

Cam un - gwnewch yn siŵr bod y tudalennau cywir gennych

Os ydych yn ffeilio ar-lein

Os ydych yn ffeilio ar-lein, dewiswch y tudalennau atodol y bydd eu hangen arnoch. Mae meddalwedd Cyllid a Thollau EM yn darparu'r rhan fwyaf (ond nid pob un) o'r tudalennau atodol ar-lein. Fodd bynnag, efallai y bydd modd i chi gyflwyno'r tudalennau hyn drwy ddefnyddio meddalwedd gan gyflenwyr eraill.

• Meddalwedd ar gyfer cyflwyno ffurflen dreth - gweld pa dudalennau atodol y gellir eu llenwi ar-lein drwy ddefnyddio meddalwedd Cyllid a Thollau EM a meddalwedd gan gyflenwyr eraill

Os ydych yn llenwi ffurflen bapur

Os ydych yn llenwi ffurflen dreth bapur bydd yn rhoi gwybod i chi a oes angen i chi lenwi unrhyw dudalennau atodol ai peidio. Gallwch lwytho unrhyw dudalennau sydd ar goll yn ogystal â nodiadau cynorthwyo oddi ar wefan Cyllid a Thollau EM.

• Cael ffurflen dreth Hunanasesu Opens new window

Cam dau - llenwi'r tudalennau atodol

Bydd arnoch angen cofnodion sy'n ymwneud â'r canlynol ar gyfer y flwyddyn dreth berthnasol (6 Ebrill i'r 5 Ebrill wedyn):

• eich cyflogaeth
• cyfraniadau pensiwn y byddwch yn eu gwneud neu unrhyw bensiwn a gewch
• incwm a gallech ei gael o osod eiddo neu dir
• unrhyw golledion neu enillion cyfalaf yr ydych wedi'u gwneud yn ystod y flwyddyn dreth

• Cadw cofnodion (unigolion a chyfarwyddwyr)
• Cadw cofnodion - darllen arweiniad cyffredinol Opens new window

Cam tri - llenwi'r tudalennau craidd a'r tudalennau gwybodaeth ychwanegol

Pa waith papur y bydd ei angen arnoch

Bydd arnoch angen cofnodion o'r canlynol ar gyfer y flwyddyn dreth berthnasol:

• cynilion a buddsoddiadau yn y DU
• pensiynau, blwydd-daliadau a buddion yn y DU
• enillion yswiriant bywyd ac ad-daliadau Cyfraniadau Gwirfoddol Ychwanegol (AVCs)
• unrhyw incwm trethadwy arall

• Cadw cofnodion (unigolion a chyfarwyddwyr) - dysgu mwy

Gostyngiadau, lwfansau ac ad-daliadau benthyciadau myfyrwyr

Os ydych yn dymuno hawlio gostyngiadau ar gyfer blwydd-dal ymddeol a chyfraniadau pensiwn ac ar gyfer costau megis rhoddion i elusen, bydd angen cofnodion arnoch yn dangos eich bod wedi gwneud y taliadau hyn.

Os ydych chi'n ad-dalu benthyciad myfyrwyr a bod eich incwm dros £15,000, gallwch wneud y taliadau naill ai drwy'r system Hunanasesu neu'r system Talu Wrth Ennill, ynghyd ag unrhyw gyfraniadau Yswiriant Gwladol a threth.

Manylion banc a chysylltu

Bydd Cyllid a Thollau EM yn gofyn i chi am y canlynol:

• rhif ffôn fel y gall eich Swyddfa Dreth ddelio gydag ymholiadau syml yn gyflym
• manylion banc os ydych am i unrhyw dreth gael ei had-dalu'n syth i'ch cyfrif (argymhellir hyn)
  

• Pa gofnodion y dylai landlordiaid eu cadw - dysgu mwy

Beth sy’n digwydd os nad yw'r union ffigurau gennych?

Os nad yw'r union ffigurau gennych gallwch ddefnyddio:

• amcangyfrif - ffigur yr ydych am i Gyllid a Thollau EM ei dderbyn fel eich ffigur terfynol
• ffigur dros dro - un yr ydych am ei ddefnyddio nes gallwch gadarnhau yr union swm (rhaid i chi ddweud wrth Gyllid a Thollau EM pryd y byddwch yn darparu'r union ffigurau)

Defnyddiwch yr adran 'Gwybodaeth ychwanegol' i ddweud sut cawsoch y ffigurau hyn a pham na allwch ddefnyddio'r union ffigurau. Os byddwch yn gwneud addasiadau yn nes ymlaen ac nad ydych wedi talu digon o dreth efallai y bydd yn rhaid i chi dalu llog a chosbau.

Y dyddiad cau ar gyfer dychwelyd eich ffurflen dreth

O fis Ebrill 2008 (ar gyfer ffurflen dreth 2007-08) mae'r dyddiadau cau wedi newid:

• rhaid i chi anfon ffurflenni treth papur atom erbyn 31 Hydref (neu 3 mis ar ôl dyddiad cyflwyno'r rhybudd - pa un bynnag yw'r hwyraf)
• os byddwch yn anfon ffurflen dreth i ni ar-lein mae gennych tan 31 Ionawr (neu 3 mis ar ôl dyddiad cyflwyno'r rhybudd - pa un bynnag yw'r hwyraf)

Ni ddarparir derbynebau ar gyfer ffurflenni treth papur. Os ydych chi’n ffeilio ar-lein, cewch gydnabyddiaeth ar y sgrin yn syth bod Cyllid a Thollau EM wedi derbyn eich ffurflen.

Osgoi camgymeriadau cyffredin

Er mwyn sicrhau y gall Cyllid a Thollau EM brosesu'ch ffurflen yn gyflym:

• gwnewch yn siŵr eich bod yn llofnodi ffurflen bapur ac yn rhoi dyddiad arni
• gwnewch yn siŵr eich bod wedi llenwi ac wedi cynnwys unrhyw dudalennau atodol y mae eu hangen
• peidiwch â chynnwys nodiadau ar y ffurflen, fel 'gwybodaeth i ddod'

Gall ffeilio ar-lein eich helpu i osgoi gwneud camgymeriadau. Dilynwch y ddolen isod i gael gwybod sut mae cofrestru a ffeilio eich ffurflen dreth ar-lein

Os cewch broblemau wrth lenwi'ch ffurflen dreth

Os oes angen help arnoch gallwch ffonio'r Llinell Gymorth Hunanasesu ar 0845 900 0444. Mae ar agor rhwng 8.00 am ac 8.00 pm bob dydd, ac eithrio ar Ddydd Nadolig, Gŵyl San Steffan a Dydd Calan.