Gwefan llywodraeth y DU

Y rhai sydd mewn mwyaf o berygl ar y ffordd yw cerddwyr, yn enwedig plant, pobl hŷn neu bobl anabl, seiclwyr, beicwyr modur a phobl ar gefn ceffylau. Mae’n bwysig bod pawb sy’n defnyddio’r ffordd yn ymwybodol o’r Rheolau a’u bod yn ystyriol o’i gilydd. Mae hyn yr un mor wir i gerddwyr ag ydyw i yrwyr a beicwyr.

Mae llawer o’r rheolau yn ofynion cyfreithiol, ac os byddwch yn anufuddhau i’r rheolau hyn rydych yn cyflawni trosedd. Gallwch gael dirwy, cael pwyntiau ar eich trwydded neu gael eich gwahardd rhag gyrru. Yn yr achosion mwyaf difrifol, gallwch gael eich anfon i’r carchar. Gallwch adnabod rheolau o’r math hwn gan fod y geiriau 'RHAID/RHAID I CHI BEIDIO Â' yn cael eu defnyddio. Mae’r rheol hefyd yn cynnwys cyfeiriad talfyredig at y ddeddfwriaeth sy’n creu’r drosedd. Mae esboniad o’r talfyriadau i’w weld yn 'Defnyddiwr y ffordd a’r gyfraith'.

Na fydd methu â chydymffurfio â’r rheolau eraill o fewn Rheolau’r Ffordd Fawr ynddo’i hun yn achosi i berson gael ei erlyn. M9ae modd i Reolau’r Ffordd Fawr gael eu defnyddio mewn tystiolaeth fel rhan o achos llys o dan y Deddfau Traffig (gweler 'Defnyddiwr y ffordd a’r gyfraith') i sefydlu atebolrwydd. Mae hyn yn cynnwys rheolau sy’n cynnwys geiriau o gyngor, megis ‘dylech/ni ddylech’.

Gall gwybod Rheolau’r Ffordd Fawr a’u rhoi ar waith leihau nifer y bobl sy’n cael eu hanafu mewn damweiniau ar y ffordd yn sylweddol. Mae lleihau nifer y marwolaethau a’r anafiadau sy’n digwydd ar ein ffyrdd bob dydd yn gyfrifoldeb ar bob un ohonom. Gall Rheolau’r Ffordd Fawr ein helpu i ysgwyddo’r cyfrifoldeb hwnnw. Ceir rhagor o wybodaeth am dechnegau gyrru/beicio yn 'The Official DSA Guide to Driving - the essential skills' a 'The Official DSA Guide to Riding - the essential skills'.