Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Arian, treth a budd-daliadau

Arian, treth a budd-daliadau

Costau a lwfansau ar incwm o eiddo

Os ydych yn gosod eiddo, gallwch ddidynnu rhai costau a lwfansau treth o'ch incwm rhent i gyfrifo'ch elw trethadwy (neu golled). Os ydych yn gosod sawl eiddo preswyl yn y DU, gallwch gronni'ch incwm a'ch costau gyda'i gilydd. Ond rydych yn cyfrifo'ch elw o osod llety gwyliau a gosod llety tramor ar wahân.

Costau a ganiateir

Mae'r costau y gallwch eu didynnu o incwm gosod (onid yw'n dod o dan y cynllun Rhentu Ystafell) yn cynnwys:

  • ffioedd yr asiant gosod
  • ffioedd cyfreithiol am osod eiddo am flwyddyn neu lai, neu ar gyfer adnewyddu prydles am lai na 50 mlynedd
  • ffioedd cyfrifydd
  • yswiriant adeiladau a chynnwys
  • llog ar fenthyciadau ar yr eiddo
  • cynnal a chadw a gwaith atgyweirio (ond nid gwelliannau)
  • biliau'r prif wasanaethau (nwy, dwr, trydan ayb)
  • rhent, rhent daear a thaliadau gwasanaeth
  • Treth Cyngor
  • gwasanaethau yr ydych chi'n talu amdanynt, megis glanhau neu arddio
  • costau uniongyrchol eraill gosod yr eiddo, megis galwadau ffôn, papur pennawd, hysbysebu

Os yw eich incwm blynyddol o osod yn llai na £15,000 (cyn didynnu costau) rydych yn cynnwys cyfanswm eich costau ar eich ffurflen dreth; os yw'n £15,000 neu fwy bydd angen ichi eu darparu ar wahân.

Cofiwch mai dim ond costau sy'n ymwneud â rhedeg eich busnes gosod eiddo yn unig y gallwch eu hawlio. Os yw'r gost ond yn rhannol ar gyfer rhedeg eich busnes (neu os ydych yn defnyddio'r eiddo eich hun) efallai mai dim ond rhan ohoni y gallwch ei hawlio.

Costau nas caniateir

Wrth ichi gyfrifo'ch elw, allwch chi ddim didynnu:

  • costau 'cyfalaf', megis dodrefn neu'r eiddo ei hun
  • costau personol - costau nad oes a wnelont â'ch busnes gosod
  • unrhyw golled a wnewch wrth werthu'r eiddo

Ond efallai y gallwch hawlio rhai mathau o lwfansau.

Lwfansau a all ostwng eich elw trethadwy

Efallai y gallwch hawlio gwahanol fathau o lwfansau ar gyfer eich costau cyfalaf. Mae costau cyfalaf yn cynnwys yr hyn y byddwch yn ei wario ar asedau megis dodrefn a pheiriannau. Mae'r lwfansau y gallwch eu hawlio ar gyfer rhai o'ch costau cyfalaf yn amrywio yn ôl y math o eiddo a osodir.

Eiddo preswyl wedi'i ddodrefnu a osodir yn y DU a thramor

Ar gyfer dodrefn a chyfarpar a ddarperir wrth osod eiddo preswyl wedi'i ddodrefnu (heb gynnwys llety gwyliau wedi'i ddodrefnu yn y DU) gallwch hawlio lwfans 'traul'. Mae'r lwfans yn 10 y cant o'r 'rhent net' - sef y rhent a dderbynnir llai unrhyw gostau a dalwch y byddai tenant yn eu talu fel arfer.

Yn hytrach na'r lwfans traul, gallwch hawlio lwfans 'adnewyddu'. Mae hwn ar gyfer cost newid darnau o ddodrefn neu gyfarpar am rai newydd gan gynnwys eitemau bychain megis cytleri. I'w gyfrifo, cymerwch gost yr eitem newydd a didynnu ohoni:

  • y swm a gawsoch am werthu'r hen eitem (os cawsoch unrhyw beth amdano)
  • unrhyw beth yn ychwanegol y taloch am eitem well

Unwaith ichi ddewis pa un o'r ddau lwfans i'w hawlio ar gyfer eiddo, allwch chi ddim newid rhyngddynt o flwyddyn i flwyddyn.

Gosod llety gwyliau wedi'i ddodrefnu yn y DU

Ar gyfer y math hwn o fusnes gosod, gallwch hawlio 'lwfans cyfalaf' ar gyfer cost pob eitem o ddodrefn a chyfarpar yr ydych yn eu darparu gyda'r eiddo. Neu gallwch hawlio lwfans adnewyddu (a esbonnir uchod). Allwch chi ddim hawlio lwfansau traul

Unwaith ichi wneud y dewis ar gyfer pob eitem, rhaid ichi lynu wrtho.

I weld sut mae lwfansau cyfalaf yn gweithio, darllenwch yr adran isod: 'Faint o lwfans cyfalaf y gallwch ei hawlio?'

Pob eiddo a osodir

Pa fath bynnag o fusnes gosod eiddo sydd gennych, gallwch hawlio lwfans cyfalaf ar gyfer cost y pethau sydd eu hangen arnoch i redeg y busnes gosod eiddo, megis offer glanhau a garddio. Gallwch hawlio hefyd am gyfarpar nad yw'n cael ei ddefnyddio ar gyfer un eiddo a osodir yn unig, megis boeler sy'n gwresogi mwy nag un eiddo.

Faint o lwfans cyfalaf y gallwch ei hawlio?

Mae'r lwfans yn dibynnu ar yr hyn yr ydych yn ei brynu. Fel arfer gallwch hawlio 50 y cant o'r gost pan fyddwch yn ei brynu - ond weithiau gall fod yn 100 y cant ar gyfer rhai mathau o wariant sy'n gyfeillgar i'r amgylchedd. Bob blwyddyn ar ôl hynny gallwch hawlio 25 y cant o'r hyn sy'n weddill. O bryd i'w gilydd, mae Cyllid a Thollau EM yn newid y canrannau. Didynnir y lwfans ynghyd â chostau eraill wrth gyfrifo'ch elw

Byddwch yn cael lwfansau llai os ydych yn defnyddio'r eitem yn breifat neu ar gyfer unrhyw beth arall ar wahân i'ch busnes.

I ba flwyddyn y mae costau'n perthyn iddi?

Rhaid ichi ddyrannu'r costau i'r flwyddyn y maent yn berthnasol iddi - nid oes ots pryd yn union y byddwch yn eu talu. Weithiau efallai y bydd yn rhaid ichi ddyrannu rhan o'ch cost i un flwyddyn a rhan i flwyddyn arall.

Colledion

Fel arfer, os yw eich busnes gosod yn gwneud colled, gallwch ei gario ymlaen i flwyddyn arall a'i osod yn erbyn unrhyw elw a wnewch yn y dyfodol o'r un busnes. Os ydych yn gosod llety gwyliau yn y DU, gallwch osod eich colled o'r busnes hwnnw yn erbyn eich holl incwm arall, nid eich incwm o eiddo yn unig.

Yn yr adran hon...

Additional links

Allweddumynediad llywodraeth y DU