Gwefan llywodraeth y DU

Cyngor Swydd Caergrawnt - Byw Bywyd (Getting a Life)

Efallai mai uchafbwynt wythnos rhai pobl ifanc anabl yw trip i'r archfarchnad leol gyda'u rhieni, ond mae elusen o Gaergrawnt - Speaking Up - yn anelu at newid hynny.

Mae prosiect peilot yn Huntingdon yn helpu wyth o bobl ifanc anabl i lunio cynlluniau ar gyfer y math o fywyd cymdeithasol yr hoffent ei gael, a'r math o gymorth y bydd ei angen arnynt er mwyn cyflawni hyn.

Byddant wedyn yn cael eu paru gyda phobl ifanc nad ydynt yn anabl, a fydd yn eu helpu i ddefnyddio arian, i deithio neu hyd yn oed i fod yn gefn iddynt a'u hannog i roi cynnig ar rywbeth newydd. Bydd y bobl ifanc anabl yn cael cyfle i gymryd rhan mewn amrywiaeth o weithgareddau, fel gwersi dawnsio, mynd i'r gampfa neu chwarae pêl-droed yn y parc hyd yn oed.

Cyngor Dinas Coventry - Caffi rhyngrwyd Nettica

Pan welodd Hamida Khalifa, gweithiwr cymdeithasol yn Coventry, bod yr ymddygiad gwrthgymdeithasol yn cynyddu yn yr ardal, ymunodd â'r heddlu lleol i fynd i'r afael â'r mater.

Dywedodd pobl ifanc leol wrth Hamida a'r heddlu nad oedd ganddynt ddim byd diddorol i'w wneud yn ystod y min nos, ond yr hoffent pe bai caffi rhyngrwyd ar gael iddynt. Nid oedd caffi rhyngrwyd yn yr ardal leol, felly penderfynasant greu un eu hunain. Meddyliodd saith o wirfoddolwyr yn eu harddegau am syniad Nettica, ac arian gan y Gronfa Ieuenctid a dalodd am ailwampio'r caffi rhyngrwyd a agorodd ei ddrysau ym mis Ionawr 2007. Erbyn y mis canlynol roedd yr ardal gyfagos yn barod yn gweld manteision gwirioneddol, gyda lefelau'r ymddygiad gwrthgymdeithasol yn gostwng.

Cyngor Swydd Dyfnaint - Clwb Ieuenctid YO2

Mae Clwb Ieuenctid Y02 yn Tiverton yn helpu pobl ifanc gydag anghenion arbennig.

Ar hyn o bryd, dyma'r unig glwb yng nghanol Dyfnaint sy'n cynnig gwasanaeth o'r fath. Mae'n achubiaeth i bobl ifanc o ardaloedd gwledig gan ei fod yn rhoi'r cymorth angenrheidiol iddynt, yn ogystal â bod yn lle hwyliog i fynd iddo. Yn hytrach nag edrych arnynt fel pobl ifanc 'wahanol', edrychir ar yr hyn y gallant ei wneud, nid yr hyn na allant ei wneud.

Pan oedd y clwb mewn perygl o gael ei gau, gwnaeth yr aelodau gais am nawdd Cyfleoedd Ieuenctid. Yn awr, gall y clwb aros yn agored tan o leiaf 2008, ac mae mwy na hanner ei aelodau'n hyfforddi ar gyfer Gwobr Efydd Dug Caeredin.

Cyngor Swydd Dwyrain Sussex - Canolfan Pobl Ifanc XTRAX

Erbyn iddi fod yn 16 oed, roedd Jenny Cross yn gaeth i gyffuriau ac yn byw bywyd caled ar strydoedd Hastings. Un diwrnod, roedd hi'n cerdded heibio canolfan galw heibio yn y dref, ac aeth i mewn yno. Erbyn hyn, mae hi'n 18 oed, mae wedi rhoi'r gorau i gymryd cyffuriau, mae ganddi ei fflat ei hun ac mae hi'n helpu yn y ganolfan a'i helpodd hi.

Mae Xtrax yn elusen annibynnol sydd wedi ei lleoli mewn ardal a chanddi lefelau uchel o ddiweithdra a throseddu. Mae'n agored i bob person ifanc rhwng 16 a 25 oed: Pobl ddigartref, mamau ifanc, pobl sy'n cam-drin cyffuriau neu alcohol, pobl ifanc sydd ag anawsterau dysgu neu bobl ifanc anabl. Yma, caiff pobl ifanc sydd heb neb i droi atynt ymdeimlad gwirioneddol o berthyn ac o fod yn rhan o deulu.

Mae Jenny'n gwirfoddoli yn Xtrax a gwnaeth gais am arian gan y Gronfa Cyfleoedd Ieuenctid. Defnyddiwyd yr arian i dalu am y gwaith o atgyweirio'r adeilad, ac am adeiladu ystafell iechyd rhyw lle gellir gwneud profion beichiogrwydd a phrofion am Heintiau a Drosglwyddir Drwy Ryw.

Cyngor Swydd Essex - Prosiect Chwaraeon Addysg Amgen (ALT-ED)

Mae'r Ganolfan Addysg Amgen yn Harlow yn helpu pobl ifanc 15 ac16 oed sy'n cael anhawster wrth ddysgu sut i baratoi ar gyfer bywyd ar ôl gadael yr ysgol.

Wrth ymyl y ganolfan ceir maes chwaraeon, a oedd yn beryglus ac wedi mynd a'i ben iddo. Gwnaeth deg o bobl ifanc o'r ganolfan gais am arian gan y Gronfa Ieuenctid. Pan ddyfarnwyd grant iddynt gan y Gronfa Cyfalaf Ieuenctid, fe wnaethon nhw rannu'r cyfrifoldeb o roi'r prosiect ar waith. Erbyn hyn, mae'n rhywbeth y gall y gymuned gyfan ei ddefnyddio.

Bwrdesitref Haringey yn Llundain - Prosiect Gardd MPower

Penderfynodd 14 o bobl ifanc anabl o Grŵp Cyfranogaeth Ieuenctid MPower yn Tottenham ddechrau cynllunio eu prosiectau cymunedol eu hunain, gan ddechrau gyda chae chwarae'r ganolfan - a oedd yn eithaf hen erbyn hyn.

Aethant i ymweld â gwahanol gyfleusterau chwarae o gwmpas Llundain a chael adborth gan bobl ifanc anabl eraill. Gwnaethant hyd yn oed ddefnyddio sesiynau symbolau a thynnu lluniau er mwyn cael barn aelodau'r grŵp na allai siarad.

Ar ôl hynny, fe wnaethant dalu am ’Siglen tango' anferth, gofyn i gymaint o bobl â phosib ei ddefnyddio, a'i newid yn ôl eu canfyddiadau. Cynlluniodd y grŵp wahanol atodiadau a oedd yn addas ar gyfer pobl a chanddynt anghenion gwahanol iawn, ac fe wnaethant 'guddfan' hyd yn oed ar frig y siglen ar gyfer pobl ifanc a chanddynt anableddau fel awtistiaeth.