Gwefan llywodraeth y DU

Adnewyddu eich llun

Gyda ffurflen gais i adnewyddu

Bydd yr Asiantaeth Trwyddedu Gyrwyr a Cherbydau (DVLA) yn anfon pecyn gwneud cais i adnewyddu atoch ddeufis cyn y dyddiad y bydd oes y llun yn dod i ben. Bydd angen i chi wneud y canlynol:

• llenwi'r ffurflen amgaeedig
• cynnwys llun newydd o fath pasport ohonoch eich hun, a hwnnw wedi'i dynnu yn y mis diwethaf (does dim angen llofnodi cefn y llun)
• dychwelyd dwy ran eich trwydded yrru cerdyn-llun a'r ddogfen manylion
• amgáu siec neu archeb bost am £17.50 (does dim angen talu ffi os oes gennych drwydded cyfnod byr am resymau meddygol neu os ydych yn 70 oed neu'n hŷn)
• anfon eich ffurflen gais wedi'i llenwi a'r ffi i DVLA, Abertawe SA99 1DH.

Os ydych chi wedi newid eich enw, bydd angen i chi hefyd ddarparu dogfennau i brofi pwy ydych chi.

• Newid yr enw ar eich trwydded yrru
• Dogfennau adnabod a'r gofynion ar gyfer y llun

Heb ffurflen gais i adnewyddu

Os na fyddwch, am unrhyw reswm, yn cael y ffurflenni cais i adnewyddu, gallwch ddefnyddio ffurflen D1, sef ‘cais am drwydded yrru’. Mae hon ar gael gan wasanaeth archebu ffurflenni DVLA, ac o ganghennau Swyddfa'r Post®. Gallwch weld ar ba ddyddiad y bydd oes eich llun yn dod i ben yn adran 4b ar flaen eich trwydded yrru.

• Gwasanaeth archebu ffurflenni DVLA Opens new window

Llythyrau atgoffa eraill

Bydd y DVLA hefyd yn rhoi gwybod i chi os yw'n amser adnewyddu'ch llun pan fydd yn anfon llythyr atgoffa atoch i adnewyddu'ch hawl i yrru. Anfonir llythyr atgoffa atoch pan fydd yn amser i chi:

• adnewyddu ar ôl gwaharddiad
• adnewyddu pan fyddwch yn 70 oed neu'n hŷn
• adnewyddu eich hawl i yrru lori neu fws
• adnewyddu am resymau meddygol

Pryd fydd eich trwydded yn cyrraedd

Nod DVLA yw sicrhau eich bod yn cael eich trwydded yrru newydd o fewn tair wythnos i dderbyn eich cais. Bydd yn cymryd mwy o amser os oes rhaid iddynt archwilio cyflwr eich iechyd neu'ch manylion personol. Gadewch o leiaf dair wythnos i’ch trwydded yrru gyrraedd cyn cysylltu â'r DVLA.

Pan fyddwch yn cael eich trwydded, bydd ganddi nifer o nodweddion diogelwch ychwanegol. Un o'r prif newidiadau ar y drwydded yw'r llun du a gwyn ohonoch a grëir gan laser.

• Egluro’r drwydded yrru cerdyn-llun

Gyrru cyn i'ch trwydded gael ei dychwelyd

Cewch yrru cyn cael eich trwydded, cyn belled â bod y canlynol yn wir:

• mae gennych drwydded Gwledydd Prydain neu drwydded Gogledd Iwerddon, neu drwydded gyfnewid arall, a honno gennych er 1 Ionawr 1976
• nid ydych wedi'ch gwahardd rhag gyrru
• nid yw DVLA wedi gwrthod rhoi trwydded i chi am resymau meddygol neu am fethu â chydymffurfio ag ymholiadau meddygol
• ni fyddai DVLA yn gwrthod rhoi trwydded i chi am resymau meddygol (os oes gennych amheuaeth, holwch eich meddyg)
• rydych yn bodloni unrhyw amodau arbennig sy’n berthnasol i'r drwydded