Gwefan llywodraeth y DU

Os aiff eich pasbort ar goll neu os caiff ei ddwyn yn y DU

Mae'n rhaid i chi roi gwybod i'r Gwasanaeth Hunaniaeth a Phasbortau eich bod wedi colli eich pasbort neu ei fod wedi'i ddwyn. Bydd hyn yn lleihau'r risg o gael rhywun yn defnyddio eich pasbort neu eich hunaniaeth. I roi gwybod bod eich pasbort ar goll neu wedi'i ddwyn, dylech lenwi ffurflen Hysbysu am Basbort sydd ar Goll neu wedi'i Ddwyn (LS01) a'i dychwelyd i'r Gwasanaeth Hunaniaeth a Phasbortau. Mae’r cyfeiriad ar y ffurflen.

Dylech hefyd ddweud wrth yr heddlu am bob achos o ddwyn pasbort. Bydd angen manylion cyfeirnod y trosedd arnoch ar gyfer y ffurflen LS01.

Gallwch wneud cais am basbort newydd ar yr un pryd a phan fyddwch yn rhoi gwybod bod eich pasbort wedi'i ddwyn ar yr amod eich bod:

• yn un o ddinasyddion Prydain
• yn y DU pan rydych yn gwneud y cais

Er mwyn cael pasbort newydd yr un pryd â phan fyddwch yn rhoi gwybod ei fod ar goll neu wedi'i ddwyn, ewch i 'Cael pasbort newydd yn lle un sydd ar goll, wedi'i ddwyn neu wedi'i ddifrodi'.

• Cael pasbort newydd yn lle un sydd ar goll, wedi'i ddwyn neu wedi'i ddifrodi

Ffurflen Hysbysu am Basbort sydd ar Goll neu wedi'i Ddwyn (LS01)

• Gofyn am ffurflen Hysbysu (LS01) am Basbort sydd ar Goll neu wedi'i Ddwyn Opens new window

• Cymorth gyda ffeiliau PDF

• Dod o hyd i'ch Swyddfa Basbort Ranbarthol agosaf Opens new window

• Llenwi'r ffurflen Hysbysu am Basbort sydd ar Goll neu wedi'i Ddwyn (LS01) ar-lein Opens new window

Os aiff eich pasbort Prydeinig ar goll neu os caiff ei ddwyn dramor

Dylech roi gwybod am bob achos o golli neu ddwyn pasbort wrth heddlu lleol y wlad rydych yn ymweld â hi cyn gynted â phosib. Bydd angen manylion cyfeirnod y trosedd y byddant yn eu darparu arnoch ar gyfer y ffurflen LS01.

Dylech roi gwybod bod y pasbort ar goll neu wedi'i ddwyn wrth lysgenhadaeth Swyddfa Dramor a Chymanwlad y DU, is-genhadaeth neu uwch gomisiwn y wlad rydych yn ymweld â hi. Gallwch gael manylion eich swyddfa Dramor a Chymanwlad leol ble bynnag yr ydych drwy ffonio +44 (0)20 7008 1500 (0870 606 0290 o fewn y DU) neu drwy ymweld â gwefan y Swyddfa Dramor a Chymanwlad.

Pan fyddwch yn rhoi gwybod i'r Swyddfa Dramor a Chymanwlad, bydd yn rhoi ffurflen Hysbysu am Basbort sydd ar Goll neu wedi'i Ddwyn (LS01) i chi ei llenwi a'i llofnodi. Gallwch hefyd lwytho'r ffurflen hon oddi ar y we os byddwch yn ei cholli neu os bydd angen copi arall arnoch.

Bydd y Swyddfa Dramor a Chymanwlad yn cofnodi bod eich pasbort ar goll neu wedi'i ddwyn ac yna'n anfon yr wybodaeth at y Gwasanaeth Hunaniaeth a Phasbortau. Yna bydd y Gwasanaeth Hunaniaeth a Phasbortau yn diddymu eich pasbort er mwyn lleihau'r risg o rywun arall yn defnyddio eich hunaniaeth.

• Dod o hyd i lysgenadaethau, uwch gomisiynau ac is-genadaethau Prydeinig ledled y byd Opens new window

Cymorth ar gyfer dychwelyd i'r DU

Bydd y Swyddfa Dramor a Chymanwlad yn rhoi dogfennau teithio i chi yn lle eich pasbort fel y gallwch ddychwelyd i'r DU.

Cael pasbort newydd

Gallwch wneud cais am basbort newydd unwaith y byddwch yn ôl yn y DU. Mae'r Gwasanaeth Hunaniaeth a Phasbortau yn argymell y dylech wneud hyn cyn gynted â phosib. Gallwch wneud cais am basbort newydd ar yr amod eich bod yn ddinesydd Prydeinig a'ch bod yn y DU pan rydych yn gwneud cais.

• Cael pasbort newydd yn lle un sydd ar goll, wedi'i ddwyn neu wedi'i ddifrodi

Os oedd eich plentyn wedi'i gynnwys ar y pasbort

Os oedd eich plentyn wedi'i gynnwys ar eich pasbort sydd wedi mynd ar goll, wedi'i ddwyn neu wedi'i ddifrodi, ni ellir ei gynnwys ar eich pasbort newydd. Bydd angen i chi wneud cais am basbort plentyn cyntaf ar eu cyfer os ydynt dan 16 oed.

• Gwneud cais am basbort plentyn newydd neu i adnewyddu un

Os dewch o hyd i'ch pasbort yn ddiweddarach

Os dewch o hyd i'ch pasbort ar ôl rhoi gwybod ei fod ar goll neu wedi'i ddwyn, mae'n rhaid i chi ei ddychwelyd i'r Gwasanaeth Hunaniaeth a Phasbortau. Pan fydd y Gwasanaeth Hunaniaeth a Phasbortau wedi cael eich ffurflen Hysbysu am Basbort sydd ar Goll neu wedi'i Ddwyn (LS01) byddant yn diddymu eich pasbort. Unwaith y bydd hyn wedi'i wneud, ni allwch ei ddefnyddio i deithio, fel prawf cyfreithiol o'ch cenedligrwydd nac ar gyfer unrhyw ddiben cyfreithiol arall.

• Dod o hyd i'ch Swyddfa Basbort Ranbarthol agosaf Opens new window

Os dewch o hyd i'ch pasbort wrth i chi lenwi'r ffurflen Hysbysu am Basbort sydd ar Goll neu wedi'i Ddwyn (LS01) ar-lein

Os ydych wedi llenwi ffurflen ar-lein yn datgan eich bod wedi colli eich pasbort, ond y dewch o hyd i'ch pasbort cyn dychwelyd y ffurflen i'r Gwasanaeth Hunaniaeth a Phasbortau, peidiwch â llofnodi'r ffurflen y byddant yn ei hanfon atoch. Dylech ei dychwelyd gyda nodyn ar wahân yn cadarnhau eich bod wedi dod o hyd i'ch pasbort ac nad ydych am ei ddiddymu mwyach.