Gwefan llywodraeth y DU

Sut mae'r gystadleuaeth yn gweithio?

Cynhaliodd awdurdodau lleol gyfres o gystadlaethau er mwyn dod o hyd i'r prosiectau gorau a'r rhai mwyaf llwyddiannus a dderbyniodd arian gan y Cronfeydd Ieuenctid. Roedd yn rhaid i bob awdurdod ddewis un prosiect yn unig o'u hardal nhw, ac roedd y prosiect hwnnw'n mynd ymlaen i gystadleuaeth 'Gwneud yn ogystal â dweud...' genedlaethol.

Rhoddwyd gwobrau o hyd at £45,000 i'r 15 prosiect buddugol. Defnyddiwyd yr arian ychwanegol i ddatblygu neu ehangu prosiect, sy'n golygu y bydd mwy o bobl ifanc yn eu harddegau'n elwa ohono.

Gan mai'r bobl ifanc a feddyliodd am y syniadau oedd y rhai oedd yn deall eu prosiectau orau, nhw a helpodd i benderfynu ym mhle y byddai'r arian yn cael ei wario - p'un a fyddai'n cael ei wario ar brosiect sy'n bodoli'n barod neu'n cael ei ddefnyddio i sefydlu prosiect newydd yn seiliedig ar y syniad gwreiddiol.

• Beth yw'r Cronfeydd Ieuenctid?

Pwy oedd yn dewis yr enillwyr?

Ffurfiodd grŵp o 23 o bobl ifanc rhwng 15 ac 20 oed banel beirniadu. Dyma nhw'n edrych ar bob prosiect ac yn penderfynu pa rai oedd wedi cael yr effaith fwyaf ar y gymuned a faint o bobl ifanc eraill yn eu harddegau y gallai'r prosiect eu helpu pe bai'n cael arian ychwanegol i ehangu.

Pwy oedd yr enillwyr?

Cafodd 15 o brosiectau o bob cwr o'r wlad eu gwobrwyo am eu llwyddiant. Dyma nhw:

• prosiect ‘Getting a Life’ yn Swydd Caergrawnt, sy'n helpu pobl ifanc anabl i roi cynnig ar weithgareddau hamdden newydd
• Nettica, y caffi rhyngrwyd newydd a grëwyd yn Coventry
• Clwb Ieuenctid YO2 sy'n dod â phobl ifanc a chanddynt anableddau meddyliol o bob rhan o Ddyfnaint at ei gilydd
• canolfan galw heibio Xtrax sy'n rhoi lle diogel i bobl ifanc yn eu harddegau fynd iddo mewn ardal yn Nwyrain Sussex sy'n cael ei heffeithio gan broblemau cymdeithasol a throseddu
• “cawell chwaraeon” wedi'i ailwampio i bobl ifanc Essex ei ddefnyddio
• Prosiect Gardd Mpower, a greodd ardd a chae chwarae newydd i bobl ifanc anabl ym mwrdeistref Haringey, Llundain
• maes chwarae newydd ar gyfer Clwb Chwaraeon Centenary Park yn Harrow
• prosiect Chwalu Rhwystrau (Breaking Barriers) yn Lewisham, sy'n anelu at fynd i'r afael â diwylliant y gangiau yn yr ardal
• camerâu ac offer newydd i grŵp Youth Arts Cinema yn Swydd Gaerhirfryn
• cae pêl-droed ac ystafell gyfrifiaduron newydd i Glwb Ieuenctid Oliver Hinds yn Nottingham
• prosiect Shine yn Sheffield, sy'n helpu pobl ifanc yn eu harddegau sy'n ordew i ddysgu am fwyta'n iach
• prosiect S*tar, sy'n helpu pobl ifanc rhwng 14 a 15 oed i ddysgu pobl sy'n iau na nhw am faterion yn ymwneud ag iechyd rhyw
• offerynnau cerdd a deciau DJ ar gyfer Prosiect Cerddoriaeth Fairfield yn Stockton-on-Tees
• cyfres o sioeau talent yn Walsall a gododd arian ar gyfer dioddefwyr y tswnami a ddigwyddodd yn Sri Lanka ddydd San Steffan
• noson amlddiwylliannol yn Swydd Worcester, a roddodd gyfle i bobl ifanc o wahanol gefndiroedd ethnig ddod i adnabod ei gilydd yn well

Gallwch ddod o hyd i fwy o wybodaeth am y prosiectau hyn drwy ddarllen ein hastudiaethau achos, sy'n egluro sut y meddyliodd y bobl ifanc am y syniadau, sut yr aethant ati i ddefnyddio'r arian a sut yr helpodd y prosiectau eu cymunedau lleol.