Gwefan llywodraeth y DU

Osgoi damwain

Mae'r gyrwyr gorau yn canolbwyntio'n galetach na'r gyrrwr cyffredin, ac maent yn cadw golwg barhaus ar bopeth o'u cwmpas am unrhyw arwydd o berygl posibl. Dydyn nhw ddim yn disgwyl i rywbeth ddatblygu.

Mae popeth wedi'i gynllunio, a byddant yn gyrru ar gyflymder diogel gyda'r beic yn y gêr cywir ac ar y safle mwyaf diogel ar y ffordd. Mae'r rhan fwyaf o'r gyrwyr hyn wedi dilyn cyrsiau gyrru'n bwyllog ac maent wastad yn datblygu'r sgiliau hyn

Beth y gallwch chi ei wneud?

Os ydych chi'n credu bod hyfforddi yn ddiflas, ceisiwch ei ystyried fel modd o ddatblygu eich sgiliau beicio.

Siaradwch â hyfforddwr proffesiynol ynghylch cyrsiau gyrru pellach. Mae'r hyfforddwyr hyn i gyd yn feicwyr modur brwd sy'n fwy na pharod i rannu eu gwybodaeth.

Cofrestr Hyfforddwyr Beic Modur Ar Ôl Prawf

Mae'r Gofrestr Hyfforddwyr Beic Modur Ar Ôl Prawf yn gofrestr wirfoddol o hyfforddwyr beic modur ar ôl prawf sy'n rhoi asesiadau a hyfforddiant datblygu i unrhyw feiciwr modur sydd wedi pasio'r prawf beic modur. Nod y cwrs yw gwella sgiliau beicio'r sawl:

• sydd wedi pasio'r prawf
• sy'n dychwelyd at feicio
• sy'n uwchraddio i feic mwy
• sy'n teimlo bod angen mireinio eu sgiliau

Mae'r gofrestr yn tyfu ac mae hyfforddwyr yn ymddangos ledled y wlad, gan ddarparu asesiadau cymeradwy a hyfforddiant i feicwyr sydd wedi'i deilwra at anghenion yr unigolyn.

Mae'r Asiantaeth Safonau Gyrru wedi achredu Fast-Trak i ddarparu hyfforddiant i hyfforddwyr a hoffai ymuno â'r gofrestr. Fel y corff hyfforddi penodedig cyntaf, bydd y Gofrestr yn awr yn gallu hyfforddi eu hyfforddwyr eu hunain at safon cofrestr yr Asiantaeth Safonau Gyrru, a disgwylir achredu eraill cyn bo hir.

• Rhestr cysylltiadau Cofrestr Hyfforddwyr Beic Modur Ar Ôl Prawf Opens new window

Cynllun Beicwyr Gwell

Dan y Cynllun Beicwyr Gwell, bydd pob hyfforddai yn derbyn hyfforddiant a datblygiad a ddarperir o faes llafur y Gofrestr Hyfforddwyr Beic Modur Ar Ôl Prawf ac sydd wedi'i deilwra at anghenion y beiciwr unigol. Mae'n golygu y bydd y beiciwr yn derbyn cymaint neu gyn lleied o ddatblygiad ag y mae angen, yn hytrach na phecyn llawn oddi ar y silff.

Bydd pob hyfforddai sy'n cyrraedd y safon ar ôl asesiad a chwrs hyfforddi a roddir gan un o hyfforddwyr cymeradwy'r Gofrestr yn derbyn Tystysgrif Yswiriant Beiciwr Gwell. Bydd y dystysgrif hon yn rhoi hawl iddynt gael gostyngiadau yswiriant gyda nifer o'r prif froceriaid yswiriant beiciau modur. Yn ogystal â hyn, mae'r Asiantaeth Safonau Gyrru hefyd wedi negodi am ostyngiadau polisi masnach drwy'r Gymdeithas Diwydiant Beiciau Modur.