Gwefan llywodraeth y DU

Yn ystod eich seibiant mabwysiadu

Eich telerau ac amodau yn ystod seibiant mabwysiadu

Pan fyddwch chi ar seibiant mabwysiadu cyffredin, byddwch yn cadw eich hawliau a'ch buddiannau cyflogaeth arferol (heblaw eich cyflog). Gallai hyn gynnwys unrhyw fynediad at gar cwmni neu ffôn symudol sydd gennych fel rhan o'ch contract. Os cymerwch seibiant mabwysiadu ychwanegol, gellir gohirio rhai hawliau a buddiannau cytundebol (ee car cwmni), er y bydd eich hawliau statudol yn parhau.

Fodd bynnag, os disgwylir i'ch plentyn gael ei leoli gyda chi i'w fabwysiadu ar 5 Hydref 2008 neu wedi hynny, byddwch yn cadw eich hawliau a'ch buddiannau cyflogaeth arferol (heblaw eich cyflog) drwy gydol eich seibiant mabwysiadu.

Beth sy'n digwydd i'ch cyfraniadau pensiwn pan fyddwch chi ar seibiant mabwysiadu?

Os yw eich cyflogwr yn cyfrannu at gynllun pensiwn galwedigaethol, rhaid iddo barhau i wneud ei gyfraniadau arferol am yr holl gyfnod y byddwch ar seibiant mabwysiadu cyffredin a seibiant mabwysiadu ychwanegol, neu unrhyw bryd y byddwch yn derbyn unrhyw Dâl Mabwysiadu Statudol neu dâl mabwysiadu cytundebol. Os ydych chi'n arfer gwneud cyfraniadau at eich pensiwn, dylech barhau i wneud hynny, yn seiliedig ar faint o dâl mabwysiadu rydych chi'n ei gael.

Beth sy'n digwydd i'ch hawliad gwyliau pan fyddwch chi ar seibiant mabwysiadu?

Byddwch yn dal i gronni eich holl hawliadau am wyliau â thâl pan fyddwch chi ar seibiant mabwysiadu cyffredin. Ond, os nad yw eich contract yn nodi'n wahanol, dim ond yr isafswm statudol (4.8 wythnos neu 24 diwrnod i'r rheini sy'n gweithio llawn amser) o hawliad gwyliau y byddwch yn ei gronni yn ystod seibiant mabwysiadu ychwanegol. Fodd bynnag, os disgwylir i'ch plentyn gael ei leoli gyda chi i'w fabwysiadu ar 5 Hydref 2008 neu wedi hynny, byddwch yn cronni eich holl hawliadau am wyliau â thâl drwy gydol eich seibiant mabwysiadu.

Gallwch ychwanegu gwyliau at ddechrau neu ddiwedd eich seibiant. Efallai na fyddwch yn gallu cario ymlaen hawliad gwyliau heb ei gymryd os aiff eich seibiant mabwysiadu dros ddwy flwyddyn wyliau, felly yn aml bydd yn well ei gymryd ar ddechrau eich seibiant.

• Mwy am hawliau gwyliau (adran cyflogaeth)

Dychwelyd i'r gwaith

Ar ôl absenoldeb mabwysiadu arferol, mae gennych hawl i ddychwelyd i'r un swydd. Mae hyn hefyd yn berthnasol pan ddewch yn ôl ar ôl seibiant mabwysiadu, oni bai bod eich cyflogwr yn dangos nad yw'n rhesymol ymarferol iddo roi eich swydd wreiddiol yn ôl i chi (er enghraifft, am nad yw'r swydd yn bodoli mwyach). Os bydd hynny'n digwydd, rhaid cynnig gwaith arall i chi â thelerau ac amodau fel pe na baech wedi bod yn absennol.

Dylai eich cyflogwr gymryd yn ganiataol eich bod yn cymryd 52 wythnos lawn o seibiant, oni bai eich bod yn dweud fel arall wrtho. Os dymunwch newid y dyddiad y byddwch yn dychwelyd i'r gwaith, rhaid i chi roi o leiaf wyth wythnos o rybudd. Gall eich cyflogwr fynnu nad ydych yn dychwelyd nes diwedd yr wyth wythnos.

Os penderfynwch beidio â dychwelyd i'r gwaith o gwbl, rhaid i chi roi rhybudd i'ch cyflogwr yn y ffordd arferol.

• Rhybudd a thâl rhybudd - cael gwybod mwy (adran gweithwyr)

Beth sy'n digwydd os ydych yn sâl ar ddiwedd eich seibiant

Os na allwch ddychwelyd i'r gwaith ar ddiwedd eich seibiant mabwysiadu oherwydd salwch, rhowch wybod i'ch cyflogwr yn y ffordd arferol.

Diswyddo ar sail seibiant mabwysiadu

Mae'n anghyfreithlon i chi gael eich diswyddo yn ystod seibiant mabwysiadu neu ar ddiwedd y seibiant, neu ar ôl i chi ailddechrau gweithio, ar sail y seibiant mabwysiadu hwnnw neu am i chi fanteisio ar unrhyw un o'ch hawliau statudol yn ystod eich seibiant mabwysiadu.

Ble mae cael cymorth

Mae'r Gwasanaeth Ymgynghorol Cymodi a Chymrodeddu (Acas) yn cynnig cyngor diduedd, cyfrinachol a di-dâl am unrhyw faterion hawliau cyflogaeth. Fe allwch chi ffonio llinell gymorth Acas ar 08457 47 47 47 rhwng 8.00am a 6.00pm o ddydd Llun i ddydd Gwener.

• Acas Opens new window

Mae'r Asiantaeth Cysylltiadau Llafur (LRA) yn cynnig cyngor diduedd, cyfrinachol a di-dâl am faterion hawliau cyflogaeth i breswylwyr Gogledd Iwerddon.

Gallwch gysylltu â'r LRA ar 028 9032 1442 rhwng 9.00 am a 5.00 pm o ddydd Llun i ddydd Gwener.

• Asiantaeth Cysylltiadau Llafur Opens new window

Gall eich canolfan Cyngor ar Bopeth (CAB) leol roi cyngor diduedd a di-dâl. Gallwch ganfod eich swyddfa CAB leol yn y llyfr ffôn neu ar-lein.

• Dod o hyd i'ch canolfan Cyngor ar Bopeth leol Opens new window

Os ydych chi'n aelod o undeb llafur, fe allwch chi gael help, cyngor a chefnogaeth ganddyn nhw hefyd.

• Cyflwyniad i undebau llafur (adran cyflogaeth)

Rhagor o ddolenni defnyddiol

• Cydbwysedd rhwng bywyd a gwaith a gweithio hyblyg
• Cyngor i gyflogwyr ynghylch mamolaeth, tadolaeth a mabwysiadu gan businesslink.gov.uk Opens new window
• Cyngor i gyflogwyr yng Ngogledd Iwerddon ar famolaeth, tadolaeth a mabwysiadu gan nibusinessinfo Opens new window