Gwefan llywodraeth y DU

Sut mae ymgeiswyr sydd â gofynion arbennig yn sefyll y prawf theori?

Mae'r cyfleusterau canlynol ar gael ar gyfer ymgeiswyr sydd ag anghenion arbennig. Rhaid gofyn am y cyfleusterau i gyd wrth drefnu'r prawf.

Cyfleusterau ar gyfer pobl nad yw Saesneg yn iaith gyntaf iddynt

Os nad Saesneg yw eich iaith gyntaf, neu os nad ydych chi'n gallu darllen neu ddeall Saesneg ysgrifenedig yn dda, fe allwch chi wneud cais am drac sain mewn un o 21 iaith. Bydd y trac sain yn eich galluogi i glywed cyfarwyddiadau a chwestiynau'r prawf theori drwy ffonau clust. Bydd y cwestiynau'n cael eu gofyn yn awtomatig i chi, ac fe allwch chi glywed y dewisiadau drwy gyffwrdd â'r testun ar y sgrîn. Fe allwch chi glywed y cwestiynau mor aml ag y dymunwch, dim ond drwy gyffwrdd testun y cwestiwn ar y sgrîn eto.

Mae traciau sain mewn ieithoedd tramor ar gael yn yr ieithoedd canlynol:

Albaneg, Arabeg, Bengaleg, Cantoneg, Cashmireg, Cwrdeg, Cymraeg, Dari, Farsi, Gwjarateg, Hindi, Mirpwri, Portiwgaleg, Pwnjabeg, Pwshto, Pwyleg, Saesneg, Sbaeneg, Tamileg, Tyrceg, Wrdw

Profion gyda chymorth cyfieithwyr

Os nad oes trac sain ar gael yn eich dewis iaith, fe allwch chi wneud cais am gael prawf theori gyda chymorth cyfieithydd. Gall yr asiant yn y ganolfan alw roi gwybod i chi enwau a manylion cyswllt cyfieithwyr cymeradwy yr DSA. Eich cyfrifoldeb chi yw trefnu dyddiad prawf gyda'r cyfieithydd a thalu unrhyw ffioedd cysylltiedig.

Cyfleusterau ar gyfer pobl sydd ag anawsterau darllen

Os oes gennych chi ddyslecsia neu anawsterau darllen eraill, fe allwch chi ofyn am drac sain Saesneg neu Gymraeg. Fe allwch chi hefyd wneud cais i gael hyd at ddwywaith yr amser ar gyfer rhan amlddewis y prawf theori. Os oes angen mwy na'r 40 munud arferol arnoch ar gyfer y rhan amlddewis, bydd angen i chi anfon tystiolaeth o'ch anhawster darllen i adran gwasanaethau cwsmeriaid prawf theori.

Cyfleusterau ar gyfer pobl sy'n drwm eu clyw

Os ydych chi'n fyddar neu yn drwm eich clyw, fe allwch chi ofyn am gael sefyll y prawf theori mewn iaith arwyddion Prydain (BSL). Bydd y dehongliad iaith arwyddion yn cyd-redeg â chwestiynau ac atebion safonol y prawf. Os nad ydych chi'n defnyddio iaith arwyddion Prydain, gellir cael dehonglydd yn y ganolfan brawf, ond mae angen trefnu hyn gydag adran gwasanaethau cwsmeriaid y prawf theori. Ni chodir unrhyw dâl ychwanegol am y cais hwn.

Anghenion arbennig eraill

Os oes gennych chi anghenion arbennig nad oes sôn amdanynt uchod, cysylltwch ag adran gwasanaethau cwsmeriaid y prawf theori i drafod eich anghenion a'r cyfleusterau sydd ar gael.

Mwy o ddolenni defnyddiol

• Ffioedd profion gyrru
• Trefnu prawf gyrru theori ar-lein Opens new window
• Dod o hyd i'ch canolfan agosaf ar gyfer y prawf theori Opens new window