Gwefan llywodraeth y DU

Cymysgu

Mae gan dref Redditch lawer o wahanol gymunedau diwylliannol: ceir yno bobl Affro-Caribïaidd, pobl Asiaidd, pobl Tsieineaidd a nifer cynyddol o Bwyliaid. Ceir perthynas dda rhwng pob hil, ond roedd pobl ifanc leol yn sylweddoli bod tuedd iddynt gadw o fewn eu grwpiau ethnig eu hunain, yn enwedig yn yr ysgol.

Roedd grŵp o fyfyrwyr ysgol uwchradd yn teimlo bod angen newid y sefyllfa hon. Maent i gyd yn aelodau o Gyngor Myfyrwyr Redditch, sy'n cynrychioli pedair ysgol uwchradd y dref, ac roedd arnynt eisiau dod o hyd i ffordd o annog grwpiau ethnig i gymysgu â'i gilydd.

“Roedden ni'n teimlo bod rhywfaint o elyniaeth rhwng y pedair ysgol, ac mai materion yn ymwneud â hil oedd wrth wraidd hynny. Roedden ni eisiau i bawb ddod ymlaen â'i gilydd yn well” medd Oliver Dyer, 17 oed, sy'n gadeirydd ar y Cyngor.

“Roedden ni eisiau gwneud rhywbeth a fyddai'n dod â phobl at ei gilydd,” ychwanega Daniel Allen, sydd hefyd ar y Cyngor, “ond yn fwy na dim rhywbeth a fyddai'n hwyl ar yr un pryd. Cynnal digwyddiad amlddiwylliannol oedd y syniad cyntaf gawson ni.”

Trefnu'r digwyddiad

Aeth y Cyngor Myfyrwyr ati i logi canolfan ieuenctid leol, cyn gwahodd grwpiau ethnig i rannu eu diwylliant, eu traddodiadau, eu celf a'u cerddoriaeth.

Roedd y digwyddiad yn cynnwys:

• cerddoriaeth yn amrywio o reggae a bhangra i gerddoriaeth roc
• dawnsio Gwyddelig a dawnsio Caribïaidd
• arddangosiadau paentio â henna
• gweithdai chwarae drymiau a gweithdai DJ
• bwyd o Tsieina, y Caribi, Asia a Lloegr
• cystadleuaeth pŵl

Roedd y noswaith yn llwyddiant ysgubol, gyda mwy na 200 o bobl yn bresennol. “Cawsom adborth cadarnhaol tu hwnt” medd Oliver.  “Roedd hi'n noson bleserus iawn ac roedd pawb yn gwenu ac yn cael hwyl.”

Sut y newidiodd yr ardal

Mae'r grŵp wedi gweld gwahaniaeth yn barod: “Pan fyddaf yn cerdded o amgylch Redditch ar y penwythnosau, byddaf yn gweld myfyrwyr o wahanol ysgolion yn siarad gyda'i gilydd, ac rydw i fy hunan yn adnabod mwy o ddisgyblion o ysgolion eraill erbyn hyn” medd Oliver.

Mae Daniel yn cytuno: “Mae rhai pobl yn dal yn eu grwpiau gan mai dyna lle maen nhw'n teimlo'n ddiogel, ond mae mwy o fyfyrwyr yn cymysgu erbyn hyn.”

Yn dilyn llwyddiant y digwyddiad cyntaf, mae'r myfyrwyr wedi cael eu hannog i ddefnyddio'r wobr ariannol a gawsant o gystadleuaeth ‘Gwneud yn ogystal â dweud…’ i drefnu pum noson amlddiwylliannol arall ar draws Swydd Worcester. Bydd y digwyddiadau'n cael eu trefnu gan bobl ifanc yn lleol, a Chyngor Myfyrwyr Redditch fydd yn gyfrifol am reoli'r prosiect yn gyffredinol. Maent hefyd eisiau cynhyrchu fideo o'r digwyddiadau fel y gellir ei ddefnyddio mewn ysgolion a chlybiau ieuenctid i hyrwyddo dealltwriaeth o ddiwylliannau gwahanol.

Roedd Cyngor Myfyrwyr Redditch wedi derbyn grant o £2,500 yn wreiddiol fel rhan o ddyraniad Cronfa Cyfleoedd Ieuenctid Swydd Worcester.