Gwefan llywodraeth y DU

Gofynion sylfaenol ar gyfer cerbyd prawf

Mae'n rhaid i chi ddefnyddio peiriant addas ar gyfer y prawf ymarferol sy'n bodloni'r gofynion safonol ar gyfer prawf cerbyd. Rhaid ichi ddefnyddio'r un beic modur ar gyfer y ddau fodiwl.

• Gofynion sylfaenol ar gyfer mopedau a beiciau modur sy'n gerbydau prawf

Gwisgo'r dillad cywir

Bydd angen i chi wisgo'r dillad cywir ar gyfer y ddau fodiwl. Caiff arholwyr wrthod cynnal y prawf os byddant yn credu nad yw'r math o ddillad yr ydych yn eu gwisgo yn eich amddiffyn ddigon rhag anaf.

Ceir eithriad i'r gofyniad helmed ddiogelwch ar gyfer dilynwyr crefydd Sikh os ydynt yn gwisgo twrban.

Modiwl un

Bydd angen i chi ddarparu’r dogfennau dilys canlynol:

• eich trwydded yrru gyda'r hawl dros dro cywir - y cerdyn llun a'r ddogfen manylion neu basport dilys y DU i gyd-fynd â thrwydded bapur
• eich tystysgrif hyfforddiant sylfaenol gorfodol (CBT) (DL196)
• eich tystysgrif y prawf theori beic modur

Os ydych yn uwchraddio trwydded moped lawn a gafwyd drwy basio prawf dwy ran ers mis Rhagfyr 1990, neu os ydych yn gwneud y llwybr mynediad cyflym, cewch eich eithrio o'r CBT a'r prawf theori.

Mae modiwl un yn cynnwys y symudiadau penodol isod ac mae'n cymryd tua 20 munud i'w gwblhau fel arfer:

• gwthio'r peiriant a defnyddio'r stand
• gwneud slalom a siâp rhif wyth
• troi cornel, osgoi peryglon a stopio dan reolaeth
• tro pedol
• gyrru'n araf
• stop brys

Ceir gofyniad cyfyngiad cyflymder o 50 cilometr yr awr (tua 32 milltir yr awr) ar gyfer yr ymarferion osgoi perygl a stop brys.

Modiwl dau

Ar gyfer modiwl dau mae'n rhaid i chi ddangos eich tystysgrif sy'n profi eich bod wedi pasio modiwl un, yn ogystal â'r dogfennau y bu'n rhaid i chi eu dangos ar gyfer y prawf modiwl un.

Modiwl dau yw'r modiwl ar y ffordd ac mae fel arfer yn para tua 40 munud. Mae'r modiwl hwn yn cynnwys prawf llygaid, cwestiynau am ddiogelwch a chydbwysedd a'r elfen gyrru ar y ffordd a fydd yn cynnwys amrywiaeth o amodau ffyrdd a thraffig.

Gofynnir i chi wneud stop arferol, cychwyn ar ongl (cychwyn o'r tu ôl i gerbyd sydd wedi parcio) a, lle bo'n bosibl, cychwyn ar allt. Bydd yr arholwr yn eich dilyn ar feic modur fel arfer, gan ddefnyddio radio i roi cyfarwyddiadau i chi.

Gallwch lwytho rhestr o'r holl gyfuniadau posibl o gwestiynau am ddiogelwch a chydbwysedd y gallai'r arholwr eu gofyn i chi.

• Gofynion golwg ar gyfer gyrru

• Llwytho 'cwestiynau am ddiogelwch cerbydau ar gyfer profion beic modur' oddi ar y we (PDF, 10K) Opens new window

• Cymorth gyda ffeiliau PDF

Y fideo prawf beic modur ymarferol

Gallwch ddysgu mwy am y prawf beic modur ymarferol drwy wylio’r ‘fideo prawf beic modur ymarferol’, sy’n darparu arddangosiad cam wrth gam o’r ddau fodiwl o’r prawf beic modur.

• Y fideo prawf beic modur ymarferol Opens new window

Canlyniadau eich prawf

Ar ddiwedd modiwl un, bydd yr arholwr yn rhoi'r canlyniad i chi a gallwch ofyn am adborth ar sut wnaethoch chi. Os gwnaethoch basio, cewch dystysgrif yn dweud eich bod wedi pasio modiwl un.

Ar ddiwedd modiwl dau, bydd yr arholwr yn dweud wrthych a ydych wedi pasio neu fethu a gallwch ofyn am adborth ar sut wnaethoch chi.

Os byddwch yn methu un o'r ddau fodiwl, dylech ofyn i'r arholwr am rywfaint o adborth i'ch helpu i baratoi ar gyfer eich prawf nesaf. Bydd eich adroddiad prawf gyrru yn tynnu sylw at feysydd lle gwnaethoch unrhyw gamgymeriadau.

Os byddwch yn pasio'r ddau fodiwl, bydd yr arholwr yn egluro wrthych sut mae newid eich trwydded dros dro yn drwydded lawn.

Trefnu i ailwneud eich prawf

Gallwch drefnu'r ddau fodiwl ar yr un pryd ond mae'n rhaid i chi fod wedi pasio eich prawf modiwl un cyn y cewch wneud modiwl dau.

Os byddwch yn methu modiwl un, mae'n rhaid i chi aros tri diwrnod gwaith cyn eich bod yn gymwys i ailwneud eich prawf. Os na wnewch roi'r tri diwrnod gwaith y mae eu hangen ar yr Asiantaeth Safonau Gyrru yn hysbysu eich bod yn canslo, byddwch yn colli eich ffi am brawf modiwl dau.

Os byddwch yn methu eich prawf modiwl dau, mae'n rhaid i chi aros 10 diwrnod gwaith cyn y gallwch ailwneud y modiwl.

• Trefnu eich prawf theori a'ch prawf ymarferol ar-lein

• Beiciau modur y cewch chi eu gyrru