Gwefan llywodraeth y DU

Cyn i chi gyrraedd y maes awyr

Cynllunio beth rydych am ei bacio

Ceisiwch bacio pethau gwerthfawr a phethau y bydd eu hangen arnoch yn ystod y daith yn unig yn eich bag llaw. Bydd hyn yn arbed amser i chi wrth fynd drwy giatiau diogelwch y maes awyr. Cyn cychwyn:

• paciwch unrhyw hylifau yn eich prif fag sy'n cael ei gofrestru lle bo'n bosibl - dylech gario'r unig bethau y bydd eu hangen arnoch yn ystod y daith yn eich bag llaw
• rhowch unrhyw hylifau ar gyfer eich bag llaw mewn cynhwysyddion bach (sy'n dal 100ml neu lai) mewn bag y gellir ei selio
• os ydych yn cario unrhyw anrhegion yn eich bag llaw peidiwch â'u lapio
• peidiwch â rhoi tanwyr yn eich bag llaw (mae gennych hawl i gario un taniwr ond mae'n rhaid i chi ei gadw yn eich poced yn ystod y daith)
• cysylltwch â'ch maes awyr neu'ch cwmni hedfan os oes gennych unrhyw ymholiadau am eich taith neu am y rheolau bagiau sy'n berthnasol

Cyrraedd y maes awyr

Yn gyffredinol dylech anelu at gyrraedd y maes awyr:

• tair awr cyn teithiau pell
• dwy awr cyn teithiau i Ewrop
• 90 munud cyn teithiau o fewn y DU ac Iwerddon

Bydd angen i chi hefyd benderfynu ar y ffordd orau o gyrraedd y maes awyr. Gall parcio mewn meysydd awyr fod yn ddrud, felly efallai y byddai'n well gennych ddefnyddio trafnidiaeth gyhoeddus yn hytrach na char.

• Defnyddio Cynlluniwr Taith i gynllunio eich taith i'r maes awyr
• Mwy am y rheolau bagiau llaw presennol

Beth sy’n digwydd yn y giatiau diogelwch?

Ceir mesurau diogelwch ychwanegol ar waith yn holl feysydd awyr y DU, felly mae'n syniad da gadael digon o amser ar gyfer archwiliadau diogelwch. Bydd angen sgrinio eich holl fagiau llaw a gofynnir i chi gerdded drwy gât ddiogelwch. Byddwch yn barod i:

• rhoi eich bag rhesymol o hylifau - bydd yn cael ei sgrinio ar wahân i'ch prif fag llaw
• rhoi eich gliniadur neu unrhyw eitem drydanol fawr arall er mwyn eu sgrinio ar wahân
• tynnu eich côt neu'ch siaced a'ch esgidiau
• rhoi unrhyw eitemau metel fel allweddi, oriawr neu emwaith yn yr hambwrdd plastig er mwyn eu sgrinio

• Mwy am y rheolau bagiau llaw presennol

Y lolfa ymadael a siopa yn y maes awyr

Tra'r ydych yn y lolfa ymadael, bydd sgriniau'n dangos pryd y bydd hi'n amser i chi fynd ar yr awyren. Cofiwch adael digon o amser i fynd o'r lolfa i'ch gât sy'n eich arwain at yr awyren.

Gallwch fynd ag unrhyw beth y byddwch yn ei brynu o'r siopau yn y lolfa ymadael (a elwir weithiau'n 'awyr agored') gyda chi ar yr awyren, gan gynnwys hylifau fel bwyd a diod ar gyfer eich taith. Pan fyddwch yn siopa yn y lolfa ymadael:

• os rhoddir eich nwyddau i chi mewn bag arbennig wedi'i selio, peidiwch â'i agor nes byddwch wedi cyrraedd pen eich taith.
• cadwch eich derbynneb oherwydd efallai y gofynnir i chi ei dangos yn nes ymlaen - os ydych yn newid teithiau, er enghraifft
• cofiwch fod rhai cyfyngiadau ar nwyddau di-dreth a brynir ar deithiau dychwelyd pan fyddwch yn newid awyrennau mewn meysydd awyr yn yr UE - ceir eglurhad ar y rhain yn yr adran nesaf

Dychwelyd i'r DU neu deithio drwy'r DU

Teithio o faes awyr yn yr UE, Norwy, Gwlad yr Iâ neu'r Swistir

Mae'r trefniadau a amlinellir uchod ac ar y dudalen ar Hedfan a rheolau bagiau llaw yn berthnasol.

Mae aelod-wladwriaethau'r UE fel a ganlyn: Awstria, Gwlad Belg, Bwlgaria, Cyprus, y Weriniaeth Tsiec, Denmarc, Estonia, y Ffindir, Ffrainc, yr Almaen, Groeg, Hwngari, Iwerddon, yr Eidal, Latfia, Lithwania, Lwcsembwrg, Malta, yr Iseldiroedd, Gwlad Pwyl, Portiwgal, Romania, Slofacia, Slofenia, Sbaen, Sweden, y Deyrnas Unedig.

Teithio o faes awyr mewn unrhyw wlad arall

Bydd trefniadau lleol yn berthnasol.

Gwybodaeth arbennig i deithwyr trawstaith

Os byddwch yn gorfod newid awyren mewn unrhyw faes awyr yn yr UE yn ystod eich taith, mae cyfyngiadau arbennig yn berthnasol.

Ni allwch fynd â hylifau (gan gynnwys rhai di-dreth) drwy'r giatiau diogelwch yn eich maes awyr cysylltiol os nad:

• ydynt yn bodloni'r holl ofynion a nodir uchod ac a eglurir yn llawn ar y dudalen Hedfan a rheolau bagiau llaw, neu
• os nad ydynt wedi'u prynu mewn maes awyr yn yr UE neu ar awyren a weithredir gan gludwr yr UE - bydd angen i chi ddangos derbynneb i brofi hyn

Os ydych wedi prynu eitemau hylif o dros 100ml o feysydd awyr eraill neu ar awyrennau eraill bydd angen i'r rhain fynd i'ch bag sy'n cael ei gofrestru ar y daith gysylltiol.

• Mwy am y rheolau bagiau llaw presennol